曹仁超 - 利用Deep V搵食

2008-01-10

1月9日，周三。恒生指數升502.95，收27615.85；成交1203.2億元。1月期指升幅較細，只有392點，收27560點。技術上睇，恒指在26750點附近有強大支持。今天香港正處於美國（冷卻）及中國（過熱）中間，形成冰火二重天。聯想（992）跌10.36％，見5.88元，係2006年11月10日以來最大跌幅，里昂降低其評級，理由係中國2008年1月1日起實施新勞工法，將令聯想勞工成本上升24％；京華山一太平洋分析員則擔心美國可能陷入衰退，影響聯想電腦嘅銷售額；估計聯想2008╱09年度獲利28.4億元，較2007╱08年度減少31％。中海油（883）升4.7％，報13.9元；新地（016）升2.4％，收172.8元；長實（001）升2.4％，見146元；利豐（494）跌2％，報27.4元；招金礦業（1818）升9.6％，見41.1元；紫金礦業（2899）升2.5％，見13.1元。

英樓價回落拖累零售業

金價在香港成891.7美元一盎斯。上海期金開市成223.3元人民幣一克，升6.34％；成交共十萬三千三百五十八手。滬深A股上升，中金黃金升3.6％、山東黃金升3.8％、江西銅升5.2％，因上海期銅升4％停板。八一鋼鐵亦升停板。

英國馬莎百貨股價跌18％，因假期嗰段日子營業額減少2.2％（事前分析員估計升1.1％）。去年馬莎股價已回落22％（2005-06年升幅則超過一倍）。英國第三大服裝零售商Next股價亦跌8.5％，百貨公司Debenhams跌12％。受樓價回落影響，英國零售業出現不景氣。

六十二個經濟學家認為，今年美國經濟出現衰退嘅機會仍只有40％，估計上半年GDP可升1.5％。債券擔保者MBIA及Ambac分別跌16.7％及20.7％，E*Trade Financial再跌20.5％。雖然Countrywide Financial否認破產，股價仍跌28.4％，收5.47美元。睇嚟次按危機繼續困擾今年美國股市。

高科技股指數MS High Tech Index亦出現頭肩頂走勢，擔心去年7月開始上升嘅高科技股亦告不支，例如蘋果股價同RSI背馳，RIM已跌破頸線。PHLX Semiconductor Index支持位亦告失守，即今年高科技股亦非避難所。今年美國經濟增長率肯定減慢，ISM指數已低於50跌至47.7，係2003年4月以來最低，代表失業率開始向上。未來股市肯定choppy，投資者應該defensive。貝南奇本周四將發表新年展望，下周三（16日）美國公布12月份CPI。2008年嘅變數十分多，例如連2009年美國總統係黑係白、係男係女都唔知，點做分析？最好方法都係晚上祈禱希望上天賜我們智慧，令自己唔再做傻事。聯儲局極有可能在月底減息半厘去頂住個樓市，美股現價係咪已超賣可博反彈？木宰羊。Trading唔係人人可以學嘅投資技巧。

美國credit crunch仍未解決，反而在惡化，唔少資金走去揸黃金。1月7日ETF公布共持有黃金高達六百三十九點三五噸，由此可見投資界對黃金需求有幾大。2008年係金光閃閃年，黃金已成為全球最強勢嘅貨幣，不但跑贏美元，甚至跑贏澳元、加元同人民幣。巴基斯坦局勢亦令印度更多資金流入金市。

台灣國民黨相信將在今年大選中勝出，令民進黨要求台獨嘅努力受挫敗。3月22日總統選舉，估計將結束阿扁八年管治，令國民黨回朝，理由係過去八年阿扁統治下台股仍未重返2000年2月19日嘅10393高點，仍差22％，情況一如1990年2月10日台灣加權指數12495點、到2000年2月10日12494點令國民黨下台一樣。在民主國家，政治是為經濟服務（只有在共產國家，經濟才為政治服務。2004年白眉董下台嘅理由亦係由1997年7月1日起香港經濟搞唔掂）。阿扁最大失策係阻止台灣的半導體企業投資大陸，亦阻止大陸資金投資台灣公司。根據TVBS 1月1日民調，周六立法院一百一十三個席位中，國民黨可得七十五個、民進黨只得三十一個（民進黨自己民調則認為可得五十個）。

台灣經濟或大選後起飛

經濟繁榮有賴四通八達。民進黨一再抗拒三通，令台灣經濟停滯不前。1950年韓戰，聯合國宣布對中國禁運，毛澤東提出自力更新去應付，大如中國，因閉關自守，經濟亦搞唔上。1978年鄧小平提出改革開放，1979年訪美時卡達總統恢復中國最惠國地位（MFN），中國經濟重新同全球接軌，到2001年加入WTO，令中國經濟全面起飛。

今天中國已建成「五縱九橫」（五條由上至下嘅超級公路、九條由左到右嘅超級公路），不但沿海省市同全球經濟接軌，內地省市透過「五縱九橫」亦互相連接起來，為中部崛起、中西區崛起創造有利條件。分析家指出，中國GDP仍可保持二十年高增長。今天中國GDP早已超英趕美，估計到2025年可超過日本，2040年超過美國，成為全球最大經濟體系。戰後美國亦因超級公路建成而有二十五年經濟起飛期，2008年中國超級公路建成，出現二十年GDP高增長期並唔令人詫異。如果响呢個時候台灣經濟重新同大陸接軌，台灣經濟進入另一次起飛期並唔出奇。去年我老曹唔少朋友已去咗台北買物業，等候阿扁下台、台灣經濟進入另一次起飛。

今天恒生指數擺脫道指嘅影響，出現你跌我升嘅情況，如美元繼續減息下去，本港住宅樓價今年進一步上升15-25％唔奇。滙豐分析部指出，如香港樓市興旺，香港經濟都唔差得去邊。我老曹在去年11月建議各位在恒指32000點減持、接近26000點增持，在上落市中玩「輪流炒」。Buy the dip乃去年第四季起嘅投資策略，利用Deep V去搵食，直到有一天恒指26000點失守，才制訂新嘅投資策略。

根據中國人智慧，當一道門關上之時，必有另一個出口出現。換言之，當次按危機浮現時，市場必有其他出路，例如科技股同農產品股，甚至能源股及金礦股……。天無絕人之路，只有坐以待斃者才會死，努力尋找出路者，一定可逃出生天。最危險嘅地方亦只係「九死一生」，即仍有一條生路可走。世上唔會窮途末路，只係人自己睇得太消極而已。今天嘅上市公司超過一千間，真係冇一隻值得你投資？事實上，每月總有部分股份升到你唔信，只係你自己冇射中「牛眼」，問題只在於你有冇呢方面知識、洞察力及堅毅不屈嘅性格去獲取財富。去年無數散戶已在股市賺取1000萬元或以上利潤，理由係買中兩至三隻高飛股，令自己嘅資本Double、Double再Double，其中大部分係仙股，採取嘅策略係止蝕唔止賺，蝕就蝕15％，賺就最少賺一個Double。

John Templeton 1954年成立Templeton Growth Fund，當年每1萬美元投資，到1999年變成550萬美元。1986年投資1萬美元在微軟，今天變成229萬美元。

John Templeton出身貧窮，1939年（離開學校後五年）因極之睇好當年二線股，可惜無錢買，而向上司借入1萬美元（相當於今天13.5899萬美元嘅購買力），開始佢嘅投資生涯。佢買入一百隻二線股，蝕本者賣掉、賺錢者留下，到1943年佢已有4萬美元（兼清還所欠1萬美元）。1992年佢將自己創立的基金事業以4.4億美元出售畀今天嘅管理公司Franklin Resources Inc，並在巴哈馬群島過住豪華生活，兼繼續投資二線股。今天佢嘅財富估計超過20億美元。佢由1939年一無所有到2007年擁有20億美元財富，你可以嗎？點解唔可以？

過去英國、歐洲、日本、香港等地嘅汽油零售價中，有三分二係稅，三分一才是原油成本。上述結構形成原油價由10美元升上100美元，而英國、歐洲、日本、香港等地區汽油零售價只上升三分一左右。

樓價漲升歸因地價上揚

目前美國汽油零售3.11美元一加侖，相等於6.4港元一公升；香港依家賣13至14元一公升，其中50％係稅。汽油成本上升，本港汽油零售價升幅只有30-40％左右，反而唔覺得好貴；美國因為油稅十分低，所以認為3.11美元一加侖已好貴（其實仍較香港便宜50％）。美國會否一如高盛估計，油價一旦升至105美元，便引發美國人減少其他消費開支？2002年至今金價以美元計上升240％、油價上升270％，即係話用金價計油價升幅極之有限。目前見到嘅原材料價上升，好大程度由美元貶值及濫發所造成。

2002年至今香港一般樓價上升100％（豪宅升幅更達200％）；如以金價計，本港樓價不但冇上升反而回落。自1971年美元同黃金脫鈎後，美元嘅購買力平均每年回落5％。今天100美元購買力相等於1971年15美元。如你的投資每年只上升5％，代表你只能保值而冇升值。

許多人以為樓價升咗，其實樓價冇升，只係地價在升升跌跌。2003年至今豪宅升幅點解咁大？因2003年豪宅每呎售價6000元，其中1500元係建築成本、4500元係地價。地價上升400％見18000元，建築成本仍是1500元左右，令豪宅升至20000元一呎。反之，天水圍住宅2003年賣1300元一呎，其中800元係建築成本、500元係地價，目前升至每呎2200元，反映天水圍地價升幅只有150％，便形成兩者差價進一步拉闊。2003年大約五呎天水圍樓價換一呎豪宅，今天十呎天水圍樓價才交換一呎豪宅。換言之，經濟愈繁榮，天水圍樓價同豪宅差價愈拉愈闊；反之，兩者差距接近。理由係1997年香港已基本上解決居住問題，新需求來自改善居住環境，此乃豪宅與普通住宅樓價拉闊嘅理由。過去五年豪宅售價上升200％；反之，天水圍樓價只上升70％。

令社會走向貧富兩極化理由，就係一般打工仔月入萬餘，以兩個工作人口計，扣除租金（或供樓）日常開支後，每月仍有幾多錢可投資？答案係不足3000元，一年36000元、十年36萬元……。換言之，退休之時普通家庭除擁有自住物業外，仍有多少餘錢已經了不起。反之，如果由美國名牌大學出身，加上家庭背景因素，回港幾年內已成為年薪過百萬打工仔，加上唔使供樓（通常由父母送），兩夫婦年收入200幾萬元，一年已有百幾萬作投資，十年千幾萬元，再加上錢搵錢。1997年起香港社會走向兩極化基本因素十分多，唔係政府搞乜「扶貧計劃」便可解決。由於起步點不同，形成香港經濟過去階級流動性漸漸消失，形成貧富懸殊。

今時今日如何發達？

一、向行止兄夫婦學習。佢1973年用40萬元成立《信報》，2006年以3億元賣掉（加上過去三十三年《信報》所派股息，就咁發達囉！）。

二、向森池兄學習，1969年用1萬元做資本，每年增值30％，到2007年手上財富超過2.8億元（未計捐畀港大筆）。

三、嫁個有錢人，禮金有1億元。

四、開一間賺錢店舖，然後開第二間、第三間……一直開到幾百間甚至過千間，然後將佢上市賣掉（但失敗率高達95％）。

五、每期六合彩當有幾千萬頭獎時買一張。

六、你有劉德華唱歌才華，不停地開演唱會，直至身家過億仍不停下來。

上述六大項目，任選其一。如果你認為做唔到便認命，做過普通人、過普通生活，一樣好快樂，得閒睇「投資者日記」執番D都幾過癮。