曹仁超 - 豬尾傷人 2008-01-19

2008-01-19

1月18日，周五。恒生指數升86.89，收25201.81；成交1273億多元。1月期指低水，跌139點，收24951點。裕元（551）跌6.82％，收24.6元，因純利只升1.6％。

由於信用評估公司威脅將唔少企業債券評級降低，擔心引發credit crunch，令周四道指大跌。

美國投資者擔心賭場股走下坡，建議減持金沙、永利及MGM Mirage。至於澳門賭場股，去年上半年已overcrowded，宜見好即收。今年至今金沙股價回落27％，永利回落13％，MGM因杜拜有股份而抗跌力特強。《澳門日報》報道，今年1月首十五天賭博業收入55億澳門元，估計1月份收入可達110億澳門元，較去年平均每月67.7億澳門元急升62.48％，或較去年10月（去年最高）86億澳門元升28％。因為新賭場加入競爭，唔同賭場收益不一，澳門賭業營業額仍大升，只係競爭日益激烈，勢有一番惡鬥。

好多人希望2008年係2007年翻版，至今為止，上述願望仍未實現，呢條「豬尾」亦利得投資者幾傷。「衰退」兩個字官方定義係連續兩季GDP負增長，1982年至今美國再冇出現。2000年第一季至02年第三季道指跌幅達38.6％，納指更達78.4％。換言之，今時今日毋須經濟衰退去拖垮股市，已可令大企業股價失去40％市值，二線股甚至失去80％市值，小心。

華府開始藥石亂投

美國前財長挽救經濟方案已被包裝為Plunge Protection Team；美國經濟真係到藥石亂投境地。各位認為將1500億美元存入中產家庭戶口，可令經濟起死回生咩？更何況分段執行，2009年年初才有600億到700億美元，即個別人士只獲800美元回扣（一個家庭1600美元）。

《巴隆氏》認為，2008年美國出現衰退機會已升上70％，我老曹仍傾向相信美國經濟可軟陸。自1970年至今每次利率倒掛（即長息利率低於短息），七次中有六次事後出現衰退，去年夏季美國再次出現一年期債券息率高於十年期，對未來衰退恐懼令美股去年11月起回落。最近美國銀行宣布收購Countrywide Financial，每股7美元，令該股由5美元升上7美元，然後再回落至6美元，較收購價仍低1美元。有14％折扣，點解仍冇人博？由此可見市場虛怯程度（皆因擔心收購無法落實）。

美國地產大亨特朗普由地產角度睇，認為美國經濟已陷入衰退，並認為已係吸納房地產時刻。我老曹只同意美國房地產業陷入衰退，但唔同意依家應吸納美國房地產。理由好簡單，唔少銀行已唔願再做地產項目生意，雖然美國曼哈頓區或者仲係幾好，但加州及佛州已陷衰退。樓價上升由中心區好出去，淡話由外圍衰入。各位信唔信減息一厘樓價會升？如果信，請解釋1990至2003年東京樓價或1997年8月至2003年7月本港樓價點解減息下仍然勁跌呢？事實同大家諗法剛剛相反；加息樓價升、減息樓價跌（或正確D講，第一次減息樓價仍升，第二次減息樓價個別發展，第三次減息樓價跌）。特朗普言論可以聽，至於信唔信則必須經過思考同分析。

道指去年11月起已係熊市，點樣熊掌下生存？就係如何在Bad market環境下做good stock picking！可動用資金只能佔總投資30％（三七分）。隨經濟惡化，美國聯儲局及其他央行紛紛放寬銀根，面對「高風險、低回報」2008年，真係有D舉步維艱感覺。Windham Financial主要策略員Paul Mendelsohn認為，貝南奇面對次按危機前唔知唔覺，去年8月次按危機爆發後，為減少市場恐懼感而減息同注資，但又唔及格蛇大刀闊斧，結果做得唔夠快又唔夠狠。Oaktree Asset Management主要策略員Robert Pavlik認為，月底減息半厘並唔足夠，因為經濟惡化速度較估計中快！唔少交易員已經「拋毛巾」投晒降離場，但唔少知名大行客戶仍未止蝕。今天面對只係利潤流走，明天蝕到入肉時才識嗌痛，令後市展望有反彈冇上升。

港股直通車再開刺激不大

上月美國新屋動工減少14.2％，至年率一百萬六千間；另一轉弱數據係新屋批准興建跌8.1％，至一百零六萬八千間（係十七年內最低），亦令人失望。失業率數字仍然良好，不過此乃滯後數據。

股市volatility上升，何處尋value？2007年恒指波幅較2000年更大，由過去三年平均10.8％升上23.6％，主因係引入大量國企、紅籌股，只有1997-98年波幅才大於2007年。過去歷史係：波幅大代表股市見頂，唔知呢次係咪例外？

去年9月及10月內地停發新基金，形成QDII基金成為國內人爭購對象。但11月、12月同1月港股表現，令唔少QDII基金插水。外傳3月份係港股直通車開出（但有配額）日子，但估算亦無法激起類似去年9月10月上升浪啦。

經過1月上旬回落後，BNP百利達對中國大型企業尤其金融如平安保險（2318）、交通銀行（3328）、鞍鋼（347）及馬鋼（323）繼續抱負面態度。內房股面對壓力，估計今年樓價升幅十分有限；即使內需股亦面對壓力，假如中國GDP增長率放緩話。

《華爾街日報》談及中國房地產，深圳樓價去年9月至今已回落8％、廣州樓價已回落9.9％，故認為內地樓價已出現拐點。世界上冇唔爆泡沫，中國樓亦唔例外。

根據德銀香港分析員馬駿分析，美國GDP每回落1％，可令中國出口減少4％，中國GDP增幅減少0.5％。12月無論貿盈及貨幣供應增長率都放緩，代表長達十三年經濟擴張期去年10月見頂。上述觀念獲北京美國銀行分析員Wang Tao認同：12月貿盈係227億美元（11月262億美元）；貨幣增長率16.7％，已在減慢。人行信貸收緊已達十一年內最高，利率亦係九年內最高，相信仍會繼續緊下去及加息。香港花旗集團分析員黃益平認為，中國已面對生產力過剩及邊際利潤下降，未來將出現大量唔再產生利潤投資，引發中國經濟陷入通縮。

戴德梁行分析員話，地產投資者正在淡出廣州物業市場，拐點剛開始。

BNP百利達認為，銀行收緊銀根效力今年第一季開始浮現，對內地房地產即使唔睇淡亦宜保持中立；對壽險股影響今年亦浮現，亦係唔睇淡亦應保持中立。人行將存款保證金率由去年1月至今已上調十一次，估計將上調至18％水平；利率仍有三次加息，以及今年人民幣升值8-10％，足夠出現實質利率（即利率高於CPI升幅），加上3月份第十一屆人大會議後，估計將對財金方面加大規管，都係對內地銀行股及壽險股不利因素，包括呆壞賬上升及收費收入減少。

BNP百利達亦睇淡鋼鐵股，因今年鐵礦砂談判十分艱巨，出口退稅已大減，部分產品出口更抽稅；加上物業市道放緩，對鋼筋需求下降。踏入今年鋼鐵價亦進入回落期。

1月14日起焦炭出口價稅率由15％上升到25％。今年1月國家對焦炭出口政策進一步收緊。

中國境內產品售價95.6％由市場決定，過去政府只能透過貨幣升值或信貸控制、利率加減等去穩定價格。1月15日國家發改委宣布控制價格（加價要申請），為穩定物價而再次用行政干預。

今年1月上旬中國三十個大中城市豆油、豬肉、牛肉及羊肉零售價較去年1月上旬升58％、43％、46％及51％。周三國家發改委宣布，對重要商品臨時價格干預，包括食用油、牛奶、雞蛋、肉類及液化石油氣，以減低價格上漲對低收入群體生活影響。

中國電力供應未過剩

電力方面，中國電管局宣布去年發電能力達713GW，較2006年年底上升14.6％，包括關閉小型燃煤發電機14.4GW，即去年新發電能力增加106GW，需求上升14.4％（製造業需求上升15.7％）。估計今明兩年每年需要新增發電能力100GW，因此哈動（1133）可看好。估計2008至2010年中國電力生產量上升12％、11％及10％，即今年增加86GW、明年95GW（如唔計關掉小型燃煤發電廠，新增電力產量係100GW及109GW）。同需求升幅比較，中國電力市場只係進入供求平衡，而非過去估計般出現過剩。

黃金方面，瑞銀估計今年金價平均只有760美元一盎斯，明年更下跌至700美元，理由係未來十二至十八個月全球信貸收縮，最終令金價回落。900美元以上金價只宜持有，不宜再高追；後市金價850至1000美元之間上落。

銅價應2006年下半年見頂。估計今年平均6720美元一噸及明年見7616美元一噸；2006年下半年至今銅價進入上落市。

聚苯乙烯方面，估計由今年產量五千噸上升至二萬五千公噸，價格由400美元一公斤升上500美元一公斤，令內地石化股純利進入高增長期。

水泥業則進入結構性改變。新正迅速取代舊及進行整合，但投資過剩仍然存在。選擇性投資如安徽海螺（914）及中國建材（3323），估計2010年水泥價將較家上升25％左右，主要由成本推動。

鐵路成為第十一個五年計劃（2006至2010年）重點投資，涉及資金5萬億元人民幣（其中1.25萬億元投資路軌，其餘係基建項目）。但上市鐵路股唔多，可供選擇有限。

內地水泥業進入結構改變

中國城市化進度良好（由1950年12.5％到2006年43.9％），2006年全球平均數係48.7％，美國係80.8％。城市人均收入由2001至06年上升71％。隨交通改善加快城市化，反過來又增加對交通需求，鐵路興建變成當務之急。計劃2010年鐵路網較2006年上升162％至三千八百八十公里，即中國進入大量興建鐵路期；反之，超級公路投資高峰期已眼前（2008年），未來升幅放緩。

2006年中國人均收入11759元人民幣（1500美元），估計有二千五百萬到一億城市人口人均收入將達3300至6000美元，大部分分布五十個大城市。呢批人口係房地產及金融投資主要需求者，令中國住宅投資2005年上升23％，2006年上升26％，估計2007年達到32％。雖然政府提出一連串冷卻措施，但收效唔大。過去三年中產階級買唔起樓，成為內地市民最大投訴，形成政府收緊信貸兼加息，希望壓抑樓價上升速度，令中小型發展商可能因缺乏資金而退出市場。國內地產發展市場將一如香港（1973年本港地產發展商超過二百間，依家十隻手指數得晒）。