曹仁超 - 大戶做唔一定

2008-01-09

1月8日，周二。恒生指數跌66.59，收27112.90；成交1148.65億元。1月期指跌112點，收27168點。東方航空（670）小股東否決新航入股。

今天滬深A股微跌0.5％。中國船舶下挫4.8％、大秦鐵路跌2.2％、中興通訊跌5.9％、招商銀行跌3.2％。

金價倫敦再升17.84美元或2.1％，見876美元【圖】。去年金價上升31％，係1979年以來升幅最大一年。《金融時報》對今年金價進一步睇好。

金融板塊繼續受苦受難

上月英國零售業表現為2006年3月以來最差一個月，主要受去年下半年樓價回落影響。

2008年1月第一個星期，股市表現出violent sector rotation。去年獲利板塊紛紛成為拋售對象，轉向去年被忽略板塊；金融板塊仍在受苦受難。相信1月30日聯儲局將再度扮演救世主角色，減息四分一厘甚至半厘，以阻止美國經濟陷入衰退，甚至注資金融體系去減慢美國樓價下跌速度。

今年美國經濟會否出現衰退，其實同本港關係唔大。香港經濟中國改革開放三十年今天，早已背靠祖國、放眼世界。雖然經濟向上，但走勢上係出現S形，而非直線上升，依家正進入S形走勢中間，即兩個高潮中間深溝。港人正面對此消（美國）彼長（中國）。內地醫療、藥物股剛完成轉型期又再向上，科技項目進入汰弱留強期，農產品股成為新貴。過去我老曹一再強調大市方向，自去年11月開始股市已迷失方向，出現牛熊共舞，一天之內恒生指數上落成千點，有D股票可以跌到唔清唔楚，有D股票又可以升到不亦樂乎。每一次大市超賣都引來大幅反彈，例如去年感恩節，投資者發現一隻股份一天內上落30％係好平常。次按危機去年8月爆發，聯儲局及各西方國家央行大量注資去refinance整個金融體系，搞到個市癲上癲落。資金有時rush to the safety，有時又趁低吸納，有人贏死亦有人輸死；相信今年第一季情況亦一樣。1月14日聯儲局將拍賣300億美元短期票據，1月17日又再拍賣300億元，上述銀碼同銀行系統內12.7萬億美元比較仍然唔算多。情況有如烏鴉擔水去救森林大火一樣，恐怕徒勞無功。2008年投資展望：情況類似2007年下半年，股市波動好大，GDP增長率減慢，但美國經濟唔會陷入衰退，因通脹率及利率對股票市場仍然friendly。

BNP百富勤認為，2008年香港投資細價股較投資大價股安全，但應避開有發行A股H股。鼠年唔同豬年，豬年可令人家肥屋潤，老鼠如養得太肥，小心鼠輩橫行。

豐銀行認為，2008年對香港及中國股票投資者而言係比較困難一年。中國宏調從緊去對付經濟過熱，美國卻面對衰退威脅，都對香港有一定威脅，有賴美元減息及QDII引入更多內地資金，去增強港股抗跌能力（美國第一次減息至今，外資香港售出約720億港元股票，估計QDII會為香港引入800億元資金）。恒指以2008年純利計，未來O仍高達十八至二十倍；換言之，更上一層樓並唔容易。

中資外資在港股較勁

去年本港二手住宅交易約十二萬宗，較2006年升50％，涉及資金4000億元，平均每單360萬元，較2006年高出22％。分析界估計，今年二手交投可達十五萬宗，涉及資金6700億元，僅次於1997年7550億元；樓價可再升25％，平均每單450萬元。如今年本港物業情況有如上述估計，港股似乎唔可以睇得太淡，尤其QDII令內地資金不斷流港，A、H股差價亦在收窄中。

今年投資策略以防守性為主，只投資行業表現較強者，例如能源、IT、公用及消費股；電訊及原材料股保持中立；睇淡有金融同工業股。2006、07年中國股市跑贏全球，令港股亦受惠。2008年又點？純利估計會上升，但O下降，只有睇行業者才能賺錢，忠告係「小心駛得萬年船」。'

今年內地將有十二隻基金及八間證券公司獲QDII牌照，平均每隻基金規模約40億美元；加上中國投資機構將投資670億美元到海外，以及2008年第二季起港股直通車可能開出，內地保險公司亦計劃投資80億至130億美元到海外，都係令港股較低水平有吸納買盤理由。

另一方面，中國有一百二十六隻股份在新加坡掛牌、七十二隻美國、十四隻英國、三隻德國、三隻日本，大部分升幅都落後於本港H股，擔心今年外資繼續沽售H股。換言之，今年港股面對內地資金流入及外資拋售H股，股市波幅唔細。

豐分析部睇好股份有中海油（883），估計中海油今年每股獲利89仙，O十四點七倍；新世界百貨（825）今年每股獲利23仙，O四十二倍，較百盛集團（3368）O四十五倍為低，未來十二個月目標價14.5元，有37％升幅；太平洋航運（2343）今年估計每股獲利2.12元，O五點九倍，係乾貨輪之中表現最佳者。

全球最大信貸泡沫萎縮

　美國金融股有賴中東及亞洲資金支持去維持資本比率，今年上半年將向投資者公布去年第四季虧損有幾大，甚至可能要求進一步注資。換言之，全球最大信貸泡沫正進入萎縮期。根據高盛分析員William Tanona報告，花旗須撥備187億美元或每股7美元；摩根大通須撥備34億美元或每股1.5美元；美林則為115億美元。因此唔排除呢批金融股今年股價有機會重新接近去年8月低點，而去年8月低點乃升市最後支持區。1月效應意思係，如每年1月股市回落，年以跌市結束機會好大。

油價狂升下，沙地阿拉伯股市如何？答案係由2006年2月至今回落60％！證明一旦泡沫爆破，即使富有如沙地，亦無法阻止股市下沉。

唔好以為大戶做一定。去年8月美國銀行以20億美元入股Countrywide Financial，每股18美元，今天市價只剩每股8美元！

去年5月Ed Lampert宣布以8億美元購入花旗銀行，平均每股53美元；去年11月阿布扎比投資局以75億美元認購花旗優先股，換股價37美元，依家花旗市價每股28美元。

過去六個月Joe Lewis吸納貝爾斯登10％股份，平均每股100美元，依家市價78美元，賬面虧損2.5億美元。

前美國證監專員Richard Breeden管理對沖基金，去年9月吸入四百萬股Zale，其後增持至六百萬股，佔該公司13％，該股卻由20多元回落到上周五13美元。

華平投資以10億美元入股MBIA，平均每股作價31美元，依家只值17美元。

2003至07年唔少人享受歡樂時光。上述歡樂係由美國人向海外大量借貸去消費，過住入不敷支生活，帶動全球經濟增長所造成。其中最受惠係中國同印度，2007年GDP分別上升11.5％及8.9％。美國人消費、亞洲人儲蓄，形成亞洲區數以百億美元計儲備透過政府用作購買美國債券，支持美國人過入不敷支生活。上述不平衡令油價見100美元，美國更出現次按危機；中國則因通脹率上升影響而須加息。兩個世界皆面對同一問題─—滯脹。美國作為全球經濟繁榮最大引擎已慢下來；中國面對通脹壓力，被迫推出從緊貨幣政策去阻止原材料價格進一步上升。

不過，有三分二美國投資者有海外投資，較五年前升30％。美元價及美股回落，最終可引發美國人拋售海外資產，將資金調回國。

上述客觀環境令2008年股市波幅十分大，人們擔心美國進入類似日本1990年情況，所不同者係日圓1990年至今升多跌少，令日本樓價、股市調整幅度甚深；美元價下跌令美國樓價、股市未來調整幅度冇日本1990至2003年咁深，但可能係半死不活。

相信唔少原材料價格已去年見頂；反之，農產品價格今年創新高。隨美國公布第四季公司業績相信失望者多、高興者少，如無意外，股市將跌跌撞撞中結束豬年、踏足鼠年。

三星係中國企業學習對象

中國製造業面臨轉型，但唔知道向邊個學習而陷入窘境。南韓三星相信係值得學習對象。三星集團李建熙會長領導下，企業成功轉型。從前三星集團係一間巨大家族企業，最初成功理由係採用日式管理，例如終身聘用、家長式領導、鼓勵員工和諧共處等。1990年亦一如日本企業因終身受僱制過分強調穩定、和諧，結果滋生企業內部官僚主義及大鍋飯現象。上層驕傲自滿、下層感覺不受重視，1990年起三星業務走下坡。

1993年李建熙接手後，提出「除老婆、仔女外，其他一切都可以變」口號。不惜花天價招聘企業骨幹人才，唔再強調由內部提拔及培養；佢認為一個優秀人才可令十萬工人受益；佢一共招聘三千五百名博士、四千九百名碩士加入集團。唔少人才係到美國大學同研究院挖回來。三星由一間OEM公司轉型為品牌公司；九十年代初期李建熙到德國視察，當地商場充斥日本電子產品；反之三星電子產品卻被放角落，雖然價格低廉，卻乏人關注。佢明白產品吸引力不是以價廉取勝，而以質量先行。佢世界各地建立十六家研究發展中心、二十三家研究發展學院，從事研發同產品設計，結果好快令三星液晶體顯示屏、靜態晶片、閃光存儲等產品上同日本企業一爭長短。近年三星產品唔再以價廉取勝，而以質量取勝；三星漸成為全球化品牌。今天三星強調生產上保持日本風格，即重視質量、精益求精；管理上係美國模式，即引入創新、創意轉化為商品速度極快，擁有自己知識產權令三星產品走在時代之先。我老曹意見係：三星才係中國企業學習對象！