曹仁超 - 港股後市唔止大調整 2008-01-16

2008-01-16

1月15日，周二。恒生指數跌630.35，收25837.78；成交1210.7億元。1月期指跌688點，收25728點，低水100多點。恒指如無力重返28000點以上，後市繼續令人擔心，即去年11月起恒指已進入有反彈無上升期。今年頭半個月內創新高價嘅有石油、黃金及農產品，至於基本金屬受惠於美元弱勢，但無力打破去年高價，已告訴大家2008年最可睇好係黃金及農產品（雖然油價上升，但油股不升，此乃油價見頂先兆）。

公用及收租股跌市避難所

美林計劃發行66億美元優先股畀一組投資機構，包括南韓、科威特、日本等，認股價52.4美元（相等於上周三天嘅平均價），息率9厘。

花旗集團宣布第四季虧損98.3億美元或每股1.99美元，另撥備174億美元；營業額減少70％，至72.2億美元，計劃出售145億美元優先股債券；至於普通股將面對減息41％，由每股季息54美仙減至32美仙。認購者包括新加坡投資機構、前主席Sandy Weil及最大股東沙地王子，另向公眾人士出售20億美元優先股。

投資者對美國經濟前景擔憂，亞太區股市多數出現下跌，少數例外係台灣升3.13％。

貝南奇嘅困局係，如減息則金價升，唔減息則股市跌。你話怎麼辦？月底如殊仔提出Plunge Protection Team方案，擔心美元滙價將進一步受壓，刺激金價進一步上升。日本擁有3萬億美元外滙，係全球最大嘅外滙儲備國，去年夏季至今日圓兌美元升13％、兌英鎊升12％，又再引發利差交易拆倉（BNP百利達估計約1.4萬億美元），成為全球股市下跌嘅另一威脅；兩大因素加起來，形成2008年金升股跌局面。

港股四個交易天累計跌幅1800點，滙控（005）更連跌五個交易天，收120.8元，高盛分析師响報告中話滙控喺美國嘅911億美元貸款中，可能有70％已變成負資產而須撥備130億美元，目標價由119元改為114元。港交所（388）跌3.6％，收184.9元；財險（2328）跌4.4％，收10.42元；國壽（2628）跌3.2％，收36.2元；平保（2318）跌2.8％，收74.35元。國企指數15000點失守，全日跌3.1％，收14999點，技術表現都幾差【圖】。中移動（941）跌4.2％，見124.8元。跌市避難所有公用股、收租股及房託基金，今天太古A（019）升4％。

滬深A股低收，中信證券跌3.7％、興業銀行跌4.6％；江西銅升9％，料完成向母公司收購資產，提升產量與獲利。

聯儲局與人行有相同之處

今天上海期銅一度走強，最高見62980元人民幣一噸，然後從高位回落，最低見61010元，收市61150元，較上日跌1260元一噸。金價上升令未來銅供應上升（黃金係採銅嘅副產品，未來礦商將為獲得更多黃金而增加開採銅礦）。

响動盪不安嘅市場，耐性好重要，一旦跌市形成，短期內唔會改變；同樣理由，升市一旦出現，短期內亦唔會改變。如各位响去年10月減持咗，不妨畀D耐性（除非你係十分精明嘅trader，曉得喺感恩節前入市、聖誕節前減持）。

美元已見1.4877兌1歐羅，同去年11月23日高位1.4967美元好接近。金牛、股熊嘅方向已十分清晰，即未來每次金價回落可吸納、每次股市反彈可減持。

衰退嘅風險在上升中，加上通脹壓力，令政策制定者可用嘅工具十分有限。美國聯儲局同中國人行唯一相同點係，兩者都在努力阻止經濟硬着陸，硬着陸風險又以中國較美國大（人行响呢方面經驗仍淺）。一、去年底內地房價係咪已出現「拐點」？上海房地產研究機構佑威房地產研究中心响今年初發布資料顯示，去年12月全市共推出一百八十四萬三千九百方米嘅商品房，成交一百五十七萬六千方米。上海樓市响去年12月首次出現供過於求，上述唔係上海特有現象，各地房地產市場嘅房屋交易量都明顯下滑，進入「量低價穩」期。二、滬深A股強牛係咪响去年10月結束？去年首三季上市公司共實現利潤5655.87億元人民幣，較2006年同期上升66.93％。今年又點？去年股市融資8300億元人民幣，今年能否融資1萬億元人民幣？今年限售股解禁規模達3萬億元人民幣，佔A股流通市值25％。三、今年內推出股指期貨，令內地唔再炒單邊市，即可以拋空股票及指數。

花旗集團對2008年股市展望，認為十分choppy；加上股值已偏高及面對美國經濟放緩，今年第一季甚至上半年拋售壓力好大。金價升穿900美元，進入新一輪投資推動金價上升期。中價股方面，花旗推介維達國際（3331）呢間生產廁紙嘅公司，並認為德昌電機（179）股價將繼續受壓，因西歐同美國汽車銷量進入低增長期，而生產成本卻上升。

道指熊市去年10月已開始，今天連貝南奇亦知道其嚴重性，希望阻止credit crunch出現（見1月10日其演說內容），相信1月29日聯儲局將減息半厘。美國銀行願意收購Countrywide Financial，亦令市場減少咗憂慮；JP摩根大通亦可能收購Washington Mutual。一連串行動引發周一出現空倉者平倉，令道指上升171.85，收12778.15，但上述技術反彈可維持幾耐？

今天CDS（Credit Default Swaps）共值43萬億美元，衍生工具市場共值500萬億美元，唔少以SIV或CDO方式存在，而唔响金融機構資產負債表上顯示出來。只要其中1.25％無力履行合約（BIS估計），其虧損將達2500億美元到5000億美元。到底邊一天才係The morning after？

黃金自2001年起又再取回投資地位，不但兌美元升值，兌人民幣亦升值，即存黃金較存人民幣更加保值！呢次金價上升唔係為咗保值，而係因為其已成為資金避難所。近期金礦股如Newcrest上升39.7％、Barrick升33％、Goldcorp升25.6％、Kinross升33.35％、Anglo Gold升18.05％，升幅全部大於金價，代表金價短期或有調整中長線仍睇好。

進入高風險低回報時期

美國銀行收購Countrywide Financial，到底係The beginning of the end，抑或係The end of the beginning？聯儲局係咪有能力停止信貸萎縮期出現？九十年代日本銀行曾努力嘗試，但唔成功。聯儲局除1月底會減息外，2月、3月18日及4月30日相信亦會減息，今年下半年聯邦基金利率有60％機會降至不足3厘。

2008年1月首十一個交易天，係過去十七年表現最差嘅日子，金融股更加令人失望。無可否認，去年11月起我地已進入高風險、低回報嘅時期，至於貝南奇呢位救世主能否真正救苦救難？仍有待觀察。我老曹估計，後市由去年10月30日高點31958點只係開始，唔再係大調整（A、B、C），而係出現下跌浪「1、2、3、4、5」。以今天恒指跌穿26000點睇，擔心恒指繼道指之後進入熊市下跌浪大於A、B、C調整浪，依家正進入浪5。When times get tough，賺錢變得唔容易。2000年起我地曾經歷科網股泡沫爆破；去年10月起進入信貸泡沫爆破期。上一次調整到2002年10月（港股2003年4月）才見底，呢次又如何？估頂估底都係好無聊嘅行為，總之後市要小心。

美國樓價回落，但曼哈頓區樓價去年第四季仍較2006年同期上升17.6％，平均每層賣144萬美元；平均每呎上升18.2％，至1180美元（9200港元），即美國豪宅去年第四季仍在上升。

美國消費佔GDP 72％。據去年12月份嘅調查，有34％消費者表示未來九十天會減少消費（較11月調查只有29％進一步惡化），其中又以年收入15萬美元以上者減幅最大。上述係美國嘅10％高收入群，共一千三百萬家庭，收入佔全美55％，並支付聯邦政府74％稅款，控制住75-80％非必需嘅消費。此外，56％認為美國正走向衰退，較去年11月上升18點！睇嚟美國經濟起碼已開始步向軟着陸期（即一季GDP負增長）。12月26日納指至今回落超過10％，令事前被視為有抗衰退能力嘅高科技股亦被拋售，黃金成為少數避難所之一，唔少高科技股評級由過去買入被改為持有，投資策略由進攻性改為防守性。所有好東西都有結束嘅一天，我老曹毋須為此包糖衣。衰退亦非壞名詞，一如我老曹亦步入老年期一樣，問題在乎你有冇為跌市作準備，例如去年10月前有冇適量咁減持？去年曾搵到唔少Money-Doublers，2008年至今尋找可以提供三位數字升幅嘅股份有一定困難。美國消費者中，約34％表示將減少消費理由係擔心通脹及汽油價格上升，至於最先會減少邊種消費？答案係餐飲，其次係旅遊，亦會減少購買消費品及耐用品。34％表示會減少消費嘅人中，有56％擔心經濟走下坡、29％表示個人財政較緊。Rosalind Wells分析員估計，今年美國零售業升幅將係近六年內最低嘅一年（2002年增長率只有3％），尤其係奢侈品。

油價升油股唔升之謎

OPEC响2月1日開會，最近已放聲氣話或者會增產，油價未來升幅可能有限（大家應開始明白，點解近日油價上升而油股唔升）。

多謝讀者支持，令《論勢》一書售出近二萬本，今天收到版稅20多萬元，已全部捐畀農家女學校，估計可令百多人受惠。第二本書已在籌備中，如無意外可以响3月份同大家見面，希望繼續獲大家支持，讓我老曹嘅善舉可以繼續下去。

能夠為農村婦女提供一門謀生技能，以便响農業轉向工業、工業轉向服務業嘅時期，不但解決個人出路問題，甚至令佢地有一份尊嚴，係值得做嘅事。最近我老曹再捐出4萬元贊助農家女參加「苗圃行動」，行路籌款為六條村建讀書室，並答應佢地每籌到1元，我老曹再捐1元。

今天我老曹嘅女兒已長大成人，唔需要我老曹照顧，而且自己有能力幫助別人，實在賞心樂事。老吾老以及人之老，幼吾幼以及人之幼，古有明訓。希望社會上所有有能力嘅人都伸出同情之手，協助長者及幼童，共建和諧社會。天上人間：人人努力、繁榮共享。