曹仁超 - 懂期權看股票如睇慢鏡 2008-01-11

2008-01-11

1月10日，周四。恒生指數跌384.99，收27230.86；成交1233.2億元。1月期指跌幅收窄，只跌294點，收27266點，仍然高水。長實（001）跌3.4％，有投資者以每股140.5元出售三千三百五十萬股，新地（016）亦因此跌3.5％、恒地（012）跌3.2％。思捷環球（330）因高盛出報告擔心德國經濟放緩，令股價跌6.1％。

盒仔茶同西法都冇效

中國經濟仲發燒（去年11月CPI上升6.9％，GDP增長率仍在11.5％）。過去幾年希望飲盒仔茶退燒證明冇效；改用西法（去年加息六次，兼將存款保證金比率一再提高），至今仍未見效。終於都用番1994年上海朱招──行政干預：一、2008年1月1日起貨幣從緊政策，限制銀行貸款。二、今天下令凍結電費、水費、汽油零售價及天然氣價。三、取消糧食出口退稅，改為糧食出口徵稅，搞到港人擔心連食麵包都可能有問題……。行政干預可收立竿見影之效，但係唔符合市場經濟原則，但為減少內地貧富懸殊所帶來社會不安，最後都係用上。

中央政府限制天然氣、汽油、電力及水費加價，以打擊通脹，令中石化（386）跌6.4％、大唐發電（991）跌4.1％、華潤電力（836）跌8.3％。中聯通（762）升7.2％，公司宣布唔知股價上升理由。首長國際（697）升11％，因麥格理推介，目標價4.3元。復星國際（656）升6.3％，見8.07元，因大摩推介。

內房股扭轉近期疲態，中國海外（688）及華潤置地（1109）分別彈高3.5％及2％，富力地產（2777）亦有不俗表現，抽升4.4％。

個別股份方面，蒙古能源（276）或可提前收購位於蒙古煤礦，復牌後勁升近33％，收報9.02元。至於天下媒體（8167）磋商引入潛在投資者，復牌後顯著造好，股價飆升一倍，報3.4元，創逾三年新高。

滬深A股再升1.04％，出現個別發展，一如香港咁互有升降。

去年12月份台灣主板（motherboard）出口較11月份減少13％，令人擔心筆記簿電腦（notebook）需求下降。花旗估計，今年第一季主板需求將較去年同期減少2％（但今年1月份可較去年12月回升4％），而筆記簿電腦需求則較去年同期減少9％（1月份較去年12月回升1％）。上述諗法令聯想（992）近日股價下跌。

花旗推介國美（493），估計2008及09年純利可升6%至14％，目標價由17.3元改為24元。維達國際（3331）雖然近日股價已上升20％，但以2008年O計亦只有二十二倍，同類品牌股O達三十五倍，相信仍有上升空間。香港中旅（308）估計係中國GDP未來兩到三年平均每年上升10%至11％受惠者，尤其有2008年北京奧運、2010年上海世博；而且同機場股比較，香港中旅O仍較吸引。

花旗估計，今年貨櫃運輸增長率只有8.1％增長（2007年9.5％），由於中美貨櫃運輸需求增長率放緩，中歐需求亦由去年上升15％下降至今年只升10％（甚至更少），理由係美元價回落及人民幣加快升值；反而貨櫃船供應量今年增加14％，扭轉去年供不應求趨勢。去年建造貨櫃船訂單上升60％（其中50％係大型船），即未來供應量將進一步上升，令2009年或以後貨櫃船供求形勢出現改變。

假設今年美國GDP增長率只有0.8％（事前估計1.8％）、2009年增長率1.4％（事前估計2.2％），加上中國去年7月1日起減少出口退稅，限制中國產品出口增長率，估計今年貨櫃輪租金將受影響，令航運股面對調整。如東方海外（316）、中海集運（2866）、中國遠洋（1919）、中海發展（1138）；至於太平洋航運（2343）由於以乾貨為主，仍受惠於中國對鐵礦砂需求上升，暫時影響唔大。

中國宣布凍結電費、水費、汽油零售價及天然氣價格，令天然氣成本上升無法轉嫁最終用戶，以減慢中國今年CPI升幅，變相令天然氣營運商邊際利潤下降。上述公布短期不利燃氣股，但長遠而言中國住戶對天然氣需求好大，正是資本雄厚如港華燃氣（1083）擴展期，因此瑞銀建議吸納。

去年下半年鋁價已回落，因美國需求下降；反之，中國無論產量及需求皆上升。高盛估計，今年鋁價平均1.09美元一磅，進一步下跌幅度唔大，估計1.07美元左右出現支持力，並認為今夏係重新吸納中國鋁業（2600）日子。

瑞銀則推介中海油（883），估計今年中國對入口石油依賴進一步上升；加上中石油（857）、中石化及中海油煉油能力未來十二個月將上升600kbpd，形勢對中海油十分有利。

期權可用於股票商品外

Picking the right stock and stay in step with the market並唔容易，尤其去年8月股市進入大上大落期，單單學習留意邊D項目及幾時轉，都係一門學問。升市中買錯股份，同跌市中錯股份同樣令人激氣；何時買入何股、何時沽出何股？例如走勢變得醜陋時，你係咪夠膽買入？走勢變得美好時，又會否獲利回吐？走勢派已變成市場內大多數，而群眾常常做出錯誤決定，例如近日恒指出現雙底時拋售。油價上升中應否沽出石油股？金融股受苦受難日子仲有幾耐？根據高盛估計，次按危機今年第一季才係高潮，第二季及第三季美國GDP有可能出現1％負增長，即美國出現衰退，令第三季美元利率降至2.5厘；失業率明年將升至6.5％。能夠睇好美國行業有健康護理、必需消費品項目、能源及公用，並建議減持隨意消費品項目、金融、工業、原材料股及資訊科技。美林分析員David Rosenberg認為，美國12月份失業率上升，已確認經濟步入衰退期。

美國CPI升幅擴大、GDP增長率放緩，令1月29日及30日聯儲局利率會議氣氛緊張。如減息四分一厘，會被批評無視當前惡劣形勢；如減息半厘，亦會被批評罔顧通脹壓力。今年1月9日道指見12501點才反彈，上述指數已略破去年8月16日低點12517點。道指雙底回升可支持幾耐？如道指12500點再失守又點？恒生指數走勢係下降三角形，支持位26000點附近。作為走勢觀察員，上述兩點皆十分重要。另一重要支持位係標普五百指數1380點，此乃2005年7月所開始上升軌支持位，如標普五百指數1380點失守，後市亦幾麻煩。呢段日子，可運用期權（options）做對沖。本周日各位不妨會展中心會議廳，聽聽專家意見。即使自己唔玩期權，明白期權點樣運作，亦有助提升自己分析股票技巧。期權不但可用於股票，亦可用於黃金及外，例如去年8月22日用1萬美元買澳元call期權，八星期內變成19.8萬美元；去年2月買一份黃金call期權，四星期內變成5.64萬美元；六個月前買一份原油call期權，二十八星期內變成3.46萬美元；去年12月前買份大豆call期權，九星期內變成2.02萬美元；同期買份小麥call期權，八星期內變成1.87萬美元。學曉期權買賣（即使自己唔玩），再睇股票升降，似乎都變成slow motion（好似睇慢鏡）。期權知識亦有助各位分析認股權證（俗稱窩輪）。外國，期權買賣較窩輪大，因期權可可空，較窩輪靈活；反而在香港因大行推介下形成窩輪熱賣，期權反而受冷落。由於較少人玩，令期權溢價偏高（好似五年前窩輪亦一樣）。上述涉及雞與雞蛋問題，多人玩自然多人寫期權，令溢價回落，又反過來吸引更多人買賣……形成良性循環。

減息太多市場會驚

去年8月次按危機出現後，聯儲局做唔少去阻止美國經濟陷入衰退。道指由1月9日見12501點，略低於去年8月16日12517點，係咪代表聯儲局過去一切努力只能減慢經濟下跌速度，而非改變經濟大方向？1月14日及28日聯儲局兩次發行高達300億美元救市貸款，相對次按危機係咪杯水車薪？日本銀行自1990年6月至2003年6月亦做唔少，結果又點？David Tankin（普林斯頓大學投資顧問團，管理133億美元證券）及債券大王格羅斯估計，聯邦基金利率年中可見3厘，並認為減息除刺激油價、金價及農產品價格上升增加通脹壓力外，並不能挽救次按危機。你又點睇？

通常頭三次減息，股票市場都會嗌好，當出現第四次減息，股票市場會開始驚（唔信請參考2001年1月至2003年6月減息）。最初幾次減息，投資者受減息刺激而將唔應該投入股市資金亦投入；當第三或四次減息，投資者考慮再唔係資金成本，而係考慮衰退可能性。利率高低只影響股價短期升降，股價長期升降卻受企業純利升降所支配。

美國前財長森瑪斯認為，美國政府欲阻止衰退出現方法，係向非富有美國人（甚至貧窮階級）提供705億到1000億美元減稅及補貼。殊仔來自共和黨，代表係美國富有階級，加上過去七年同國會關係好差，不但布殊唔會提出類似方案，即使提出亦難獲國會通過。殊仔決定係換人，由現任財長保爾森取代，前財長方案因此無疾而終。

Oppenheimer首席策略員Michael Metz認為，格蛇自1987年10月股災後，解決經濟放緩方法係減息兼放寬信貸，令美國經濟由股災中恢復過來。1994年墨西哥危機、1997年亞洲金融風暴、1998年俄羅斯債務危機兼2000年科網股泡沫爆破，亦以呢招一一搞掂。2007年1月貝南奇接任時係接手一個燙手番薯，無論做乜都逃唔出厄運。情況有如1984年7月中英雙方達成1997年7月1日香港主權回歸協議後，透過限制本港每年土地供應，加上英國欲光榮撤退欲望，恒生指數便由1984年7月13日746點升至1997年8月8日16820點，狂升二十二倍。1997年7月1日後，任邊個接手呢隻熱番薯都唔易搞，加上我地白眉董完全唔識審時度勢而提出八萬五房屋政策（其實從來冇落實過），巧遇亞洲金融風暴，搞到一鑊粥。香港之後經歷埋美國科網股泡沫爆破及2003年沙士事件，香港經濟唔死都難。同日本唔同，香港有阿爺照住，阿爺經濟卻由1995年起一直都咁好，眼見乖孫唔掂，先來一招自由行，大量內地人湧到，刺激本港零售業、酒店業復甦；第二招CEPA提早讓香港企業進入內地，把香港工商業搞旺；再來一招QDII及大量國企來港上市，本港金融業全面上升，一如佘當奴話：香港人想窮都難。去年8月再整招港股直通車，令香港經濟出現過熱，11月份阿爺立即收火，由溫總發言話港股直通車遙遙無期，恒生指數應聲由32000點冷卻到近日26500點。

美國經濟由1987年10月到2007年10月信貸泡沫下發展，美國冇阿爺照住，一旦泡沫爆破，你說怎麼辦？美國聯儲局一向由富經驗者掌舵，唔會好似1989年日本銀行行長三重野康或1997年7月本港白眉董咁唔曉審時度勢。近年聯儲局利用美元價回落、減息兼向金融體系注資去減慢經濟下滑速度，希望完成軟陸（一季GDP負增長）而非出現衰退（連續兩季GDP負增長），睇機會大唔大？

本港地產商願吃眼前虧

美國次按危機，OECD估計8900億美元次按債券中有22％到33％可能變成呆壞賬，即總額約2000億到3000億美元，部分已2007年浮現，更大部分2008年浮現。至於ARMS約2萬億美元，佔樓按總貸款25％，對美國金融機構影響2007年已浮現。2006年下半年開始美國樓價回落期，估計仲有排搞，低潮幾時出現？事前無法預知，估計一定較香港長（一年），但較日本短（十三年）。

中國經濟有如1980年代香港，正由出口、製造業帶動轉向內部消費帶動。內需股如內房股、收費公路股、鐵路股等長遠係睇好，但短期因宏調收緊而睇淡。本港地產商正利用呢段青黃不接期增持內地土地，雖然吃眼前虧，但可謀求長遠利益。

中國同香港唔同，幅員廣闊，城市與城市之間房地產出現唔同周期絕對唔奇。例如北京五條地鐵線年內同時開工，令四環外商品住宅供應上升67.57％，郊區城市化傾向好明顯，一條條地鐵線向遠郊輸出人口，減少市中心高房價壓力，令北京城不斷向外拓展。郊區商品房供應比重加大，由於土地成本較低，有助壓抑北京商品房整體樓價。

上海卻相反，經過一年調整，市中心區住宅用地已接近飽和，新房開工速度放緩；反而閔行、浦東等非市中心區新房上市，早已佔總供應量一半。郊區都市化令過去一年上海平均樓價由2006年10月11500元一平方米降至去年11月10700元。進入2008年因市中心供應量下降，令市中心樓價再次有上調壓力。