曹仁超 - 揀股過濾法

2007-12-27

12月26日，周三。假期之後市面較靜，相信唔少人仍在度假未返。港股2007年只餘下兩天半交易，粉飾櫥窗活動令唔少二線股上升。　

大摩認為明年美元價應係1.18兌1歐羅及1.64兌1英鎊。由於美元價特廉，估計2008、09年將有大量資金回流美國作投資。美元價回升，對基本金屬價格構成壓力；反之，對美股起支持作用。

上市內房股生存機會較大

明年內地銀行擰緊地產信貸資金閘門，相信內房股今年第四季起進入汰弱留強期，低價拿地、高價賣房日子結束。依家本港上市內房股不足六十隻，佔全國房地產企業總數0.2％，佢地集資能力較大，生存下來機會較未上市內房企業大，例如富力地產（2777）、合景泰富（1813）更獲新地（016）合資投地。相信明年係內房股汰弱留強期。

花旗認為人民幣上周加息已估計之中，對內房股影響輕微，經整固後反可進一步睇好。本港地產發展股正利用機會增持內地土地。花旗推介雅居樂（3383）目標價17.2元、首創置業（2868）目標8.6元、中渝置地（1224）目標價18.5元、中國海外（688）目標價17元、華潤置地（1109）目標價26元、方興地產（817）目標價6.37元、綠城中國（3900）目標價18.58元、越秀投資（123）目標價3.6元、富力地產目標價36.28元、越秀房託（405）目標價4.2元、合生創展（754）目標價28.18元、合景泰富目標價20元、中新集團（563）目標價12.12元、新世界中國（917）目標價9.97元、深圳控股（604）目標價10元、世茂房地產（813）目標價25.57元、遠洋地產（3377）目標價14.89元、盛高置地（337）目標價9.68元。

瑞銀認為，六次加息後人民幣存款仲係負利率，代表政府鼓勵置業，只打擊投機行為。如明年樓價回落10％，內房股將有35％下跌空間，因此對明年內房股抱觀望態度。

旗繼續睇好明年內房股，瑞銀則抱中立，最後誰勝誰負？

四十多年前巴郡只係一間紡織廠，年賺4.5萬美元。畢非德獲控制權後將紡織廠關掉，資金用作投資一間保險公司GEICO，年賺460萬美元，即一下子令巴郡純利上升十倍！保險公司賺回來錢用作收購時思糖果（See's Candies），係一間生產朱古力、賺錢能力好強公司；再將賺回來錢用作吸納可口可樂。可口可樂派息用作購買美國運通，然後吉列刀片……。結果巴郡股價上升5576％，最近十年亦上升482％。乜令巴郡股價上升？答案係純利增長。2000年至今道指升幅有限，但石油股、能源股、金礦股及資源股平均上升401％（高潮2006年），同期巴郡升幅亦只有100％。換言之，所謂Midas Touch就係找出邊D公司未來純利可大升，就係咁簡單。

大部分投資者忽略趨勢。佢地睇電視、聽收音機、睇報紙聽所謂專家推介，或party收風……，佢地不但冇2000年留意資源股冒起，亦冇留意2005年下半年內地A股方向改變，更加睇唔到蘋果iPod、iPhone、Google及黑莓所帶來影響。全球六十六億人口，只有十二億五千萬使用互聯網，未及人口總數五分一；如互聯網使用方式更容易，可令使用人口上升一倍，達到二十五億人並非冇可能。上述會創造幾多商機？

2008年係美國大選年。戰後十五個總統大選年，美股平均上升12％，何況明年起碼有兩次減息，第一次1月底。估計明年科技股繼續受追捧，因為資金唔再流向房地產及金融股；同時，明年美國經濟唔似會陷入衰退。

港科技公司蠶食日本對手市場

香港上市科技公司產品正逐步侵佔日本科技公司產品市場，純利有望進入高速增長期。至於點樣揀股？我老曹唔係「winner-picking machine」。我老曹亦利用「過濾法」，即最先揀十隻認為優質科技股，一個月後留低五隻，賣掉跑輸大市五隻，兩個月後賣掉另外兩隻，將資金集中兩、三隻跑贏大市科技股（或股價上升超過20％者）作中長線持有，等候日後收成（除非從最高價回落20％才再留意）。過去我老曹投資資源股用上述方法，投資內地銀行、保險股亦採用上述過濾法，呢次亦唔例外。至於美國金融股（或與美國金融房地產有關項目），我老曹去年下半年起已建議underweight，明年上半年態度不變，例如出口傢俬到美國公司或出口燈飾到美國公司，去年下半年已睇淡。
畢非德過去四十多年都係揀股專家（雖然亦偶有失手），平均每年回報率超過20％，今天擁有財產超過500億美元。佢唔認為次按損失會引發美國衰退，今年仲大手購入鐵路項目，同時睇好南韓股市。近期大手投資有17.2％ Burlington Northern Santa Fe鐵路，並動用45億美元購入Pritzkers家族手上的Marmon 60％，係咪有啟示性？佢亦有興趣買富國銀行及U.S. Bancorp，雖然兩間公司均受次按打擊，但基礎穩固、管理層踏實。別人危，係咪閣下機？今年Countrywide Financial、美林、花旗及大摩股價已由高位回落40％，畢非德認為係保守投資者機會。我老曹相信次按危機明年上半年才係高潮。畢非德反對timing，我老曹則認為「不時不食」，掌握時機同樣重要，策略係pick the good stocks at good times and staying with them as long as they remain good companies！美國房地產已好十五年，去年下半年才剛剛開始衰，至於會衰幾耐則木宰羊，我老曹冇能力接住下跌中刀！美國11月份新屋銷售年率七十一萬八千間（10月份七十二萬八千間），十分接近1996年9月最低點七十一萬六千間，代表美國樓市繼續萎縮下去，估計明年銷量再跌8.9％（今年已下跌25％，或較2005年7月最高峰期下跌48％）。雷曼兄弟估計，由高峰到低點美國樓價跌幅最小15％。新屋建造亦出現十四年內最低，較去年1月高峰回落48％。

One man's profit is another's loss？十九世紀前唔少人相信競爭只係零和遊戲，因而主張減少競爭。商會組成背後理由就係減少同業間互相競爭，以達致坐地分肥目的（同時阻止太多人加入，以免分薄利益）。上述理論受到宏觀經濟學派攻擊，佢地認為競爭最終令人人受惠，因為競爭迫使參與者永不停止地找尋新方法及更好方式提升效率，結果令各行各業進步。競爭令參與者冇從前咁舒服，例如1994年前有報業公會維持秩序，1997年前銀行公會決定銀行利率，以及香港電訊市場唔開放。今天香港電力市場仍然毋須競爭，只有兩電繼續坐地分肥，法例保護下唔使競爭，你話幾爽！

港電力市場應改變遊戲規則

要令兩電get fit同時stay fit，唔係修訂管制利潤條例，而係改變遊戲規則，將供電網公開，任何機構都可發電，然後把電力賣畀供電網（上述遊戲規則制定可參考外國）。中國亦走向供電網同供電廠分開，只有咁樣，港人才能獲得最有效率供電及最符合成本效益電價。

1980年起經濟加速環球化，不但改變亞洲、拉丁美洲、東歐、印度同俄羅斯，同時改變美國、歐洲同日本。有才能管理者帶來革命性技巧，令過去二十五年變化難以想像。有人認為中國、印度等冒起遲早取代美國同歐洲地位（高盛估計2030年發生）。八十年代開始全球進步，係美國、歐洲、日本等每行前一步，中國、印度等新興工業國便行前兩步。假設上述速度不變，中國同印度當然遲早超過美國、歐洲同日本。但世事並冇咁簡單，日本1990年起無法由高增值製造工業，轉到生命科技及資訊科技，生物工程及IT行業方面日本缺乏創新能力，漸漸成為大落後者，而且面對中國同印度以低價競爭科技產品市場，因而不斷退步。同樣理由，中國改革開放政策落實三十年後，過去所擁有絕對優勢例如廉價勞動力、廉價資源、廉價土地成本漸漸失去，價廉取勝未來三十年係咪仍可保持高速成長？睇睇亞洲金融風暴後新興工業國如泰國、印尼、馬來西亞、菲律賓等如何？今天中國同印度正在面臨1997年前新興工業國相同問題──人才外流，最佳人才都出國留學而且唔回國；中國同印度經濟正面對欠缺一流管理人才困擾，中國企業中層人才及高層人才必須外求，薪金早較西方國家高好多。咁情況下，中國真係能夠2030年超英趕美咩（指人均收入）？

高級領導人才出現來自社會包容，例如容許「不同」（difference）、對藝術欣賞、對科學尊敬、對文學認同、對異見者包容……。只有如此，社會才會出現創新科技、創新管理技巧……。中國社會一向冇容人之量，反而忌才心態到處可見。別人較自己好，中國人唔係羨慕而係嫉妒。所謂槍打出頭鳥，憎人富貴厭人窮，有才華者唔係被欣賞及栽培，而係受到嫉妒與迫害，佢未「出頭」之前已wear out！漢唐後中國社會就缺乏包容心態，加上人與人之間互相猜忌，係中國經濟不前最大理由。

引入自由經濟制度後中國，擔心將走唔出過去新興工業國框框，只能停留高增值製造工業水平，而非更上一層樓，例如台灣發展到1992年後經濟便停滯不前。

今年國際輿論圍繞中國出口食品、玩具等行業質量問題。《中國青年報》提出點解咁多行業國內標準低於出口標準？同樣係農產品，供出口農產品要求嚴格，唔供出口農產品卻缺少必要監督。例如奶製品國外係一天過期，在國內卻係三天。又例如西蘭花，供出口者捉蟲要用手、除草亦用手，田間工具用完必須洗淨及消毒並專門存放，目的係盡量減少採用農藥除蟲去草，以符合出口標準；反而內地銷售農產品卻經常測到農殘超標、假冒偽劣。

「中國人用次貨」要不得

點解國內標準較出口標準低？係咪中國人條命唔值錢？近年因執行不嚴格令國內標準食品、玩具出口到外國受國際輿論圍攻。要重建國際對中國貨信心，不但要嚴格執行出口標準，同時要將國內標準提升到國際標準水平，唔應該再存有「中國人用次貨」心態，相信係所有中國人心聲。

　國家資訊中心預測部副主任祝寶良估計，明年中國消費品市場銷售增長率仍保持高位。投資方面，政府已增加一D限制，但保持較高增速基本因素依然存在，令投資增速仍在偏快區運行。出口方面，貿易保護主義重新抬頭，針對中國貿易數據增加。美國經濟不確定性增大；中國今年出台控制出口過快增長及調整外貿結構政策生效，加上人民幣升值步伐加快，明年中國出口增長率將減速。內地貨幣政策從緊，並將繼續提高法定存款準備金率及利率，調控信貸規模同結構。房貸新政出台將降低房地產淨資產收益率，減少國際資金流入，明年新增信貸約3.2萬億元人民幣。物價水平方面，2000到06年中國食用油需求翻一番，令國內供應只能滿足一半需求，其餘由外國入口，因此無法唔受外國農產品漲價影響。經過一輪漲價後，中國農產品價格估計明年下半年同國際接軌，到時上升速度便會穩定下來。

股市方面，A股流動市值8萬多億元，居民儲蓄存款中可以投入股市約5、6萬億元，如呢D錢都流入股市，股市可能進一步走高。從外國例子，當正利率達3厘（即利率高出CPI 3%），股市便大幅下跌，中國可見將來唔會出現上述環境。家A股市場正處於高估值階段，市場風險好大，不確定因素好多，投資者宜多注意風險。

2007年中國表現最出色基金收益204％、指數基金升125.4％、混合偏股型基金升97.53％、債券基金升16.86％、貨幣基金升3.19％。今年你投資成績又點？