曹仁超 - 鼠年要在波動市搵食 2008-02-04

2008-02-04

2月3日，周日。周一立春，即豬年已盡，鼠年接手。呢隻肥豬到去年10月仍然肥肥白白，可惜患上「口蹄症」（Blue ear），最後幾個月只有送去屠房宰掉算了。豬年（2007年2月4日立春到2008年2月1日止）恒生指數由20409點至上周五收市指數24123點，升幅18.19％，完全有豬嘅特性（兩邊走）。最高指數係10月30日嘅31958點，最低指數係8月17日嘅19386點，兩者差距64.85％，豬年內如錯過呢個牛spring，真係邊處都唔使去。

呢段日子最好玩係期權

上帝要佢滅亡，必先令佢瘋狂。大家回想去年10月股市瘋狂程度，只要有點投資智慧，都知道調整市（甚至熊市）遲早出現。如你無法控制自己嘅貪念同恐懼感，冇人可以幫到你。

經歷過2007年下半年至今嘅大上大落，投資者已嚇怕，唔係退出市場就係減持，未來股市將係Trader話事──即波動帶來更多波動。鼠年策略係點樣响波動市中搵食！波動市一樣可以賺錢if you play your cards right！早兩個月前由港交所贊助嘅研討會上我老曹教各位玩期權「起雙飛」（同時睇好、睇淡）。如去年12月中起雙飛，睇好嗰份期權唔值錢，但睇淡嗰份期權便贏到飛起。其次炒波幅擴大一樣可以賺到好多錢。輸錢者係嗰D心理上只炒單邊市而且仍保持牛市心態者。你睇錯市，係唔係好應該輸錢?!至於其他投資策略例如沽股票、買輪，萬一股市再升，响輪身上贏番。如股市下跌，最多輸輪金，沽出股票回籠資金便袋袋平安。去年10月至今輸得最慘係累股票者（Accumulator）。古龍小說有云——最危險嘅地方往往係最安全嘅地方，表面上最安全嘅地方原來就係最危險嘅地方；Accumulators又上咗寶貴一課。市場一向無大小（冇大戶與小戶）之分，只有醒目資金同愚蠢資金之分。愚蠢者可令法國興業銀行輸掉80億美元（資金夠大同時夠蠢，咁大間銀行居然監管不足抵佢輸大錢，又點可以怪神奇小子？就算打輸官司亦不過坐七年監，到時响監獄寫自傳亦可以賺1000萬美元）。

經濟放緩嘅步伐愈來愈清晰，未來90％企業投資將減少，此乃2002年以來首次；最後係軟着陸定係衰退？仲未清晰。股市連跌三個月，熊市一期快完成，唔排除1月22日恒指21709點乃熊市第一期嘅底部，然後進入熊市二期，即喺250天線水平上下10％穿梭，大跳Rock and Roll。呢段日子最好玩係期權（options），請各位好好學習掌握玩期權嘅技巧，响上落市中make a killing！又或者做國際候鳥，天氣寒冷便集體飛去溫暖地方過冬。1997年我老曹部分資金去咗倫敦逃避本港房地產嘅嚴寒，經濟冬天過後嘅2003年又飛返香港搵食。

2007年10月好少人買put期權，當時冇人擔心次按危機（雖然2007年8月已爆煲）、銀行貸款撥備，更冇人提信用卡危機（美國人平均有七張信用卡，共欠債5000億美元）。去年10月至今美國嗰邊唔少put期權獲利由89％至280％！問題在乎你係咪少數？當大多數人興高采烈時做沉默嘅少數孤獨上路。期權涉及固有值（Intrinsic Value）及時間值（Time Value），所謂固有值即依家該股市價及行使價之差。例如in-the money（行使價較市價低或高，視乎put或call而定而產生一定價值）、out-of-money（行使價較市價低或高，視乎put或call而定而毫無價值）。大部分期權都冇固有值，只有時間值。例如ABC值40元，行使價35元嘅call固有值5美元，但行使價35元嘅put係冇固有值。到期時如ABC仍喺40美元以上，put便輸晒，call贏錢；反之，到期時ABC值30美元，put便大賺，call便輸清。外國期權早已極之流行，如你剛開始玩期權時輸錢，請記住「practice makes perfect」。

美股港股都係反彈乏力

1月22日美國宣布減息0.75厘及1月30日減息半厘，支持美股出現兩星期反彈；不過，美股已確認熊市，今次只係熊市反彈。道指至今已反彈6.4％，但仍喺200天線之下。恒指喺50天線之下，可以話反彈乏力。美國已出現負利率，即未來減息空間好有限。過去十天內減息1.25厘，對十年期債券利率一點影響都冇，仲係3.392厘。二年期債券利率跌0.12厘，見2.073厘。估計3月18日聯邦基金利率見2.75厘機會接近70％，4月29、30日見2.5厘機會達46％。

响跌市中最多聽到嘅講法係便宜及抵買，資產價格一旦回落10％到20％，人們便直覺上覺得抵買。2月港股相對去年10月自然便宜，但未來方向係點？50天移動平均線已在回落中，擔心好快跌穿250天線，出現熊市確認訊號。恒生指數由1月22日嘅21709點，反彈至今未重返50天線之上（26689點），即上月份下跌裂口至今仍未補回，短線可睇好，但中長線睇淡。

本欄一直堅守「當形勢有利自己時才投資」，而非「因為我有錢便投資」。去年10月股價被炒到半天高，入市概念只係希望搵祖國同胞做二傻，當港股直通車開唔出，港人仍然唔肯離開。A股O高係建基於大量A股仲係非流通（供應不足）而非物有所值；反之，本港H股卻同全球接軌（唔買H股者可買美股）。一旦二傻唔嚟，港人便做咗傻瓜，外資又一次飽食遠颺。股市形勢有如十二人打麻將，原先有十六個人共四枱麻將，四個贏錢割禾青離開咗，留下十二個人湊成三枱麻將繼續打落去，由於贏家已離開，呢十二個人繼續打落去結果只係輸多贏少。

紐約出現底特律現象

各位係咪有興趣catch the falling knife ? 波浪理論大師普切特（Robert Prechter）認為，一個「沉靜的崩毀」由2000年開始，唔受控制嘅信貸膨脹及美元下跌將全球經濟制度推向極危險邊緣，因此只建議揸瑞士法郎、紐元同澳元。Jim Chanos建議拋售電視股，佢相信五年內互聯網電視將佔重要位置，令大部分電視台收視率狂跌。超級大淡友Prudent Bear Fund經理David Tice認為，道指可再跌5000點，唔少股份响未來仍可跌60％。因為人人都信聯備局減息可以防止經濟衰退，情況有如女性相信用防皺水可阻止衰老一樣。防皺水或可延長女性青春期，但不能阻止人步向衰老。另一超級大淡友Euro Pacific Capital嘅Peter Schiff更警告紐約：小心底特律現象（隨着日本汽車業興起，底特律走下坡），佢擔心歐洲經濟統一（歐羅嘅出現）、中國興起，紐約地位一如六十年代嘅底特律，最光輝嘅日子已過去。

《經濟學人》報道，2000年至今美國人收入扣除通脹係負增長，白人平均減少咗2％、黑人平均減少咗8％；反之，上市企業純利卻大幅上升，即財富更集中响上層社會，唔係中產更加唔係下層，相信香港亦出現類似現象。ARM Reset有如乾柴中出現火花，一旦燒着有排才能撲熄，還債成為資產嘅deflator，正在產生作用。

美元長息大方向係走高

1月效應：每年1月股市如回落，全年以跌市結束機會十分大。1月22日開始嘅反彈可維持幾耐？好難喺事前估計。

大趨勢係三十年期債券利率由1980年中嘅14厘回落到2003年中嘅4厘。其後一直响4厘到5.25厘之間上落，代表美元長債利率已見底【圖】，未來美元長息大方向係向上而非向下。

日本廣播協會報道，至2007年12月31日止，日本各大銀行响次按損失6000億日圓（56億美元），其中以瑞穗金融損失最大，約3450億日圓；其次三井住友損失990億日圓、三菱UFJ 550億日圓、青空銀行365億日圓……。

2008年至今內地升幅最大嘅食物包括雞蛋售價升38％、牛奶升30％、豬肉升28％。對剛踏上中產階級嘅一億中國人口而言，打擊都幾大。至於全國十三億人口，更要面對穀物價格升至十七年新高。2008年百物騰貴再遇上大風雪，中國人嘅命運真係幾悽慘。

中國通脹壓力集中喺食物同能源上；反之，美國樓市及股市卻出現通縮，業主嘅ATM唔再有款可提。國會計劃退番1500億美元畀美國消費者，鼓勵佢地繼續消費。展望未來，中國食物同能源價格仍可再升；至於美國一個長達六年嘅信貸膨脹，冇可能响三個月便消失。喺金價出現RSI背馳嘅今天，去邊度搵銀？依家石油出口國仍大把錢，到處搵投資機會，尤其係新興國家項目，反而對美國金融機構興趣在減少中（2007年主權基金投資美國，大部分已扮蟹）。我老曹同意Peter Schiff嘅分析，便係美國戰後稱霸全球到六十年代已到高潮，八十年代由列根總統引發嘅中興係透過現代科技、最優秀頭腦，加上華爾街神乎其技嘅資本，重新allocate，帶來美國接近三十年繁榮期。得益嘅只係美國上層社會，中產及下層社會由1980年至今生活未見改善。

資本主義遵守森林法則，市場唔係動物園，邊D動物唔keep fit而變肥，最後命運只有被吃掉。1982至2007年美國經濟只係變肥而非keep fit；反之，前共產國家卻痛定思痛，努力keep fit。紐約係咪有一天受香港同上海威脅，一如今天嘅底特律受日本汽車威脅，又有邊個事先知道。

資訊科技令智力資本大幅提升，令流汗勞動價值不斷降低，但任何事物都有一個極限，所謂物極必反。次按危機嘅出現係咪代表智力資本世界面對大調整，反而流汗勞動成本開始上升？2000年科網泡沫爆破，2007年透過電腦製造出來嘅大量衍生產品係咪亦進入萎縮期？美國嘅聰明腦袋進入老化期，例如蓋茨及楊致遠。兩個老化咗嘅聰明腦袋加起來，能否產生一個年輕嘅聰明腦袋？微軟點解花440億美元收購雅虎？目的只係唔讓Google支配互聯網搜尋地位；至於微軟加雅虎係咪可以鬥贏Google？我老曹嘅睇法微軟只係「a man with two hats」（一個人同時扮演兩個不同角色），唔見得討好。微軟以軟件取勝，雅虎搜尋網址能力強於Google，成為微軟一分子後可帶來乜嘢改變？除咗Google受威脅外，見唔到為微軟帶來乜嘢好處。

美國中產階級已頂唔順

美國軍費佔全球軍費開支50％，為攻打阿富汗同伊拉克，花掉1萬億美元，國會估計最終使費17000億美元，National Bureau of Economic Research估計2.2萬億美元；Congressional Join Economic Committee估計3.5萬億美元。幸好2008年係大選年，不然布殊呢個牛仔可能已攻打伊朗。大家明白美國經濟放緩（或衰退真正理由）係窮兵黷武，美國將有一億一千七百萬美國人收到一張800美元支票，能否因此而令經濟好轉？美元响過去七年失去45％購買力（如以金價計，跌幅更大）。美國勞工階級工資响過去三十七年根本上冇實際上升（扣除通脹），呢番言論係勞工部長Robert Reich接受《金融時報》訪問時所透露，美國人消費上升來自太太出外工作或工時較長，甚至將物業按上加按及利率由1980年高峰回落。未來你說怎麼辦？美國中產階級已頂唔順（coping），因為已較歐洲人每年工作多三百五十小時，甚至較日本人更勤力。未來不能再透過物業加按每年提款2500億美元，可能被迫減少消費，美國進入downsize時代，一如1990年嘅日本人。最後美國人將明白：致富之道在於儲蓄、自我增值及投資，而非消費。漫漫長路由2007年10月開始。

從技術角度睇，道指反彈後已十分接近阻力區12760點，1月22日由11634點嘅反彈，响本周內完成（例如2月8日）機會好大。我老曹仍未見到衰退隧道嘅盡頭或黑暗中嘅曙光，小心「抵買抵買、愈買愈低」。技術上睇，道指最大阻力响13350點，即前面仍係陷阱處處。聯儲局為減少信貸收縮壓力，上周五宣布2月11日至2月25日拍賣債券，為銀行再提供600億美元短期貸款（聯儲局12月至1月已提供1000億美元短期貸款畀銀行）。商業部公布，2007年私人建築商响住房項目開支減少18.3％，整個建築業只減少2.6％，係1993年以來最大下跌一年。1月份打工仔收入上升0.2％，至17.75美元一小時（去年全年上升3.7％）。

中國鋁業（2600）同美國Alcoa聯手，以140億美元入股Rio Tinto，目的係對抗BHP Billiton Ltd敵意收購。Rio响倫敦股價升17％，見50英鎊，如BHP Billiton放棄收購，相信中國鋁業唔會全面收購，理由係工業原料價格極有可能已見頂。隨着美國經濟放緩，工業原材料價格大幅上升嘅可能性唔大。BHP提出收購只係以股換股。以三股換一股計，Rio約值1260億美元。來自雷曼兄弟嘅消息透露，中鋁購入Rio 12％代價每股接近60英鎊，較上周四收市價49.56英鎊高出21％，令周五Rio股價一度見58英鎊，BHP股價亦上升14％；即BHP出價以市值計接近每股50英鎊。如BHP收購Rio成功，將成為一間市值3170億美元公司，可控制全球銅、鋁、鐵及煤資源價格；如BHP將收購價提升到四換一（令Rio股價高出60英鎊），中國鋁業只有再出高價，不然好難阻止收購成功。至於Alcoa近日以20億美元出售2001年購入嘅中鋁股份獲利18億美元，因此幫拖，唔係主力；中鋁資金來源主力係中國發展銀行（即國家）。

BHP投資顧問以高盛為首，加上花旗、滙豐及UBS；Rio以摩根士丹利為首，加上羅富齊、麥格里、瑞銀、JP摩根、德銀、雷曼兄弟及中國國際投資公司，呢場真係世紀之戰；中鋁呢招到底係逼BHP出高價定係志在拆散野鴛鴦？我地不妨睇落去。

內地保險公司首季純利大減

2月1日中國保險監督管理委員會話，呢場雪災，中國經擠損失326.7億元，保險業將賠35.19億元。民政部最新數字顯示，至1月31日雪災直接損失為537.9億元，保險公司已接到報案五十萬五千件，預賠損失35.19億元，但數字仍在上升中。中國人保系統話，已接報案十一萬四千件。平安保險話，3000元以下案件，現場定損失後立即付款。一場雪災令2008年第一季內地保險公司純利大減。

內房股經過暴跌後，係咪重現建倉良機？國金證券分析員曹旭特認為，內房股2008年O已降至二十至二十五倍，重現投資價值。中投證券分析員李小明認為，A股暴跌，內房股反應過度，出現建倉大好良機。海通證券更睇好北京、上海兩地寫字樓物業，因回報率有9.85厘，係全球前列（全球平均係4.75厘）。有9.85厘保障仲怕乜嘢？襄城證券認為，2008年中國地產業整體而言係投資機會，但不確定因素仍多，因此應緩步慢行。

趁豬年結束前，最後同大家談豬。2006年中國吃掉五億三千萬頭豬（美國一億頭）。由於出現口蹄症，政府唔准民間屠宰，必須由法定屠房以防止病豬流入市場，咁樣一嚟，養豬人家減少，令2007年豬價大升（另一因素飼料價格亦上升）。政府發急了，宣布養豬業免稅，即2008年起連25％企業稅亦唔使畀，相信2008年養豬人家大增。如無意外，2008年下半年豬價有機會因供應過剩而大跌，睇嚟豬肉價格唔高企得幾耐。