曹仁超 - 滋油淡定原來冇料到

2008-01-28

1月27日，周日。周六我老曹高盛講座講次按危機，觀眾接近四千人，由此可見次按問題幾咁受關注。其實，次按危機去年3月已浮現，當時Countrywide股價一天之內狂瀉56％，點解全球金融市場未見重視，而股市一再炒上直到去年10月？當時市場想法大致有：一、貝南奇有能力阻止衰退出現（例如直升機擲銀紙）；二、即使美國經濟衰退，全球經濟亦唔會受影響，即所謂兩不相干（decouple）；三、信貸危機只影響次按公司，唔會擴大到其他行業。

匆匆減息暴露騰雞性格

但係，點解去年11月起全球股市卻大跌？因為金融市場漸漸發現貝南奇原來真係冇料到，去年3月咁滋油淡定並唔係胸有成竹，而係唔曉驚。1月22日匆匆減息0.75厘，暴露晒其騰雞性格。至於decouple論早已不攻自破，歐洲各銀行原來較美資銀行更加一塌糊塗，例如法興銀行買賣衍生工具上，傳聞該「神奇小子」只損失15億歐羅，董事局成員損失達34億歐羅，董事局卻將個人損失亦一併歸入法興銀行內。呢位「神奇小子」克爾維耶爾年收入少於10萬歐羅，如果冇高層「特殊安排」，根本上唔可能做到呢種事，相信另有內情，例如將個人損失撥歸公司，由「神奇小子」一個晒。

日經平均指數由去年2月26日起回落跌幅31.3％，較美股跌幅更大，何來decouple？

香港雖然有中國照住，去年10月30日起恒指仍下跌32％，但大有後來居上之勢。

依家仍在頑強抵抗只有滬深A股，因為中國市場未向外開放，暫時唔受外圍影響。

歷史早已證明，減息不能阻止樓價下跌，只能減慢樓價下跌速度。各國歷史都證明，每次樓價調整期短則三年、長則六年，更長可達十三年，今年美國樓價即使減息環境下，相信逃唔出一跌命運。最終美國經濟係軟陸抑或係衰退？則要時間去告訴大家，但無論衰退或軟陸，美股跌幅都25％以上。

調整日子與幅度或非常嚇人

道指回落，到1月22日11634點反彈，上周五見12486點又再回落，呢次反彈係咪頭肩頂走勢中後抽【左圖】？用圖表分析指數走勢，出錯率通常甚高，但去年4月至今道指沿頭肩頂走勢運行，仍有參考價值。道指去年8月16日低點12517點，11月26日低點12724點，乃頸線阻力位。道指由去年10月11日14198點回落到今年1月22日，大約失去15000億美元市值，全球股市大約失去50000億美元市值，其中又以金融股、房地產股、航運股及零售股受打擊最大。上周聯儲局減息0.75厘，令股市由1月22日起反彈，管理1260億美元Neuberger Berman投資策略員Jack Rivkin認為，美國企業今年純利將走下坡，擔心經濟衰退下，現水平投資股票變得太危險。索羅斯《金融時報》話，過去六十年超級繁榮（Super boom）已到頂點。去年美國收支赤字相等於GDP 6.2％，即美國吸收全球儲蓄用作消費，去支持全球繼續繁榮，上述情況唔可能長期維持。次按危機令信貸周期進入回落期，擔心呢段日子十分長。索羅斯認為，全球財富重新組合過去幾年早已開始，美國房地產泡沫爆破只係整個重新組合中其中一小部分，人口只有三億美國唔可能繼續佔用全球GDP 30％，第二次世界大戰後美國維持達六十年優勢正結束，美國必須同全人類分享全球財富，情況有如第一次世界大戰結束後英國，再不能雄霸半個地球。上述情況早1966年已開始，不過到1980年列根上台後，佢重建全球對美元信心，再透過經濟全球化，形成過去二十五年全人類儲蓄再次供美國人揮霍，令本已唔平衡世界進一步傾斜。到2007年無形之手發揮威力，財富再次從美國流失，令所有美元者自2002年至今失去50％財富，未來損失唔單止率上，甚至擴散到美國地產及股票。上述調整只開始冇耐，未來日子及幅度可以十分嚇人，各位宜小心。

1980年列根時代利率開始走下坡，到2003年見底回升，2007年9月又再走下坡，但利率唔可能再低於2003年6月。呢次減息可令CPI加快上升，令未來利率好快又回升，由此再引發信貸收縮日子恐怕較家大部分人估計更長。利率期貨市場預期本周又再減息半厘，如減息少於半厘便大件事，因為會令投資者失望；但減息半厘，其實刺激作用有限。情況有如逆水行舟，你必須Keep on rolling on the river，一旦你唔扒，隻艇便向下滑；但即使你努力扒，隻艇亦未必前進道理一樣。近日唔少專家教人博反彈，我老曹一向認為，每次反彈只適宜作減持，一般散戶根本冇本事反彈中賺錢；逆勢而行非人人可為。

恒指由去年10月30日31958點回落至今年1月22日21709點，如反彈前跌幅50％，可見26033點；如反彈前跌幅61.8％，可見28042點。恒指未重返28042點前，港股亦只係反彈市，唔值得高興。股市出現反彈，只因聯儲局突然宣布減息0.75厘引發。2001年1月格蛇製造另一泡沫（地產）去抵銷2000年科網股泡沫爆破。貝南奇能否製造一個更大泡沫去抵銷次按危機？

美國GDP佔全球GDP 30％，而且差唔多係大部分國家最大貿易夥伴。如美國經濟出現衰退，可以唔受影響國家或地區少之又少。亞洲金融風暴可以唔影響美國；反之，如美國出現經濟衰退，除非經濟封閉國如北韓，其他國家或多或少會受波及。美國零售商估計，2008年1月係1996年以來最差一個月，只較去年1月升0.5％；連鎖店至1月19日止銷售只升0.7％。美林修訂2008年經濟保持增長預測，改為睇2008年第二季及第三季GDP負增長，全年GDP只升0.8％（前估計1.6％）。

港美冇可能兩不相干

由1945年至今標普五百指數每次衰退（甚至經濟軟陸），平均跌幅25％。呢次美股回落，至今為止標普五百指數只跌19.4％，似乎未跌夠。至於殊仔1500億美元刺激經濟方案，依家唯一受刺激而上升係金價，而非股市。

留意趨勢改變，才能了解市場方向。如冇基礎分析、市場心理學做背景，單憑技術分析，成功機會有幾大？我老曹未見過一個富翁係走勢派信徒。換言之，走勢只能用作輔助，不應作為主要分析工具。走勢最好用作確認自己分析趨勢方向係咪正確。The trend is your best friend, not chart！

香港同中國股市係咪唔受美股影響？我老曹只跟滬深Ａ股五年，唔敢發表意見（唯一意見係去年初反對大部分人泡沫論）。香港因受率制度管死，根本上無法同美股decouple，只有滯後效應（例如美股先跌，我地遲Ｄ跌）。芝加哥VIX指數進入30點（極之波動水平）後通常有反彈，例如去年8月同11月，2008年1月底反彈似乎已開始，只係反彈幅度一蟹不如一蟹。8月份次係強力反彈，令指數創新高；11月份次反彈力水唔多夠，升幅有限，而且過唔到聖誕；至於1月22日開始反彈，恐怕只係死貓反彈（Dead cat rebound），相信同市場有大量衍生工具有關。1月至今大量資金流入市場博反彈而被綁，上周一法興計數損失55億歐羅，令法興出現資本充足比率不足，要搵新資金入股足可證明。去年12月14日至今衍生市場綁死幾多資金？全球衍生市場總市值15萬億美元。去年12月14日至今有幾多資金衍生市場被蒸發掉？單係法興已損失55億歐羅（我老曹朋友中損失過億港元者比比皆是），好友元氣大傷，1月22日反彈只係淡友平倉離場，睇貝南奇同殊仔有乜絕招，如1月30日發現冇料到，咁就dido。

黃金早有人滿之患

黃金已成為僅餘避難所之一，可惜早有人滿之患，恐怕亦唔太安全。因為今天全球通脹只出現能源及食物價格上（由供求失衡引發）；反而美國樓價同股價回落係通縮唔係通脹（1990至2003年日本及1997年8月至2003年香港可證明）。同1970年唔同，當年推動通脹力量係工資上升；二十一世紀除新興工業國外，所有OECD國家工資升幅極之有限，因此只有內地CPI升幅很大（因工資急升），而本港CPI升幅有限（工資升幅唔大）。

瑞銀估計，今年第二季或第三季美國GDP有可能出現零增長，中國及印度無可避免受影響，因產品及服務最終目的地以美國為主。美國透過大幅減息減慢放緩速度，估計今年美國GDP只升0.8％，令中國GDP增長率降至9.9％、印度8.2％，所引發影響值得留意。最終中國同印度能否唔受美國經濟軟陸影響？請留意近日滬深A股表現。

投資成功首要學習謙卑

花旗推介多金控股（628），估計2007╱08年度獲利4.13億元或每股34仙，O只有四倍；豐德麗（571）去年獲利2.06億元或每股25仙，O 十四點六倍；新濠國際（200）今年獲利3.602億元或每股27仙，O 三十四倍；信德（242）去年獲利7.78億元或每股34仙，O 三十二點九倍；銀河娛樂（027）目標價7.48元。該行理由係生意淡薄不離賭博；唔通今年生意難做，賭場會特別興旺?!　　Markets are never wrong, opinions are ! 此乃李佛摩1890年名句。佢曾經一百多年前賺進數千萬美元，然後又失去，再賺進數百萬美元又再失去，最後決定自殺，理由係佢痛恨自己唔遵守自訂守則：follow the trends。佢因為成功而變得過分自信，聽信朋友及情人貼士而失去一切，犯《吳起兵法》所講：五戰而勝之師，乃未來全軍盡墨之兵！朋友，去年10月你係咪亦變得過分自信？如你仲年輕，唔使怕，李佛摩一百年前亦賺過數千萬美元又失去，之後再賺回數百萬美元……。

我地應從佢身上學習追隨趨勢，唔好過分自信。乜北角畢非德、元朗股神、牛頭角股聖都係廢話，要投資成功首先要學習謙卑，其次係唔信貼士只信歷史。祝大家鼠年「上落平安」！