曹仁超 - 恒指減息前後見頂

2007-12-05

恒指減息前後見頂

12月4日，周二。恒生指數升221.17，收28879.59；成交882.29億元。12月期指升498點，收29102點，高水。新鴻基地產（016）升3％，見167.1元；長江實業（001）升1.9％，見152元，主要炒聯儲局12月11日減息。中聯通（762）升1.9％，收 16.98元。　　今年至10月30日止股市內容易賺嘅錢已經賺咗；至於11月22日起嘅反彈只係聖誕前後反彈，估計可令恒指接近30000點，然後再回落，唔排除恒指响12月11日前後見頂。

滬深三百指數升1.18％，收4829.21；寶鋼升5.2％、鞍鋼升6.4％。中國第九大鋼鐵商首鋼資源辦公室專務部長陳漢宇接受訪問時話，中國鋼鐵生產商同政府正研究聯手投力拓礦業，阻止必和必拓收購方案。

收市後外傳中聯通（762）一位股東要求以每股16至16.2元出售一億五千萬股，由摩根大通搵買家。

11月份美國製造業增長率降至十個月內最低，令原材料價格進一步回落，亦令日經平均指數跌1％。

OECD估計，以購買力來說，計歐羅只值1.17美元，英鎊1.62美元，依家歐羅偏高25％，英鎊偏高28％，加元更偏高30％；以購買力計，美元值1.23加元及124日圓，日圓偏高11％。

2008年可睇好美元

2008年值得睇好貨幣係美元唔係外幣，美元滙價偏低不但吸引全球人到美國消費，而且購買美國物業，支持美國房價。

短期而言，因美元仍有減息壓力，响減息周期未完之前，上升空間有限；一旦美元停止減息，小心美元大幅上升。

貝爾斯登估計，滙控（005）明年純利下降13％（事前估計上升0.6％），今年純利亦由170美仙下降至163.3美仙；上述消息令滙控股價响倫敦跌1.3％，成811便士。

近日對港股最大爭抝係恒指由11月22日25861.73嘅回升，到底係反彈抑或係另一升市開始？如果係反彈，最大阻力位响29600點，家吓已相當接近宜減持；如果係另一升市開始，當然係趁短期回落吸納。唔少二線股由今年7月開始調整，至今已完成A、B、C調整浪（如反彈後再跌，就唔再係調整浪，變成 1、2、3、4、5下跌浪，出現跌市弱勢先行）。大藍籌由10月30日恒指31958點回落至11月22日25861點，只完成浪A，依家行緊浪B， 2001年內地股市由O見七十三倍時開始熊市，今年10月16日內地股市O一度見七十五倍【圖】，然後出現20％調整，後市令人幾擔心。支持今年高P/E理由係內地企業2007年純利升幅達40％，但2008年又會點？1988年日本企業純利上升20％，1989年再升25％，當1990年純利再無法保持上述增長時，引發日股大熊市。高P/E必須有高增長（G）支持，例如O二十倍，純利升幅20％，便值得投資（P/E除G少於1），滬深A股2007年10月17日P/E七十五倍，今年純利增長率40％， PEG係一點八七五倍已屬危險；因純利升幅大於40％係無法長期保持。大部分企業純利年增長率少於20％，如2008年內地企業純利只升20％，PEG高達三點七五倍便險上加險。

內地又再批出QDII基金，即又再有資金由內地流入港股，令港股受惠，A股同H股差價正在收窄中。受港股直通車計劃及QDII基金刺激，H股由8月20日至10月30日升幅好大，甚至10月16日起A股回落亦冇影響本港H股上升，但11月溫家寶講話，加上內地A股進一步回落，上月H股調整幅度十分大。12月又係點？由此可見，H股極受內地政府政策影響；而中國政府改變政策，事前卻不可預測。

部分H股本身業績已可支持股價，如哈動（1133）、華潤電力（836）、中國網通（906）、鞍鋼（347）、深圳高速（548）、中國神華（1088）等，未來下跌風險有限，或可考慮吸納。

其次係中國內需股如國美（493）、華潤創業（291）、蒙牛（2319）等。
內地房價進入「拔河」時刻

中國煤炭工業發展研究中心主任郭雲濤12月3日响一個會議上表示，明年煤炭價格上升幅度將保持10％左右。

內地房價則進入「拔河」時刻，有人對明年樓價感到焦慮，亦有人繼續睇好。11月份北京樓市新開盤項目及預售項目均價都喺18000元╱平方米以上，較 10月份回落5％；成交較去年同期下降11.8％，成交面積更下降16.2％，出現價漲量跌嘅形勢。中天置業總裁蔣飛捲款而逃案件中，公司用客戶資金炒房，以個人名義買入深圳地王大廈數十個商舖，耗資5000萬元以上，並以親朋戚友名義申請按揭貸款，近期因成交量跌而賣唔出去，搞到要着草，11月深圳二手房銷情亦大受影響。

2002╱03年港股P/E相較美股市場係大落後，經過五年發展，2007年港股P/E不但同美股睇齊，甚至略為超前，過去追落後優勢已失去，吸引力只餘下中國概念（外國人睇好中國，卻不能直接投資A股，只有投資港股）。11月响美國掛牌嘅中國基金市值卻低於資產淨值，11 月起恐怕連中國概念暫時亦失去吸引力。至於11月22日開始上升相信係炒12月11日減息而睇好香港房地產股。今年9月起，香港中價樓（指一千呎左右）已上升20％或以上；反之，豪宅卻無法更上一層樓；下價樓因供應充足，升幅亦極之有限。今年9月至今，中價樓上升20％後，明年能否再升20％？今年香港人平均加薪只有5％，明年美元利率只能再減半厘，美國GDP增長率卻放緩，明年恐怕香港樓價難以再升20％。

至於高科技股。過去由概念到發明、生產、改良，到別人模仿，需時最少十年，一個產品周期約十一年。今天新產品面世唔使三十個星期已通街都係模仿產品，而令高科技公司邊際利潤急跌，形成高科技股今年獲利但明年純利已急跌，你話難唔難玩！

平嘢冇好?好嘢唔平

投資唔係買便宜嘅公司，所謂「平嘢冇好、好嘢唔平」，而係買大證券行over-looked或under-researched嘅二線股。當呢D二線股業務進入「拐點」（例如轉虧為盈或純利進入高增長期），前景秀麗；最出色二線股係三幾年後可列入恒生指數成分股，成為熱門股，不過，呢類二線股唔容易事前搵到。

不追隨群眾（例如2001年冇幾多人睇好資源項目，今天連牛頭角順嫂都話買能源股、礦產股），以中長線角度去找尋企業（唔係股份），把自己視為該企業小股東而非投機客，係投資成功必要策略。

以上述角度思考問題，2008年可睇好項目係內需股同高科技股，如何以合理價吸納內需股同高科技股，則係一門學問。

Michael E. Lewitt（Hegemony Capital Management主席）認為，2008年美國經濟陷入衰退可能性極大，理由係房價仍在滑落及金融系統過分投機。高盛證券認為，三分一美國企業已陷入衰退，但部分行業反而因此受惠。過去六年來自物業加按產生1.1萬億美元，相等於同期消費金額46％，甚至2007年首九個月來自樓宇加按亦提供2190億美元消費金額（房貸美估計）；2007年第二季住宅樓按揭金額10.143萬億美元，相較於1999年4.295萬億美元，即過去六年按揭金額上升 136％。物業按揭利息佔去美國個人收入由2002年嘅64.7％，上升至今年嘅100.2％（理論上2007年美國個人收入除稅後只夠供樓利息）。如失去物業加按產生新消費力，點樣支撑美國2008年消費繼續上升？2007年Shiller Real Housing Price Index同十年移動平均價比較，較1989年（前樓市高點）高出58％，較過去一百年美國平均數高出94％。2007年12月至08年12月有8000 億美元樓按利率必須重新訂定，因此Michael E.Lewitt認為，2008年內美國經濟陷入衰退機會極大！依家各大金融機構合組super-SIV去協助ARMs貸款戶，但呢個做法只係將問題推遲而非解決問題。花旗集團集資75億美元可兌換股債券，願付利率十一厘，可見問題嚴重性。今次發債目的係為第四季次按撥備（估計100億美元）後，集團仍有錢派息！

今年標普已將三百八十一隻住房按揭有關CDO降級，仍有七百零九隻在觀察中；穆廸已將三百三十八隻降級，七百三十四隻在觀察中。各位係咪相信次按問題因聯儲局12月11日減息0.25厘而獲得解決？

通用汽車去年出售51％ GMAC，今年為手上49％GMAC減值7.57億美元，因為今年第三季GMAC旗下Residential Capital LLC跌至62億美元資產淨值（一年內失去22億美元）。該公司2008年有45億美元債券到期。通用已表示唔作任何擔保，除非大股東Cerberus願意注資45億美元，不然ResCap明年都幾難過關。

11月20日房貸美宣布第三季虧損20.3億美元，令核心資本減少三分二，只有6 億美元，但標普仍給予該公司所發債券三A級評級，理由係基於一項假設，即政府唔會放棄房貸美。公司已宣布尋求60億美元注資，令周一股價再跌，政府係咪願意承擔上述注資？OECD認為，美國次按虧損達3000億美元，較今年8月聯儲局入市支持時估計大兩至三倍。許多人認為OECD估計仍然不足。

國際銀行踏入康復期才投資

次按問題一籮籮，上述只係其中一小部分，我老曹認為仲係避開為佳，因為保本較賺錢更重要。今天唔係2003年第二季，應否係股價已大幅回落嘅跨國銀行做 bottom fishing？如果你擁有阿聯酋一樣多嘅財富，當然可以咁做。作為散戶，寧買當頭起，當國際銀行踏入康復期才投資不遲；捕捉下跌中嘅利刃，只有頂尖功夫嘅武林高手才可以做得到。

今時今日股市仍係牛熊共舞，勝負未分，投資者情緒好易由一個極端走向另一極端，2007年投資大方向係減持金融股，持有資源股同原材料股，如同時空美元揸歐羅便贏晒。今年11月資源股同原材料股亦回落，美元滙價似乎見底，2008年又點睇？美國GDP增長率放緩對全球經濟活動有何影響？2008年投資策略係點樣喺次按危機中找尋機會，對大部分散戶而言要求未免高咗D。

社會上分兩種人：一、賺錢目的係為咗消費，80％普通人嘅行為。二、賺錢跟花錢係兩回事。賺錢過程中已帶來開心，賺錢目的唔係為花錢而係為賺更多錢。所以佢會不停咁工作、不停咁投資，目的只係賺更多錢，因為喺賺錢過程中已為佢帶來快樂；社會上20％人口擁有上述性格。呢類人如果有足夠運氣，加上眼光同分析能力，逐漸成為小富甚至大富。但財富嘅多寡完全唔影響佢嘅消費行為，佢响消費方面依然故我；反之，賺咗錢後亂花錢者只係80％普通人，佢嘅樂趣在於花錢唔係賺錢，一旦運氣離佢而去，好容易變回普通人；只有將賺錢同花錢分開嘅人，呢類人嘅財富才不斷累積，因為佢嘅樂趣來自賺錢而非花錢。佢會把工作放喺第一位（因為工作帶來樂趣）而非消費。你屬於邊類人？寓工作於娛樂抑或賺錢目的為咗花錢？