曹仁超 - 高科技股雁群現象

2007-12-14

12月13日，周四。恒生指數跌776.61，收27744.45；成交1270.98億元。12月期指低水，跌935點，收27589點，代表炒家開始睇淡後市。任志剛話本港銀行可能遭受次按影響而有損失。東亞銀行（023）股價跌3.1％，因中銀香港（2388）話冇計劃再增持東亞股份。工商銀行（1398）跌2.1％，該行宣布持有12億美元次按貸款。中移動（941）跌3.9％、馬鋼（323）下跌3.3％、中石化（386）跌5.5％、東航（670）跌13％。中國東方（581）升19％，收6.44元，獲世界最大鋼廠集團Arcelor Mittal宣布收購，目前已持有中國東方28％。恒鼎實業（1393）升9.1％，因瑞銀推介；東方銀座（996）升18%，見0.3元，公司宣布發行八十億股新股，集資12億元。電視廣播（511）升2％，見45.15元，因明年1月開始數碼廣播。裕元（551）分拆零售業務上市，股價升11.8％，見27.95元。上述再次證明揀股唔炒市。　

內房股因為在內地難以集資，估計唔少將申請來港上市，令未來內房股供應量大增。

滬深三百指數今天出現三周來最大跌幅。寶鋼跌6.8％、鞍鋼跌6.6％、馬鋼跌5.1％。中信證券跌5％、海通證券跌3.6％、宏源證券跌5.8％。

內房股進入冷卻期

理柏中國研究部主管周良認為，11月起內地A股唔再熱。內地股票基金平均跌15.05％、QFII A股基金平均跌13.94％、上海Closed-end基金跌7.34％，呢類大型Closed-end基金兌現價有24.05％折扣。環球經濟展望唔再樂觀，正影響外國人對中國睇法。周良認為，都係「袋袋平安」最好。

一連串宏調政策壓力下，估計農曆新年前廣州樓價有機會回落5-10％，北京、杭州及重慶亦有一定壓力。分析家指出，另一買入內房股時機可能係農曆新年前後，可留意內房股有碧桂園（2007）、綠城中國（3900）、富力地產（2777）、合生創展（754）及世茂房地產（813），策略係逢低買入、逢高莫追，因為有兩個月時間去收集。周小川提及「換屆」效應正在浮現，未來風險係存款準備金率可能上升到16％、兩到三次加息及人民幣加快升值。

10月開始內房股進入冷卻期，例如二手房成交額較上半年高峰期減少50％，價格至今為止平均回落10％。跌幅較大係深圳，漸漸擴散到廣州，然後北京、杭州及重慶。估計明年內地房地產將進入冷卻期，但並非崩潰期，估計一年期利率將上升至4.25厘、CPI增長率下降到4.2％，即負利率時代結束，樓價調整幅度甚至少於美國（更加唔會係日本或香港模式）。因1992至2007年全國房價共上升235％，或平均每年上升8.4％，城市人口收入平均每年則升8.6％。單係深圳、北京、上海等大城市樓價便集中過去五年上升，升幅超過一倍。如單獨睇2003至07年，可能十分嚇人；如拉開十五年睇，便顯得好合理；加上大部分樓按都有30％首期，冇乜大問題出現。

A股至今仍太貴，當流動性問題漸漸解決，A股進一步下調20％機會十分大（雖然10月16日起已下調超過20％）。至於H股，依家O三十三倍，亦係偏貴，有賴QDII及QDRI支持。如內地資金減少流港，略為下調亦好合理。以今年估計純利計，A股O仍高達三十七倍；假設明年純利上升30％，A股仍有下調空間。何況A股總市值29.2萬億元人民幣，係中國今年GDP 115％；如加入本港上市H股及紅籌股，股票總市值係中國今年GDP 160％，上述情況可以捱幾耐？A股市值係資產淨值五點九倍（2005年最低潮係二點一倍），家A股較H股溢價51％（去年初係零溢價）。明年港股直通車開行後，唔排除重返A、H股零溢價時代（至於係A股回落去消除溢價抑或係H股上升去消除溢價，便無法估計；亦有可能係A股回落30％、H股上升20％去消除溢價）。

二線股開始見底

2007年將盡，2008年快來，朋友們希望我老曹參加除夕夜倒數，可惜我老曹呢段日子正忙於檢討過去展望將來。一年之計在於春，呢段Dogfight日子點可鬆懈？對於D能承受一定風險投資者而言，相信早已愛上牛眼投資法，今年唔少二線股又的而且確提供達100％回報。根據吳起兵法：一戰而勝之兵乃勤於操練之兵；二戰而勝之兵乃最可用之兵（已有一定經驗）；三戰而勝之兵乃驕兵，小心驕兵必敗；四戰而勝之兵，乃應解甲歸田之兵；五戰而勝之兵，乃一敗塗地之兵。2004年我老曹初試牛刀，利用牛眼投資法選股，過去四年成績不俗，大部分回報率超過100％。今年我老曹已係四戰而勝之兵，明年應否歸甲解田，以免勝利沖昏頭腦而一敗塗地？所謂用兵之道兵貴神速，速戰速決，有機會便全力進軍，最短時間內賺取最大利潤，然後又頭岳岳。

America is on fire！美國政府正在努力救火，只係水頭有限，結果只能製造大量Deep V（每次股市大幅回落救火隊便出動，又令大幅回落股市出現反彈）。咁情況之下，只有專業分析及個別股份研究報告才能幫到你。簡單買入後持有策略已不管用，你必須知道邊個行業回升、邊個行業進入消化期甚至回落期。利用行業盛衰去制訂你投資策略，以便短時間內爭取50％到100％投資回報。

大摩認為，由10月30日恒指31958點上望，再上升空間有限，因此大市必須調整。11月初我老曹已指出藍籌股進入A、B、C調整浪，依家已完成A浪及B浪，正進入C浪，應略低於A浪。投資者可耐心等候C浪完成才重新入市；反之，唔少二線股11月22日恒指25861點時理論上已完成A、B、C下跌浪，即二線股由11月22日起已重返上升浪（1、2、3、4、5）。恒生指數浪C，極有可能係二線股調整浪2，二線股今年8月起已開始出現調整，因此11月22日起可以二線股市場玩尋寶遊戲。升市弱勢先見頂，8月份二線股紛紛見頂，大藍籌卻要10月份才見頂；跌市弱勢股先見底，因此11月22日起二線股開始見底，反而大藍籌仍在尋底。

花旗推介勝獅貨櫃（716），由於過去兩個月股價已回落25％，因此認為已足夠，12月起重返上升周期。

銀行家有錢唔願借

LIPPER認為，11月份香港股票基金表現失色，年底或須粉飾櫥窗，因此12月份唔好過分睇淡。小心「1月效應」（即12月24日起至1月初，股市有可能莫名奇妙地上升）。

投資二線股，嚴格D講一年已太長，將目光放三至六個月後，即每次投資目標係三至六個月內賺取50-100％回報。利用行業分析（Asset and Sector Allocation Model）作為找尋投資項目，更深一層分析可用Comparison Model去分析行業內邊D股份最好（未必每次都係龍頭股）。上述投資法叫做Target investment，無論牛熊市都適用，目的係三到六個月內追求50％到100％回報。

貝南奇扮演聖誕老人，希望減少信貸萎縮壓力。可惜呢個聖誕老人都幾窮，送禮物都幾唔見得人，例如只減息四分一厘，另透過貼現窗借出有限蚊年。佢唔明白銀行家唔係冇錢借，而係唔肯借，因為貸款者還錢能力好低。好信用者不乏貸款者，但次按便咪搞；唔似格蛇2001年「九．一一慘劇」後供應大量資金甚至出現泛濫，搞到金融機構亂借。當美國樓價進入回落期，係咪仍須過分擔心通脹？CRB商品指數如以歐羅計，去年6月至今其實並冇升幅！油價今年11月已出現M字，金價則出現敏感三角形，都話畀大家聽通脹到需要「停一停、抖一抖」時候。

金融股至今仍然弱勢，高科技股仍然偏強，美國除蘋果、HP、Google、Research in Motion外，英特爾、德州儀器、AT&T呢類硬件生產商股價亦轉強。港股中，軟件公司唔多，但硬件高科技股卻唔少，日後將受惠於高科技回升浪潮。美國3M亦在回升中，即高科技股已出現「雁群」現象（領先上升係最強雁，然後輪到弱D，最後連最弱雁亦可以起飛）。相信本港接近90％高科技股將呢次雁群現象下逐一起飛，有D早一步，有D遲一步；反之，金融股卻一隻接一隻回落。

畢非德CNBC提出美國失業率回升問題，各位亦應注意。畢非德1973年購入《華盛頓郵報》，每1美元投資今天變成100美元（講笑咁講，我老曹1978年投資《信報》，每1港元投資變成2006年150元，威水過畢非德，當然銀碼亦大大大大唔同，此所以佢係股聖我唔係也）。

買石油股不如揀煤炭股

美國減息0.25厘，香港立即跟隨，但恒生指數卻回落。好多人唔明白並非利率高低推動資產價格升值減值，而係信貸寬緊。「信貸」英文叫「Credit」，自拉丁文「Credere」，意思係「令你相信」。點解你肯存錢入甲銀行？因為你相信可隨時提款。點解銀行肯借錢畀甲、乙、丙？因為相信甲、乙、丙有還錢能力。點解2001年1月至03年6月利率由6.5厘減至1厘，股市同樓價仍回落？因為銀行唔信甲、乙、丙有能力還錢，因此唔肯借。係信貸寬鬆令資產價格上升，而非減息。美國減息0.25厘後，美資銀行係咪就變得有「信心」借錢畀甲、乙、丙去買樓同時唔收首期？我老曹所見，未來兩到三季美國信貸仍在萎縮，減息只能減慢信貸萎縮速度，而非改變信貸方向，呢點要搞清楚。2001年「九．一一慘劇」後，聯儲局大幅減息去重建信心，亦需要一年以上時間；呢次次按危機需時幾耐？子曰：「一次不忠，百次不用。」金融市場何時恢復信心？一天、一個月，抑或一年？8月16日聯儲局同歐洲央行等聯手入市提供資金，令美股立即止跌回升兩個月；12月12日聯儲局、歐洲央行、英倫銀行、瑞士及加拿大央行等五大央行，今天加埋澳洲儲備銀行同日本銀行提供資金，道指一度上升超過250點，但收市只升41.13；銀行股Wachovia更跌3.4％、美國銀行跌2.7％。

1月期油回落至93.8美元一桶，未因各國央行聯手注資金融體系而大升。1973年11月石油危機後，香港發電廠逐步改為用煤發電。今天油價接近100美元一桶，本港電費仍在一般人可負擔水平，係有賴以煤發電。印度及中國發電廠大部分用煤發電，亦係嚴重空氣污染根源（霧都倫敦過去以煤發電，今天倫敦變得天朗氣清，皆因唔少發電廠改用北海石油發電）。2030年中國發電能力達500gigawatts，將係今天三倍；印度更誇張，2010年已係今年三倍，仲有南韓及越南，甚至日本亦計劃興建十個煤電廠近郊，減少用油發電。怪唔得今年煤價上升40％，未來點睇？投資石油股不如投資煤炭股。中國已由煤淨出口國轉為淨入口國。至今中國仍出口八千萬到一億噸煤到南韓及日本，未來日韓兩國亦須另搵入口來源。過去一年中國關閉5％煤礦（約八千個），理由係唔安全。印度係全球第三大產煤國，未來本身需求正在上升，越南亦一樣。未來仍有能力出口煤國家得番澳洲、印尼、南非及俄羅斯，未來供應日漸緊張。

SCMP（583）、澳華黃金（1862）、光訊控股（254）停牌。