曹仁超 - 250天線支持區

2008-01-17

1月16日，周三。恒生指數跌1386.93，跌幅為歷來第三大，收24450.85；成交1451.4億元。1月期指跌1019點，收24711點，高水，代表大市短期內出現反彈。　

滙控（005）跌4.8％，見115元，係2001年9月21日以來最大跌幅，主因係高盛將目標價由過去119元下調至114元。

中國遠洋（1919）跌13％，見16.38元，係去年8月16日以來最大跌幅；中海集運（2866）跌11％，見3.57元；廣船（317）跌11％，見30.9元。

港交所（388）跌7％，見172元；信置（083）跌4.7％，見24.5元；和黃（013）跌4.2％，見79.4元；世房（813）跌6％，見16.2元。

上海石化（338）跌6.8％，見3.86元；儀征化纖（1033）跌7.9％，見2.21元；中石化（386）跌6.8％，見8.94元。

滬深A股下跌2.7％。上海期銅跌4％停板，鋅也跌4％跌停。中國人行宣布再次提升存款準備金率到15%，1月25日生效。

美金融機構須為次按再撥備

根據穆廸投資服務公司美國SIV債券市值由去年7月至今已下跌53%，至於SIV持有機構有冇作充足撥備？你話呢！換言之，今年上半年金融機構仍須為手上次按債券作進一步撥備嘅可能性高過60%。

美國紐約長島住宅樓價雖然唔跌，但成交減少25%；中價樓則跌3.2%，至42.5萬美元一間，高價樓仍升6.4%，低價樓下跌8.7%，至21.02萬美元一間。證明响衰退中豪宅抗跌力最好。

PIMCO主席相信，聯邦基金利率將由5.25厘減至3.25厘（甚至更低），因為美國經濟較一般人估計中差，並已接近衰退邊緣；反之，全球經濟仍相當健康。2002至07年美國經濟繁榮係建基於資產膨脹（asset inflation），去年8月次按危機浮現後，美國將有一段困難嘅日子。世界經濟或多或少受美國影響，尤其係財務方面。所謂「影子銀行體系」出現收縮所產生嘅影響將以年為單位。除此之外，環球經濟仍健康，例如農產項目由去年10月11日至今升幅超過19％（同期道指下跌超過10％），其他包括金價及銀價。

JP摩根大通宣布第四季純利減少34%，只有29.7億美元或每股86美仙，營業額上升7%，至173.8億美元；信貸虧損撥備增加25.4億美元。

香港強積金去年12月平均虧損0.71%，全年回報15.93%；股票基金12月虧損1.22%，全年回報25.19%；債券基金虧損0.26%，全年回報5.27%；混合型強積金12月虧損0.71%，全年回報14.98%。可以講表現有點令人失望（資料來源LIPPER）。

《紐約時報》報道，美國企業已大幅削減開支，由連鎖士多、信用卡公司到消費者信心調查都指出，12月起零售數字令人失望，再加上花旗宣布今年裁員二萬四千人，令今年消費者信心進一步受打擊。

英國超市Tesco公布聖誕節銷售只上升3.1%（而非事前估計嘅4.1%），係繼馬莎百貨之後另一間宣布銷售額升幅較估計差嘅零售企業。睇嚟英國零售市場亦開始走下坡。

中國GDP估計今年第一季開始放緩（去年12月新接訂單係近五個月最少，代表未來出口增長率減慢）。今年GDP增長率將逐步下降至8-9％（2007年11.3％）。

跌市中揀股有一定困難，加上內地生產價格指數上升，令製造業飽受壓力，內銷市場至今仍在建立中，只佔企業總銷售額唔太重要嘅位置，內地房地產又面對宏調措施。不過，中國人均收入正步入由3000美元大幅上升期，即投資高增長期，情況有如八十年代香港。

英特爾第四季純利上升51％，但分析員仍未滿意，令股價响場外交易下跌15％，引致今天本港科技股亦面對大拋售。

強力反彈隨時出現

美國經濟受衰退論困擾，股市大幅回落，花旗、貝爾斯登等目標價一再被downgrade，業績公布須為呆壞賬作大量撥備，令唔少投資者進入貧窮之門。另一方面，一樣有唔少股份未受上述因素影響，股價繼續向上爬，即今年揀股變得愈來愈重要。踏入今年1月真係跌嘅日子多、升嘅日子少。一日之計在於晨，一年之計在於春。1月效應證明，每年1月如上升，有65％當年收市指數係上升嘅；如1月係跌市，有65％當年收市指數係回落。最強大支持位係250天移動平均線，相信在此水平出現另一買入點，因為今年全球仍在減息（中國例外），加上流動性仍過剩，過去五年所產生嘅財富十分充足（尤其係香港）。股市一旦進入250天線支持區，一次強力反彈隨時出現，因為投資者唔甘心收取咁低息。

11月至今對沖基金已受傷（部分更宣布破產），引發信貸收縮（credit crunch）。專家估計，將有三分二對沖基金可以生存下去，因此第三次減息如肯減半厘，仍有作用。支持股價升降嘅係公司業績，邊D企業响2008年純利升幅大於2007年？就係投資對象。股市經過11月、12月同1月回落，唔排除2月（或更早）出現強力反彈。可以留意嘅股份包括生產LCD、HD及大熒幕電視機公司，因呢類電視機需求好勁；其次係電子相簿生產商、機頂盒生產商等，仲有GPS衛星通訊系統（可安插响手機內隨時查地圖，知道附近有乜嘢餐室、戲院等及幫助駕車）。未來一年只要掌握得好，相信一樣可以找到Money-Doublers，但唔使心急。

根據美聯（1200）資料，過去一年澳門住宅交投量上升24.9％，共二萬一千多間。升幅最大係豪宅由每呎4500元升上10000元或以上。美聯對今年澳門樓價仍抱樂觀睇法，理由係2008至2010年澳門住宅單位供應量只有一萬一千四百間，無法滿足需求。去年約20％澳門物業由非澳門人買去（豪宅佔30-50％）。今年澳門人均收入上升17％，令澳門住宅亦有上升空間。2005年澳門住宅供應量約三千間，2006年三千間，2007年三千四百間。去年租金上升28％後，租金回報率有4-6厘；豪宅租金升30％，回報率有3厘。近日部分澳門人轉向珠海購買住宅博人民幣升值，形成澳門住宅進入消化期，估計消化後仍有力再升。瑞銀建議今年澳門住宅樓價可進一步睇好，而投資响澳門有物業嘅上市公司。

道指頭肩頂頸線已跌穿

道指用咗去年大半年時間完成頭肩頂，最近頸線已跌穿，加上花旗周二公布第四季虧損98.3億美元，而且去年12月零售數字令人失望。Louise Yamada Technical Research Advisors LLC行政總裁認為，美股五年牛市已於去年10月11日結束，經過三個月牛、熊對峙後，熊明顯佔上風。換言之，美股熊市去年10月11日已開始，進入一浪低於一浪嘅日子，每次要出現新低才可入市博反彈，因為道指响可見將來唔會超過去年10月11日高點14198.10。至於底部喺邊度？由於熊市只開始三個月，依家言之尚早【圖一】。

Windham Financial Services主要策略員Paul Mendelssohn則認為，更有代表性嘅標普五百指數分別响去年3月14日1363.98及8月16日1370.60反彈，依家上述兩低點未破【圖二】，因此仍未肯定熊市已來臨，除非此一水平失守才可確認。何況道指由10月11日至今回落不足12％，未足夠確認牛市死亡（一般跌幅20％或以上）。佢反而認為美股進入整固期尾聲，應趁低吸納。

有關牛、熊之爭，我老曹認為十分無謂。根據我老曹嘅經驗：一、圖表分析可用於個別股份，不可用於股市指數，因此道指係咪形成頭肩頂，根本上唔重要。二、依家經濟已相當複雜，再用牛熊理論作投資者明燈已經過時，市場一早已牛熊共舞，投資策略係Bad market, good stock picking。揀股唔炒市，以行業盛衰取代大市方向，並主張買股要買龍頭股。

何謂理性投資？一係投資知識，二係投資態度，三係投資方法，缺一不可。所謂投資知識，包括自己嘅風險承受能力、資金流向、選擇行業及股份及如何規避風險。所謂態度，就係以平常心面對風浪，以及對收益嘅理性預期。例如過去二十年股票投資合理回報只有15％左右，但2007年恒指卻達上述收益嘅兩倍，呢種情況可保持幾耐？喺上漲行情中如何選股？响下跌行情中如何加強防守性？至於投資方法，切忌追漲殺跌、高買低沽，建立有系統嘅買賣方法。恒指32000點唔係天堂，恒指19000點亦唔係地獄；正是一念天堂、一念地獄。

我老曹早喺1997年7月唔再相信牛熊論，改為信W、W、W（何時、何地、何股）。何時買入？何時賣出？熊市三期時，恒指O响八倍到十二倍之間，除非見到上述O，不然唔會100％投入。大部分日子恒指O响十二倍到十八倍之間便70％投入；一旦O升至十八倍以上二十二倍以下便50％投入；如O高出二十二倍便30％投入，因為大部分牛市死亡都响O二十二倍以上，此乃去年10月我老曹勸大家只可30％投入嘅理由。至於何地？所謂無三不成幾，一個城市經濟由低點回升，繁榮三年好肯定，繁榮五年有70％肯定，繁榮七年咁就要睇過先。港股由2003至07年已繁榮五年，會否繼續繁榮真係要睇過先。至於買賣何股係最難搞，亦係我老曹每天努力所在。

市場內仍有唔少分析員醉心於牛熊市理論，我老曹無意攻擊，只係我老曹早已改變策略，2003年起更加入牛眼投資法（double或止蝕離場）。

我老曹計劃3月出版第二本書《論戰》已在編寫中，利用歷史上嘅知名戰事，從別人行軍遣將中去吸取教訓，制訂自己嘅投資策略、心態同投資哲學，希望大家到時再捧場。即使你唔係大戶，亦應學習大戶心態睇市。股票市場响我老曹眼中係殺戮戰場唔係遊樂場，唔係你死就係我亡，包括點樣裝「走勢派」彈弓，令走勢派血流成河。股票市場係20╱80遊戲，即20％投資者贏80％投資者錢嘅地方，如果你唔係嗰20％勝利者，就係嗰80％失敗者。當大家學曉「論勢」後，必須上戰場打仗，不然只是書生論政（紙上談兵，講就無敵，做就無力！）。