曹仁超 - 貝南奇實驗失敗？ 2008-02-02

2008-02-02

2月1日，周五。恒生指數升667.84，收24123.58；成交1194.4億元。2月期指繼續高水，收24213點，升719點。中石油（857）升6.9％、中海油（883）升7.7％、中國海外（688）升12％、工商銀行（1398）升9.7％，報5.08元；港交所（388）升6.16％，收170.7元，但恒生（011）跌3.4％，收148元；建行（939）升8.53％，報5.85元。北京首都機場（694）下挫7.82％，因向母公司購買新建航站，估計短期純利急跌。華人置業（127）股價跌17％，因今年1月手上股票市值只有48.1億元，較去年12月底減少33.4億元。

滬深三百指數跌1.05％，收4571.94；本周滬深指數跌10％。今天上牌嘅中煤能源A股收21.92元人民幣，較招股價高30％，成為一年內表現「最糟糕」嘅首日上市股份；1月28日發行價16.83元，已較當天香港收市價低18％。中煤能源成為2007年在上海和深圳首發上市八十九家企業中股價漲幅最小嘅一間。

煤價長期仍可看好

中國係全球最大產煤國，其中61％煤產用作發電，亦係近年空氣污染嘅源頭，2006年對能源需求上升8％（係全球升幅2.4％嘅幾倍），並以每周建立相當於兩座五百 Megawatt火力發電廠嘅速度上升。到2030年，中國煤電需求將係目前嘅三倍，中國本身生產嘅煤將無法應付……。2020年中國將用去全球每年煤產嘅50％。過去五年中國煤價上升三倍，未來五年中國煤價如何？中國三大煤礦在山西、陜西及內蒙，用煤卻在北京、上海及廣東，中國政府正努力建立鐵路運輸將煤由產區運到用區。去年中國由煤淨出口國轉為煤淨入口國，並向出口煤抽5％稅，入口煤則零關稅。中國入口煤令去年全球煤價上升35％，至75美元一噸。雖然大行認為煤價短期見頂，但我老曹認為長期仍可睇好。

瑞銀亦認為中國煤價仍可上升，政府管制價格機會唔大，因內地煤價平均52美元一噸，國際價格100美元，即內地煤價仍未同國際接軌，政府希望每年上升10-15％，係造成內地煤供應短缺嘅理由。

新興市場拋售力量減弱

大摩指出，截至1月30日止嘅一周內，資金由新興市場淨流出29億美元，較上一星期107億美元大減，睇嚟拋售力量在下降中。自11月8日起大摩睇淡，到1月31日已改為正面，因為唔少股份已到咗物有所值水平，過去因基金被贖回而造成嘅破壞，踏入2月份開始重建。

麥格理認為，內房股過去平均跌幅46％，係咪有D過分？目前市價低於NAV 34％，以歷史角度睇進入偏低期，建議overweight內房股，如雅居樂（3383）、中國海外（688）、華潤置地（1109）、碧桂園（2007）、富力地產（2777）、香港建設（190）、合生創展（754）、新世界中國（917）、上海復地（2337）、瑞安房地產（272）、盛高置地（337）等。

高盛話，中國人行在網上向全國銀行及分行發布加強信貸撥備去對付次按風險，未見提及放寬銀根。高盛估計，1、2月份中國通脹率甚高，人行冇理由在此時放寬銀根，認為只係市場誤傳；不過，現水平內房股亦回落到有吸引力水平，有一博價值。高盛認為，H股短期仍面對壓力（雖然1月已經調整21％），反彈只是技術因素，例如超賣，理由係A股進入回落周期。

美股已反映美國房價回落、消費增長減慢而拖低美國GDP增長率或會出現一季甚至兩季負增長，2009年才進入緩慢復甦期，但全球資金仍充沛，股市出現反彈毫不為奇。

值得留意嘅股份有蒙牛（2319），目標價34元；嘉里建設（683）目標價80.8元、國美（493）目標價22.6元、深圳高速（548）目標價10.6元、江蘇寧滬（177）目標價8元、中信銀行（998）目標價6.81元、金鷹商貿（3308）目標價6.78元、招商局國際（144）目標價49元、濰柴動力（2338）目標價69.4元、希慎（014）目標價23.6元。

貝南奇已有D歇斯底里，陷入「瘋狂減息狂躁症」。佢可能唔明白經過五年借錢消費嘅美國人不但冇錢，連信貸能力都失去，無論利率幾低亦無法增加消費。擔心呢次實驗可能證明James Hamilton經濟大師嘅理論正確（高油價引發衰退，而非高利率）。

聯儲局減息半厘，但惠譽卻將 Ambac及MBIA降級，即美國同時出現利率下降及信貸收縮（而非利率下降、信貸放寬）。Oppenheimer分析員Meredith Whitney估計，美國金融機構今年仍須撥備700億美元。美林證券分析員Rosenberg指出，1930年代美國唔係高息期，日本九十年代亦唔係，而係信貸收縮引發資產通縮而產生衰退甚至蕭條（連續兩年GDP負增長）。貝南奇係呢方面專家，相信唔使別人教。

金價短期將見頂

既然三十年代聯儲局減息至1厘無法阻止通縮出現，九十年代至今日本零利率一樣無法阻止通縮出現，點解貝南奇時代可以？

1月日圓兌美元升值5％，係2001年以來最大升幅，瑞郎升4.7％；兩者係最多利差交易嘅項目，代表唔少人在1月份拋售股票，清還日圓及瑞士法郎欠款。

1950至06年美元發行量上升三十倍，令美元購買力在五十六年內下跌97％。簡單D講，1950年百萬富翁（以美元計）相等於今天3000萬美元嘅購買力。以黃金計，1950年35美元一盎斯，目前合理價1050美元；換言之，黃金漸漸接近合理價，唔再偏低矣，加上同RSI背馳，金價距離短期見頂日子唔遠【圖】。

1987年格蛇上任時，美國消費者借貸10萬億美元；今天美國消費者借貸37.3萬億美元，係GDP 310％，相等於一位年賺10萬港元嘅打工仔欠卡數30萬元，算唔算嚴重？但美國政府叫大家放心，請各位繼續借錢消費，不然美國經濟便會陷入衰退。如果係別國，相信該國貨幣滙價早已崩潰，但唔使怕，美元係各國嘅外滙儲備，例如日本有9000億美元外滙儲備、中國11000億美元。過去六年美元貶值，令中國同日本在外滙上損失45％；中國同日本仍係美元滙價最大支持者。

2月小注炒上落市

美國十天內減息1.25厘，加上退稅1500億美元，能否令美國樓價止跌回升？又能否令美國人消費回升？在金融業繼續收緊貸款標準下，點樣令銀行增加貸款？原材料價不斷上升，但產品售價無法上調，又如何令企業純利上升？股市一旦反彈完成，中長線方向又係點？今時今日在股市生存之道係唔再做投資者，改做trader，在上落市中搵食。股市經過大跌三個月，踏入2月份股市可以玩上落市。如何在上落市中勝出？答案係一分啟示九分勤力，銀碼愈細愈冇心理壓力，不感情用事係第一步，利用超賣區入市係第二步，多做功課係第三步。唔係被恐懼感支配自己，反而利用群眾的情緒去獲利，2008年學習做一個成功的trader。

羅拔遜八十年代、九十年代與索羅斯齊名，各位有冇印象？1998年佢旗下嘅老虎基金曾攻擊本港聯滙制度，被特區政府動用千億元對付，事後特區政府聲稱擊退咗國際大鱷（真相係在最危急之際長期資本管理出事，令聯儲局大量注資救市）。1998年老虎基金失去4％資產，1999年失去19％，在2000年解散。羅拔遜將老虎基金由800萬美元炒到1998年攻擊本港聯滙時嘅220億美元，認真犀利。

羅拔遜孕育老虎仔

解散老虎基金後，羅拔遜自己唔再投資，改為扶植年輕一代。佢到各大學找尋有潛質嘅年輕人，協助佢地成立基金，例如John Griffin嘅Blue Ridge Capital、Lee Ainslie嘅Maverick Capital、Andreas Halvorsen的Viking Global、Steve Mandel嘅Lone Pine Capital。其中最成功係Bill Hwang嘅Tiger Asia及Chase Coleman嘅Tiger Global，前者連續七年每年增長40.4％，後者連續七年每年增長43.7％。羅拔遜與這批年輕人分享概念，但唔負責管理，只係最先資金提供者。最近佢接受《財富》雜誌訪問，承認2000年至今財富上升404％，單位2007年一年已上升76.7％。《福布斯》雜誌估計羅拔遜嘅個人財富13億美元（有人估計佢個人財富已達50億美元）。換言之，2000年老虎基金解散，但「老虎」精神並冇死亡，反而孕育出大量「老虎仔」，透過三十四個基金大約管理260億美元財富。你明白每年上升40％嘅威力嗎？即1萬元投資在七年內變成10萬元，非常犀飛利。

過去七年股票市場財富嘅得失數字十分驚人。有人made a killing，更多人lose the shirt，請唔好再自欺欺人話自己在投資，其實人人都希望成為一個成功的trader！例如知道何時進出股市，以做一個成功狙擊手？

港股恒生指數在1月22日跌穿250天移動平均線（由於50天線在回落，因此只係熊spring）。由21709點反彈到1月25日見25243點後，至今仍無法重返50天線（26676點）之上。技術上睇，後市在250天水平上下10％上落。

令人擔心反而係滬深A股可能進入較大幅度回落期（強勢股市最後回落）。