曹仁超 - 準備迎接「1月效應

2007-12-15

12月14日，周五。恒生指數跌180.81，收27563.64；成交1117.77億元。12月期指升1點，收27590點。進入11月，瑞銀同花旗一再股市減持中資股份，加上淡馬錫及長和系拋售，形成紅籌、國企股如招商銀行（3968）、中石油（857）、北京發展（154）、中海集運（2866）、中國遠洋（1919）、中國銀行（3988）、建設銀行（939）等回落；近日摩根士丹尼亦加入拋售行列。今天國壽（2628）跌1.9％，收40.65元；平安保險（2318）跌3.5％，收82.3元；工商銀行（1398）跌3.4％，見5.72元；中石油（857）跌1.7％，見14.24元。不過，招商局中國（133）升4.1％，見37.05元，因為出售工商銀行（1398）股份賺大錢。

SCMP（583）停牌，大股東增持，由38.09％升至40.04％，須作技術性收購。

滬深三百指數出現本周以來最大單日上升，貴州茅台升7.7％、五糧液升10％、瀘州老窖升8.5％，內需股好吃香。

內房股漸感染秋涼

感恩節後股市回升，我老曹一早已指出只係反彈，希望幫到各位趁反彈減持藍籌股。近日美國銀行業面對嚴峻信貸問題，令股市又再受壓；加上內房股漸染秋涼（感冒），加快令恒生指數回落。漲潮總有落潮時，今年人行已十次提升存款準備金率、五次加息，經濟過快增長勢頭有望受壓抑。呢次只係樓市降溫而唔係地產整體休克；影響之下，香港不但內房股受壓，本港地產股亦由於在地投資漸多而逃不了一跌命運。雖然係咁，各位應準備「1月效應」（即12月24日至1月初股市再上升）此乃典型櫥窗裝飾。近日股市愈係下跌，出現回升機會愈大；唔排除港股下周見底回升。

花旗集團決定為屬下七隻SIV提供580億美元信貸，分別係Beta、Dorada、Sedna、Vetra、Zela、Centauri、Five，避免標普將旗下SIV信用評級進一步調低。穆亦表示正在重新評估中。花旗咁做可防止被迫出售資產，但可能令花旗資本充足比率短缺300億美元。來自阿布扎比投資局75億美元仲未足夠，須進一步注資（9月30日花旗Tier 1比率係7.3％，國際銀行要求最少6％）。

貝南奇減息0.25厘後聯手四大央行（後再加入兩間）救市，有人形容係遲同時太少。注資640億美元（其中400億美元注入美國銀行體系、240億美元注入國際體系），而過去兩星期聯儲局已注資580億美元，即不足一個月共注資1220億美元入銀行體系，反映信貸萎縮速度較想像中快。全球中央銀行加起來，相較次按市場原來係咁無能為力。五國央行聯手注資（後來變成多國）亦只能將隆巴特利率（倫敦三個月同業拆息，唔受政府干擾）由5.06厘降至4.99厘，而非聯儲局4.25厘。亞洲區央行如澳洲只提供8.82億澳元（7.8億美元）、日本銀行提供9400億日圓（84億美元）；印尼銀行、南韓央行、紐西蘭央行數字不明，似乎並唔積極。

聯儲局不能再號令天下

過去二十年（或1987年格老出任聯儲局主席以來）聯儲局顯示佢有能力推高利率同時壓低利率。但各位回望一下過去二十年金融市場係咪風平浪靜？我老曹一再強調唔係利率決定資產價格升降而係貨幣供應（Money supply）。通貨膨脹係指流通貨幣增加唔係指物價上升（流通貨幣增加後，有些物價上升，有些物價一樣可下跌）。美元強勢下，聯儲局可任意增加美元供應量，此乃過去十八年格老管治下面對1987年股災可以增加貨幣供應，墨西哥危機亦可以增加貨幣供應，長期資金服務公司出事更加可以增加貨幣供應；2001年「九．一一慘劇」亦增加貨幣供應。但貝南奇唔可以，因為中國同產油國會隨時擲美元，呢次貝南奇減息0.25厘股市唔升、十八小時後才提出救市計劃，理由係要徵求其他國家央行同意，以免美元進一步轉弱，重演8月16日事件（油價及金價狂升）。今天聯儲局已不能號令天下，只能透過協商，地位同格老時代唔同。呢次注資由於獲其他央行支持，並冇刺激油價同金價上升；政府注資同時冇令樓按利率下降。三十年期固定樓按利率周四係6.11厘（上周五係5.96厘）。樓按利率不但對周二減息0.25厘冇反應，對周三聯儲局注資亦冇反應。依家三個月未供樓者佔總貸款1.31％（第三季佔0.79％）；次按方面，三個月未供款者佔11.38％（去年同期6.78％）。

高科技股進入另一熱潮　　

展望2008年，聯邦基金利率將由4.25厘降至3.5厘機會甚大（即明年有兩次或以上減息機會），因2008年9月聯邦基金利率期貨已成3.5厘。D信用良好公司肯定受惠，因此不應一面倒地全面睇淡；2008年Double your money機會仍然多得很。例如GPS（全球衛星定位）過去只供軍事用途，現在已成為汽車零件之一，而且亦漸漸裝3G手機內，只要開手機別人便知道你邊度。其次亦可將要去餐廳或戲院地點手機地圖上顯示出來及教你點去，估計未來GPS將成熱門項目，帶動高科技股進入另一生產熱潮（今天GPS設備大約你一張CD咁大，估計未來好快可以裝入手機內；至於裝入手提電腦，家技術已可以）。根據研究公司IDC報告，單係美國市場，到2010年呢方面需求已達32億美元。諾基亞已計劃收購數字地圖生產公司（Navteq），代價81億美元。Google近期股價大升理由係計劃推出Gphone，計劃GPS項目上佔重要地位。當然仲有黑莓、iPhones、Treos，到時可以引發另一次換電話熱潮（做父母隨時可知道自己子女邊度，女朋友立即知道男朋友邊處，都幾好玩）。

其他新產品如輕觸熒幕（Touch-Screens）2007年共售出四千萬隻，估計2008年上升一倍，新產品只要用手指熒幕上游弋，已可做到「網上行」或打電話、拍照等等。上述知識產權仲微軟及新力手中，未能普及化。寶馬汽車公司已採用，透過輕觸可以立即知道天氣、控制音響、睇網上地圖等等；亦已應用醫療手術上，完成遙距動手術，病人同醫生相距一千公里，利用輕觸熒幕，一千里外醫生可為病人動手術。

無線寬頻令視像用戶每年登記上升150％。至今市場佔有率僅4％，種隨時隨地可以上網睇錄像、玩遊戲、欣賞音樂會……。依家只係上網聽音樂，美國每年營業已額超過10億美元，可以想像未來上網睇視像市場極大。

二十年前柯達雄霸天下，Lexan、SanDisk生產記憶卡者聞所未聞，2005年數碼相機銷量九千三百萬部，2006年一億二千萬部，估計2010年可銷二億五千萬部；至於用菲林相機漸成古董。

近年美國大藥廠專利權漸到期，股價跌至七個一皮；反之；生物製藥公司股價卻升完可以再升。　　

新事物不斷湧現，舊產品不斷被淘汰，交替中帶來無限商機。

2008年值得睇好能源股係煤炭及天然氣而唔係石油。　　

國家發改委2007年第八十號報告書公布煤炭產業政策，係中國第一次出台煤炭產業政策。一、新建、改擴建礦井規模不得低於十五萬噸一年；二、煤炭產業政策包括十項共五十條，包括產業布局、產業准入、產業組織、產業技術、安全生產、貿易與運輸、節約利用、環保、勞保、保障措施、鼓勵性、限制性和禁止性政策。

明年中國重組中小型煤產，發展大型煤炭企業，將全國煤炭產區劃分十三產區。一個產區原則上由一個主體開發多個礦區，令開採門檻大大提高，估計2008年煤電供應形勢雪上加霜，恐怕供不應求。政策明顯支持大型煤炭企業整合資源，淘汰中小型經營者。長遠而言正確，但短期內將加大煤炭供應短缺。

國家發改委公布，11月份中國七十個大中城市房屋售價較2006年同期上升10.5％，新建商品房售價上升12.2％。雖然深圳、廣州房價已較高峰期逐步回落，上海及北京出現滯銷，但依家無法判斷房價下降係短期現象抑或已成趨勢，而同2006年11月比較，升幅仍太大。本周內地內房股跌幅較大，如華僑城跌17.72％、金地跌17.71％、泛海建設跌19.87％、保利地產跌16.47％、招商地產跌15.71％、萬科Ａ跌12.29％。

內地賣地首次跌價有啟示　　

1981年8月港府賣地出現自七十年代起每次賣地必升以來首次回落，到1981年9月本港地產股亦大幅回落，到1982年年底香港樓價較1981年8月回落三分一。

1997年8月港府賣地再出現1984年以來首次回落，其後地產股大幅回落，樓價到2003年年中回落65％。

香港房地產每隔十年便有一次大幅度調整。內地自1998年開放商品房市場後，地價、房價一路走高，從未見過地價下跌，12月6日廣州及廈門政府公開拍賣土地卻出現下跌，接內房股股價出現較大幅度調整，係咪有啟示作用？　　
房價一路走高過程中，一些打算明年後年才買房子人眼見樓價急升，被迫提前購房，形成一個購房高峰期。我地會睇到發展商銷售收入較完工量高出好多，理由係三年購買力集中一年消耗。一旦房價逆轉，買家會突然變得非常稀少，理由係明年後年購買力今年已消耗；其次反正樓價在跌，急乜？發展商方面因預售樓花收入大增，自然擴大生產，拚命買地；一旦銷售減少，立即減少買地，反而加快建房交貨，免被買家放棄，市場一下子又出現供過於求。此乃房地產每隔十年便有一次較大調整理由。

1984至97年香港地產繁榮期卻長達十三年，理由係1994年原本出現調整，卻因香港主權回歸帶來經濟繁榮，1995至97年理應回落，卻變成上升，亦因此帶來1997年9月至2003年6月較大調整。內地冇回歸因素，相信十年內出現一次較大調整分析仍管用，恐怕1998年起樓價一路上升期2007年10月起出現調整機會好大。

另一因素係新興國家（或地區）有人口紅利期，即當地人均收入由貧窮走向小康，再走向富裕引發買樓狂潮。香港人口紅利期由1967年開始至1997年結束，人均收入由每月250元到每月16000元，上升六十四倍，中產階級人口由佔社會上少數變成大多數，大量人口需要置業安居，形成本港樓價爆炸性上升，一般住宅樓價由不足每方呎100元升至12000元，上升超過一百三十倍，此乃我老曹過去強調黃金三十年。

A級同B級物業仍便宜30％

聯合國研究指出，一旦人均收入超過20000美元一年，GDP增長率迅速放緩。我老曹從各大城市發展觀察所得，係同時出現20╱80現象，即20％人口收入不斷上升，80％人口收入卻不前。1997年7月起，香港便進入20╱80現象，20％人口收入仍不斷上升，為改善居所環境而出現細屋搬大屋現象，此乃2003年9月開始本港豪宅價格狂升背後理由。先上升係E級物業（即一百六十平方米以上），全港只有二萬二千七百六十三個；然後係D級物業（即一百至一百五十九點九平方米），全港只有五萬四千七百七十八個。今年已係樓價復甦第五年，連C級物業亦吃香（即七十至九十九點九平方米），全港亦只有十二萬一千四百零四個。三類物業加起來共十九萬八千九百四十五個（2006年數字），相等於全港家庭10.8％，即全港20％收入上升家庭度競爭呢個10.8％供應量。換言之，每兩個家庭中只有一個可完成願望；反之，B級物業（四十至六十九點八平方米）及A級物業（二十至三十九點九平方米）成為細樓換大樓中被拋售對象，形成呢次由2003年9月開始樓價上升潮中落後者（尤其係二十至三十九點九平方米更係最大落後者）。

今年E級物業售價早已超過1997年8月；D級物業已同1997年8月睇齊；C級物業亦漸接近1997年8月售價，但B級同A級物業仍較1997年8月便宜30％左右。

許多人都想成為Trader，今年8月至今股市咁波動有幾多個Trader真正賺到錢？

Trading並非如想像中容易。例如一、面對止蝕時你是否面不改容？二、你事前有冇策略？三、Trade Small，例如只動用全部資金十分一做Trading，才容易做到平常心；如將全部資金做Trading，患得患失心情令你做錯好多決定。四、生活習慣，如你只有足夠時間睇五、六隻股份，有冇太貪心而睇一百隻股份走勢？五、不理每天上落，只留意D較大擺動。六、冇預先目標，一切隨市場上落而定。七、冇失眠，一有虧損立即離場。八、唔聽收音機、唔睇電視台金融分析，因為佢地言論令你不安。九、過畢非德生活（唔吸煙、唔飲酒、冇夜生活，最大娛樂係睇各公司年報）。十、不關心金錢。根據Mark Douglas研究所得，成功Trader目的唔係賺錢，而係Trading過程帶來無窮樂趣，因此可以唔從金錢角度睇問題。