工作與消費的惡性循環

2007-11-29

工作與消費的惡性循環

11月28日，周三。恒生指數升161.03，收27371.24；成交1040.27多億元。11月期指高水升325點，收27430點。新地（016）升6.3元，收152.1元；恒生（011）升4.4元，收143.7元。但滙控（005）跌1.3元，收129.6元；太古A（019）跌 1.05元，報97.05元。中國重汽（3808）首日上市，收10.86元，較招股價跌一成半。睇嚟申請新股熱潮在退卻中。 獸性引發非理性拋售

滬深A股跌1.32％，收4648點，由10月16日至今指數跌幅已超過21％；寶鋼跌2.7％、鞍鋼跌3.7％、民生銀行跌2.8％、工商銀行跌2.2％、保利地產跌2.1％。

中央電視台引述中國共產黨政治局會議報道，政府將採取措施防止經濟過熱及控制通脹。歐盟貿易專員响北京接受訪問時話，歐盟在調查中國鋼鐵進口價格過低，因此可能對中國鋼鐵進口徵收懲罰性關稅。全球市值最大保險公司中國人壽（2628）宣布削減股票投資，以降低風險。

明年中國GDP增長率將放緩，唔排除A股進入回落期。美國GDP增長率放緩及歐洲對中國貨入口出現抗拒，估計中國內需仍可上升，彌補出口增長率減慢嘅影響，明年純利仍可保持大幅上升嘅企業相信只有內需股。可惜中國內需股O已唔低，响揀股方面好難落手。

上周油價見99.29美元一桶後開始回落（1980年4月石油最高價如加上通脹調整，相等於今天102美元）。下周OPEC開會後，每天可能增產五十萬桶石油，相信明年春季油價回落到70美元一桶嘅機會好大。

美股忽上忽落，估計上述情況繼續嘅理由係長線睇唔清，股市由短線投機者作主，出現炒上炒落嘅局面。隨着信貸危機表面化，金融項目被拋售，原材料價格出現退潮，令唔少礦務股面對調整，因為擔心美國GDP增長率放緩將影響原材料需求。

根據新嘅神經研究科學分析，人們對壞消息或跌市嘅反應情況有如向一隻咆吼中嘅獅子揚起紅色物件一樣，可立即令脈搏上升、呼吸加速、血壓上升及肌肉緊張，情緒上出現恐懼及憤怒，因情緒控制腦袋而做出毫無意識行為，引發原始獸性。換言之，一旦被恐懼或憤怒控制自己，便會唔自覺咁作出非理性拋售，而唔會再用理性分析事物。當人處於恐懼及憤怒之時，往往可產生杯弓蛇影現象，此乃人嘅獸性。唯一避免方法就係當開始感到恐懼及憤怒之時，最好停止「行動」，設法令自己重新冷靜下來，令自己再次由理智控制情緒為止，唔好畀恐懼及憤怒支配自己嘅行為，因為此乃獸性。

內地金融股亦須避開

市場繼續受美國次按危機困擾，由於我地唔知各銀行介入次按問題有幾少，惟有避開。過去以為中資銀行應唔會介入美國次按問題，結果一樣令人失望，只係程度上較少，因此今年下半年連內地金融股亦須避開。畢非德教落，投資第一教條係唔好輸錢，第二條係唔好忘記第一條。成為有錢人方法有二：一、賺得較別人快，呢個方法人人明白；二、當大部分人都輸錢時你並冇損失。

在股票市場更能反映「Big Idea」嘅威力，一個良好嘅意念往往為投資者帶來巨大財富，例如喬布斯重新加入蘋果，一間電腦公司看似平平冇乜前途，响電腦市場有如一隻「蚊」，其他巨無霸可能一隻手指都摔死佢。喬布斯既無市場推廣能力，冇強大銷售網絡，亦冇大工廠，只有一個良好意念叫做iPod，甚至唔係新產品，只係將現存產品改良得更好而已，其後再推出iPhone，兩個良好意念，令蘋果股價上升三十二倍。今天萬威科技（167）公布今年4月至9月企業轉虧為盈，方法係放棄低盈利產品加入高盈利產品，扭轉過去兩年虧損狀況，係咪另一隻為投資者日後帶來驚喜嘅股份？

佛家話一念成佛，企業成功與失敗，往往亦在領導層一念之差。

努力工作出現遞減效應

科技進步理論上可令人類有較多閒暇時間。電話嘅發明理論上可減少人類交通量，結果剛剛相反。互聯網普及，人類可以喺任何地方工作而唔使返寫字樓，結果反而令唔少寫字樓出現二十四小時操作。當你賺得100萬元時，理論上應好好享受財富，結果反而令唔少人更加努力去賺錢；當你賺得1000萬元時，連享受財富嘅時間都冇，大量投資項目及會議等住你去處理……。人類已進入「努力工作，拚命消費」嘅惡性循環而不能自拔（包括我老曹在內），遞減效應（Declining marginal utility）自七十年代亦喺香港隨處出現。例如全香港只有一個大商場時肯定人山人海；當香港擁有一百個大商場時，能否做到每個商場都人山人海？一百個大商場互相競爭，結果令每個商場嘅投資回報率皆下降……。同樣理由，2007年港人較1970年更努力工作，結果反而令每一個港人嘅實際收益唔及七十年代。

上述係大部分中產階級已患嘅都市病！工作目的係為咗消費，消費目的係去證明工作嘅價值。今天本港中產人士即使減少90％消費，問題唔大，但整個社會（甚至可以講整個地球）都無法停下來──工作及消費已成為人類生存嘅唯一意義。美國信貸危機出現，會否令上述趨勢出現改變？即未來人類將減少工作量，同時減少無謂消費？

次按危機不斷湧現負面因素，聯儲局卻不斷減息及注資去令美國GDP保持增長，形成股市每次惡性拋售後又大幅反彈，甚至令指數創新高，直到有一天出現一浪低於一浪為止。11月份恒指回落，唔少散戶資金被綁住，12月後市點睇？周二美股响聯儲局注入80億美元資金後，道指又升217點，十年期債券孳息率回落至3.95厘，Hunt for Bargains係咪又開始？UBS叫大家「Buy on the Dip」又係咪正確？高盛預測明年年中聯邦基金利率將由依家嘅4.5厘減至3厘去阻止信貸收縮，你又信唔信？

恒生指數由10月30日 31958點回落至11月22日25861點後，係咪又再向上炒？不過，喺香港上市嘅內房股同過去三個月內高點比較，跌幅30％以上嘅內房股超過90％。三隻10月上市嘅內房股SOHO中國（410）、中國奧園（3883）及眾安房產（672）皆跌破招股價，同期恒生地產分類指數跌幅只有12.2％。受中國政府調控政策影響，內房股上述跌幅係咪足夠？至今意見仍有分歧。內房股响內地A股市場IPO難度較大，到香港上市程序相對簡單，形成今年下半年一片內房股來港上市熱潮。高盛報告指出，內房股遭受沉重拋售理由之一係內房股股價早已透支咗基本面，發生深幅調整在所難免。另一擔心係內地政府將通過稅收增加交易成本去調控樓市。本港上市地產公司嘅市價往往低於資產淨值，過去內房股卻享受市價高出資產淨值嘅待遇。响較多內房股來港上市後，上述優惠漸漸唔存在，家吓至少仲有三家申請上市，就係恒大地產、星河灣及卓越集團，即未來來港上市內房股供應量進一步增加。

加拿大《金融郵報》發表文章，認為中國、南韓、印度、新加坡喺經濟強勁增長及需求帶動下，樓價都一路狂升。响所有亞洲市場中，中國樓價最火熱，面對風險亦愈來愈大。文章認為，中國房地產貸款所面臨嘅危機較美國更加嚴重，因為許多貸款申請人向銀行提供之有關資產及收入係假嘅，因為中國仲未有綜合性嘅信用信息制度，銀行根本上冇法知道借款人提供嘅訊息係真係假。

中國建設銀行（939）最近亦發布咗一個報告，警告同業依家中國正進入個人房貸高危機期。

內地有「九金十銀」之說，但今年9月同10月內地房產成交額卻大幅下降，11月至今未見起色。雖然樓價仍未見出現較大變化，但成交額卻大減，令人擔心內地樓價係咪已到咗轉捩點？

中國新《勞動法》明年1月1日開始實施，其中最大改變係，除非勞動者接受過單位培訓或有保密協議及競業限制協議，不然勞動者毋須向單位支付任何違約金；即明年1月1日起勞動者離職毋須向單位作任何補償。

國防科工委最新統計數字，有十萬多項軍工技術轉為民用。依家三分二軍工科研生產能力已轉向民用。

過去中國軍工企業多依靠國家投入，响資金緊缺期自然影響發展，如剝離成為民品再上市，可以唔受國家資金緊缺影響。問題係點樣將相關軍工企業轉為民品企業，呢個過程往往複雜而耗時較耐。

中共十七大已明確提出，加快中國特色軍事變革，提高軍隊應對多種安全威脅，完成多樣化軍事任務嘅能力，去維持國家主權、安全及領土完整。未來中國國防科技工業改革將走股份制，因此上市係遲早出現嘅事。其次係資產注入形成「寓軍於民」產業格局。除核心部分，其餘响股改完成後逐步上市，部分軍工業務可逐步將資源注入上市公司。

首先係航太科工集團，以發展火箭為主，資源整合及上市應比較順利。

軍轉民企業上市將成生力軍

至於大飛機專案，主力係中國航空工業第一集團，於1999年成立，擁有大中型工業企業四十七家、科研院三十一個、專業公司二十二個、員工二十四萬，總資產1000多億元，已有四家上市公司，目標係發展飛機業務。去年西飛國際已與波音公司合作生產747嘅零部件，計劃發展成為飛機製造呢類資產嘅平台，生產民用飛機，作為日後生產軍用飛機嘅平台。中航精機則生產各類精密衝壓模具研究、設計、開發及製造、銷售業務，向民企供應精沖製品，亦可成為集團生產航空生命保障系統裝備嘅平台。貴航股份主要生產汽車、摩托車零部件供生產汽車之用，必要時可轉為軍用。力源液壓則將軍用液壓泵、液壓馬達業務轉為民用……。

換言之，今後一段時期，整個軍工企業進行股份制改造、建立現代企業制度、產權制度、法人治理結構，提升管理效率，成為機制靈活、決策科學嘅新型軍工企業；建立有效激勵機制及風險制約機制，使其成為市場主導。除核心技術及國家戰略安全外，一律可以申請上市。引入境內資本和有條件地允許外資參與，發展軍民兩用產品，將軍工企業响國內外上市融資，加快國家武器裝備嘅研發能力、生產能力，令武器裝備喺公平競爭環境下生產及研發，國家只提供稅收優惠政策。明年唔少軍工轉民用企業上市，將成為股票市場另一生力軍。

華人置業（127）、至祥置業（112）停牌。