曹仁超 - 中國走回控制之路

2008-01-29

1月28日，周一。恒生指數跌1068.76，收24053.61；成交額降至1077億元。即月期指高水，跌779點，收24296點。股市波動太大令大戶亦唔肯接盤，形成近日場外期權交易大減，輪商無法利用場外期權對沖，只有透過買賣普通股去對沖，反過來令本港恒指波幅較其他市場更大。

今天富士康（2038）下跌11％，見12.96元，因荷銀調降評級；華能電力（902）跌7.6％、大唐發電（991）跌5.1％，因澳洲港口基準煤價升3.9％，報93.35美元一噸。

發電量減少是天災亦是人禍

內地大風雪令滬深A股跌6.81％，收4731.88。國航、南方航空跌停，華能國際跌8.8％、國電跌7.6％、上海電力跌6.6％，上海機場跌7.4％、寧滬高速跌8.4％；招商銀行跌6.1％、民生銀行跌7.3％，寶鋼跌6.6％、馬鋼跌9.5％，國壽、平安保險跌停。

內地煤及電力短缺情況又再浮現，加上中央為打擊通脹唔准加電費，卻遇上五十年難得一見大風雪，令中國超過一半省份面對嚴重電力短缺。中央已下令各省市優先供應電力畀居民，令D耗電量大工業受影響。惡劣天氣係理由之一，但電費及天然氣價受限制，反而煤價及油價卻上升，相信與發電量減少不無關係。到底係天災抑或人禍？好難分曉。

另一因素係肉價貴。無論豬肉、牛肉、雞肉皆漲價，政府已下令臨時物價管制，加上惡劣天氣，唔少大城市又再面對供應短缺。

今年中國經濟能否同美國兩不相干？呢個希望似乎愈愈微。

瑞信上周市場焦點：「The Power of Fear」認為，市場擔心衰退呢個咒語未因聯儲局減息0.75厘而解開，反因大幅減息而加劇恐懼感（例如點解要減息0.75厘？）。市場短期升降完全由情緒支配。美股進入熊市，過去美股熊市平均跌幅25％。依家唯一睇好理由係超賣，不過反彈之後大市只會進一步下跌，因為今年美國樓價繼續回落。改變大市方向除需要基礎因素外，心理因素亦好重要。如本周美國減息半厘，相信本港亦追隨，令優惠貸款利率降至5.5厘至5.75厘。至於樓按係咪追隨減息至2.8厘，至低於CPI升幅3.8％？未能肯定。

香港去年12月份零售表現十分好，因失業率跌至3.4％，加上樓價上升及去年9月至今減息。外圍因素影響下，1月份零售業會否繼續向好？以數字計，相信仍較2007年1月上升，因2008年春節提前。

鋼鐵將成國際商品

至1月23日止呢一周，亞洲區離岸基金流走資金共47億美元，較去年3月第一個星期因日圓利差交易而流走資金多15％，其中又以中國同印度最勁；馬來西亞係少數仍有資金淨流入地區。

中國民航總局宣布今年3月內地機場大改革。美蘭機場（357）減費10％，北京及上海卻加費。國航（753）及東航（670）降落費將上升，而南方航空（1055）所受影響有限。今年3月起各航空公司亦可畀國際機票最高40％折扣，以加強競爭力。花旗將美蘭機場目標價訂11.6元、國航10.2元、東方航空7.5元、南方航空7.95元。

花旗亦推介中保國際（966），估計去年每股獲利0.5元，較2006年上升35.3％，O三十五倍，目標價22.97元。長江基建（1038）估計去年每股獲利2.43元，上升49.5％，O十一點三倍，目標價31.5元。並下調建滔（148）盈利預測，估計去年每股獲利2.91元，減少65.7％，未來O十一點三倍，目標價40.3元。建滔積層板（1888）估計去年每股獲利0.62元，升13.4％，未來O七點四倍，目標價5.9元。

中國銀監會發現有1190億美元違規貸款（8500多億元人民幣），已懲罰一百一十七個銀行經理，一萬二千六百八十七人被罰款。報道指從七萬九千二百間銀行中共搵到四百四十五宗違規貸款，較一年前減少58.4％；至於點樣處理違規貸款則木宰羊。

繼杜拜黃金及商品交易所成功推出鋼期貨合約後，2月份倫敦金屬交易所亦將推出鋼期貨。繼石油之後，鋼係全球交易量最大商品，年消耗量十四億噸，以每噸600美元計，金額十分驚人。LME最先推出十五個月期貨（2009年6月），估計對鋼鐵股影響甚大。鋼最大市場係鋼片，約五億一千萬噸一年，其中一億九千萬噸轉為鋼筋、一億三千五百萬噸轉為市售鋼材、一億三千五百萬噸轉為線材，五千萬噸用於建築項目。估計一半以電爐生產，材料係廢鐵，其餘係鐵礦砂用熔爐生產。LME將以六種唔同品質鋼片作為交易單位，將鋼片轉化為其他產品成本約65美元一噸。芝加哥商品交易所亦計劃加入，相信好快鋼鐵會成為國際商品，有助鋼鐵業經營。

路透社1月28日進一步修訂2007年第四季標普五百純利負增長17.6％（上周估計係負增長10.9％）。2000年3月24日標普五百指數由1552點下跌至2002年10月10日768點，跌幅50.5％【圖】，當年冇經濟衰退，只有軟陸。美股熊市去年11月開始，極有可能一直伸展到2009年。難道整個2008年都唔投資？點解唔學習Paddle strategy，實行用炮艇打航空母艦？利用Put期權或窩輪跌市中獲利。期權及窩輪透過槓桿作用，可達到一賠十或更大回報，去年10月如用2美元買花旗2009年1月到期Put，依家已值20元，一蚊贏十蚊；當然，睇錯市亦可以輸清2元。不過並唔重要，因為玩窩輪（或期權）資金只佔總投資資金10％，即使輸清對整個投資組合影響亦唔大，如贏出便一賠十，因跌市速度一定較升市快。去年10月買Put者（包括本港國壽甚至期指，都贏到開巷）。另一Paddle strategy就係將檸檬變成檸水！去年11月至今經過三個月跌市，唔少二線股跌到七個一皮，成個檸檬咁款。由於股價實在太殘，只要小小利好因素，便可反彈100％或以上，立即由檸檬變成檸水（好好味）。如你只動用全部投資資金中10％收買爛銅爛鐵，隨時可將檸檬變成檸水，賺佢一個double！第三個Paddle strategy就係利用超賣，例如上周二恒指21709點入市，到周五25243點離開，一星期內獲利16.27％。利用快買快賣又一次偷襲成功（用資本10％去炒賣期指）。

炮艇投資法以小博大

毛澤東戰略：敵進我退、敵退我追，實行打游擊。用三幾十個小鬼（二十歲以下小子）到敵方陣地搞破壞，萬一失手亦只損失三幾十個小鬼，但隨時可將敵方軍火庫炸掉。

熊市去年11月已開始，極有可能伸延至2009年，各位除採用「炮艇投資法」以小博大，包括玩Put或跌得幾殘二線股身上找檸檬，亦可實行逆市投資法，同股市打游擊。當別人愁眉苦臉時，你仍然古靈精怪。

事實上，美國有一位仁兄利用呢個方法，由2000年起步時10萬元到2007年結束時賺284萬美元。Pretty good！需要只係勇氣及分析能力，以及一DD資本。

過去七年如你冇將資本double、triple或quadruple，你一定係冇2000年買金、2002年冇買資源股、2003年冇炒復甦概念……以及2007年10月冇利用港股直通車消息國企股身上賺一大筆。上述項目對閣下而言風險可能太大，下一個機會極有可能係農地。請嘗試到澳洲、紐西蘭甚至東南亞國家搵搵。通常農地上升周期長達十五至二十三年，最近才開始起步。冇時間？咁就咪羨慕別人七年內將財富double、triple或quadruple，乖乖咁做個普通人。

去年9月，瑞銀認為今年出現衰退（GDP連續兩季負增長）機會高達40％。今年1月22日，瑞銀好肯定今年美國經濟將出現衰退，並估計失業率升至6％、聯邦基金利率降至2.25厘。繼1月22日減息0.75厘後，估計1月29及30日再減息半厘，但已無法阻止衰退出現。

美國國會已批准退稅，每位600美元（夫妻1200美元，另每個孩子加300美元），年收入17萬美元以上者冇退稅；估計支票最快第二季寄出。另外年賺15萬美元以下、資本80萬美元以下中小企業亦獲50％退稅，政府負擔資金420億美元。上述退稅共1500億美元，能否令今年下半年美國GDP回升，形成碟形走勢？即第一季利用減息去減慢GDP增長率下降，第二季利用退稅去阻止GDP進入負增長？

著名財經記者丹尼爾．格羅斯《新聞周刊》提出一個新觀點：美國經濟衰退將成為世界經濟格局一個「拐點」，美國帶領世界時代將結束！

人民幣內貶外升

美國工業產值1894年已居世界首位，但真正成為全球霸主係第二次世界大戰結束前1944年布列頓森林制度建立，令美元成為全球貨幣。五十年代後期關貿總協定（即依家WTO前身），再加上世界銀行、IMF支世界經貿及金融，外自由化、貿易自由化、資本自由化成為三大支柱，透過發展多邊經濟貿易，構成一個以美國制度為核心世界經濟體制。

雖然布列頓森林制度1971年取消，改為浮動率，但並冇動搖美元國際間地位。進入二十一世紀金磚四國興起，才開始動搖「美元霸權」根基。去年8月次按危機極有可能引發華爾街大衰退，各大投資銀行正掀起一股裁員潮，包括花旗、美銀、大摩、美林，甚至高盛、瑞信、瑞銀。呢次由房貸衝擊所引發次按危機，西方金融業何時能走出困境？銀行及大證券行大裁員後，整個西方衍生工具市場將走向收縮，以期度過寒冬。而呢個冬季有幾長？冇人有答案。

中國戰後人口大幅上升，糧食產量卻追唔上，第一次出現糧荒係1960年代初期，中國人均糧食只有二百一十七公斤，並唔夠食；到八十年代初期問題才解決，政府宣布取消糧票制度；到1998年人均糧食達四百一十一公斤。1999年起又再下降，2003年只有三百三十三公斤，2004至07年中央確立「多予、少取、放活」三大政策發展農業，2008年更宣布免除農業稅。農業連續四年增產，但人均收入大幅上升，令中國人有能力吃動物蛋白食品，而生產動物蛋白每公斤肉需要七公斤穀物；再加上2007年美國通過玉米生產乙醇計劃，美國玉米大量減少出口，其次歐盟亦將60％油菜用作生產燃料；去年全球航運費上升80％，農產品商品市場被炒貴晒。中國人面對1960年代以來第二次糧荒，呢次唔係冇飯食，而係食無肉，你說怎麼辦？

人民幣面對「內貶外升」現象。人民幣價國際市場一再升值，但國內購買力一再下跌。去年中國城市平均地價係美國40％，但中國人均收入只及美國人十分一；問題愈來愈複雜。

中國係社會主義市場經濟國家，但改革開放三十年仍要用計劃經濟手段，臨時控制物價，而且臨時措施愈來愈多，從豬肉價格到加工廠工人工資、從飼料價格到能源價格……。控制下家唔控制上家，可以咩？連上家亦控制又點？令人擔心中國又再走向全面控制之路，由控制信貸到控制勞動力成本、控制物價到控制原材料。理由係中國貧富差距日益擴大，依家已出現為漲價而自殺、炒股破產而自殺事件。一場大風雪可令半個中國交通癱瘓，絕對唔係可笑事。

三十年前中國由計劃經濟走向自由市場，依家又用計劃手段去解決社會矛盾。美國經濟已到衰退邊緣，而中國方面正走回計劃經濟之路去解決社會矛盾。第二次世界大戰結束後，世界經濟繁榮三大支柱──外自由化、貿易自由化、資本自由化正受到威脅，最後能否化險為夷？

諾貝爾獎得主蒂格利茲上周瑞士達沃斯世界經濟論壇認為，美國經濟正朝向流動性陷阱（Liquidity trap），即長期債券息率拒絕回應短期利率下降，令信貸繼續收緊，即貨幣政策mechanism漸漸失效，情況有如1990年至今日本。上周聯儲局減息0.75厘，股市反應十分輕微，本周二、三如再減息半厘而股市反應繼續輕微話，便證實流動性陷阱已出現。減息未能阻止美國樓價進一步下跌，到時麻煩便開始，因為過去幾年消費者利用物業加按每年產生7000億到8000億美元用於消費。樓價下跌令加按成為唔可能，即今年消費市場共失去7000億到8000億美元資金，相較於殊仔1500億美元刺激方案實在大好多。蒂格利茲認為，依家美國政府應做事唔係1500億美元退稅，而是點樣刺激就業。