曹仁超 - 表面健康的經濟高血壓

2008-01-03

1月2日，周三。恒生指數跌252.13，收27560.52；成交758.7多億元。1月期指高水，跌242點，收27668點。股份方面有升有跌。

滬深三百指數升0.9％，收5385點；人民幣升上7.2946兌1美元。國航A股升8.1％，表現出色；反之東方航空只升1.3％。

世界經濟初現調整象

經歷連續五年經濟高速增長後，踏入2007年第四季世界經濟初現調整象，主要工業國GDP增長率減速，新興工業國如中國、印度則出現局部地區經濟增長過熱。國際原油價高企、原材料價大幅上升及美元持續貶值背景下，世界經濟運行表面上仍然健康，但面臨風險亦愈來愈多，情況有如年過五十中年人，表面睇健康，但可能已患高血壓、糖尿病、膽固醇偏高等等表面上無病徵暗病，如不從速改變飲食習慣及多做運動，能否健健康康活到八十歲令人存疑。

中共十七大後已加強宏調去控制經濟高血壓，無奈至今仍然偏高。美國自2007年8月次按出現危機後，聯儲局亦認真對付。至於日本，因為早1990年爆血管，至今經濟仍然半死不活。

踏入2008年，老問題唔會隨2007年過去而消失，世界經濟不平衡問題反而更加突出。OECD經濟體已增長乏力，四大金磚國經濟過熱問題未見冷卻，香港貧富差距則愈拉愈闊，一唔小心可演變成社會不安。

　2007年8月次按危機浮現後，美國聯儲局已三次減息，英國亦開始減息，歐洲央行亦停止加息，各國央行紛紛向市場注資，去挽救因次按危機而陷入困境銀行同金融機構。依家仲無法判斷次按危機係咪已經平息及2008年會否捲土重來？

過去流動性過剩問題推高中國股市及樓價，令過去三年中國經濟出現空前繁榮，股票市場更可用「火爆」去形容。2008年又如何？IMF預測中國2008年GDP仍可上升10.5％，印度則上升8.4％，撒哈拉沙漠以南非洲國家經濟增長亦處於四十多年來最快階段。10月22日世界銀行年會閉幕會議上，IMF總裁拉托卻十分感慨咁話，一年前世界經濟充滿機會，依家則處於不確定狀態。美國次按危機加上樓市疲弱，令2008年美國經濟陷入衰退機會升至50％；反之，美國雙赤問題在改善中。大摩首席經濟學家Richard Berner認為，2008年美國三個季度GDP增長率接近1％，企業利潤將下降5％。標準普爾首席經濟學家David Wyss則認為，2008年美國經濟將出現軟陸。

日本經濟實現六十六個月擴張期後，又再面對溫和衰退，至今仍靠外需拉動。美國次按危機首先影響就係日本。大摩預測2008年日本GDP只能上升0.9％，如油價進一步上升，唔排除有一季GDP增長率接近零。IMF估計，歐洲2008年GDP上升2.1％，歐羅日益堅挺，已影響歐洲出口業。新興國GDP增長率雖然理想，但通貨膨脹、房地產價格增長過快，依家大都面臨過度投資問題，不過仍較1997年亞洲金融風暴前好，因為四大金磚國對出口依賴度唔高，本身擁有龐大內銷市場。

2007年11月21日油價曾見99.29美元一桶，2007年全球原油日均需求八千五百七十四萬桶，較2006年上升1.42％；2008年估計上升至八千七百零六萬桶，再升1.54％。2008年油價恐怕遲早升穿100美元。

中移動將係首隻回歸紅籌

2007年人民幣升值6.5％。從年初7.8兌1美元到年底升穿7.3兌1美元，估計2008年升值速度加快，全年升幅超過10％，年底見6.5兌1美元。人民幣升值對航空業有利，但對出口行業不利，尤其係紡織品貿易、玩具等低附加值產品存在較大壓力，國內汽車行業更加會面對入口汽車競爭壓力。

2008年滬深A股能否升穿2007年10月17日5891點？影響因素實在太多，無法事前估計。

2007年H股回歸後，2008年紅籌股開始回歸。相信中移動（941）將係第一隻回歸紅籌股；純外資公司亦申請A股市場掛牌，計有控（005）、東亞銀行（023）、星展銀行、聯合利華、俄羅斯天然氣工業等。2008年相當一部分上市公司股份進入全流通時代，共九百五十六家，解凍金額約1.6萬億元人民幣。2008年恢復新股配售，估計過去因受限售股獲解凍金額約1.5萬億元（其中2008年8月股改限售解凍金額最高達4000億元，較2007年10月2492億元高出60.45％）。即2008年唔計IPO，市場面對資金壓力超過3萬億元人民幣。

2007年內地A股賺錢股民佔總數48.65％，只賺10％以下者佔19.35％，其餘都有唔同程度虧損。

2007年12月底中國股票市場市值33萬億元人民幣，相等於2006年GDP 150％；集資7791億元。2008年面對中移動、中國電信（728）等紅籌股回歸及外國大型藍籌公司A股市場掛牌，情況會點？

2008年內地亦將推出股指期貨產品，擴大機構投資者套期保值行為，可解決國內市場因炒單邊市累積風險。

2008年將係中國證券業對外開放「閘門大開」一年。2008年1月1日起開始實施外資參股證券公司設立規則，即放寬外資證券公司參與買賣內地A股，令中國市場走向國際化。但高盛證券認為外資證券行加入興趣唔大：一、外資只能擁有上市證券公司25％（前20％）。二、有資格投資者必須已有五年操作經驗（前十年）。三、未上市證券行外資只可佔三分一。由於未能獲控制權，相信真正有興趣外資大行仍然唔多。

深圳市規劃國土房產資訊中心監測資料顯示，11月二手商品房掛牌平均價13388元一平方米，較10月下跌2％。深圳樓市係咪出現拐點？依家降幅最大係龍崗區金田風華苑以每平方米5800元開盤，係近年少見低價樓盤；反之，香蜜湖唯珍府開盤價每平方米4萬元、羅湖區雙禦雅軒每平方米2萬元、鹽田區藍郡廣場每平方米1.8萬元……。睇深圳亦一如香港，出現樓價兩極化，郊區樓降價、關內樓企硬。深圳市社會科學院城市營運中心主任高海燕認為，深圳樓市調整好似上海，只係將泡沫擠掉。

大摩繼續睇好本港房地產，因2008年新住宅單位供應量只有八千二百多個，應無法滿足需求。

國家財政部、民政部、國家體育總局發出通知，各級彩票機構應嚴格貫徹執行「彩票發行與銷售管理暫行規定」，不得利用互聯網發行銷售彩票，已利用者自通知下發日起一律停止，2008年1月1日起生效。

現金在手可保持理智

投資時應似一個專業。點解唔少人金融市場輸錢？理由係唔夠專業（甚至唔專心）；家庭主婦買棵菜都睇棵菜新唔新鮮、價錢合唔合理，點解買股票時卻唔肯深入了解、細心分析？專業如畢非德手上永遠有現金（已故新地主席郭得勝老先生教落：三七分──即睇好時七成貨、三成現金；睇淡時三成貨、七成現金）。上述我老曹亦唔知講過幾多次，似乎一般人仍唔遵守。好多人唔明白睇好保持30％現金好處。如你100％投資，往往有患得患失心態，好易做錯事；永遠有現金手，不但令你保持理智，一旦有超筍盤出現亦可以立即買入。另一散戶常犯錯誤係買入後只望upside不理downside。記住止蝕唔止賺，每次將虧損局限15％至20％，讓利潤往前跑乃投資必守戒條。專業投資者係計算自己可以輸幾多，而非自己應該賺幾多。上述兩點2007年如果做唔到，請記住2008年遵守，不然你唔應該再投資。第三項係你連公司做乜生意都唔知道便貿貿然買入，遲早出事。毛澤東教訓我地「未經深入了解、調查者，沒有發言權」。你可以做trading甚至speculating，但千萬不可以gambling，賭最後贏家一定係賭場。澳門葡京酒店自1966年年底開業至今四十年有餘，未見一個賭仔贏到整間葡京酒店！至於投機與賭有何分別？投機係利用機會，賭係相信運氣。我老曹從來唔信運氣。

上周浙江蕭山召開全國有形汽車市場發展研討會上，國務院發展研究中心產業經濟研究部研究室主任楊建龍博士認為，2008年汽車市進入調整期，係發展過程中一次調整，唔會影響汽車業長遠增長大趨勢，呢次回落只係增長速度下降，理由係汽車業超過七至八年高增長後出現二到三年低增長，唔少國人已買第一輛車，購買第二輛車時，要求自然多好多。前一階段汽車市場高速增長，係靠第一輛車購買力推動，2008年起需求漸來自購第二輛車，形成汽車業增長率2007年下半年見頂回落，估計將同時影響鋼鐵業、有色金屬、石化、機械等行業。過去五至六年中國工業各城鎮生產力、裝備規模、勞動生產率及生產技術水平大幅提高，令汽車裝備成本下降60％，形成汽車售價不斷下降。2008年汽車業不但須面對人民幣率升值，同時生產力同技術進步帶來成本下降，已到瓶頸地帶。家投資已回落到很低水平，代表汽車售價在此水平繼續回落空間已經唔大，汽車業亦開始面對成本上升衝擊而進入增長放緩期。

底特律隨汽車工業沉淪

2008年係通用汽車成立一百周年。通用汽車自1965年起股價一直跑輸大市，2000年至今股價更回落72％。邊個話大企業靠得住？

1900到1950年底特律人口由二十八萬人上升到超過二百萬人；1973年石油危機及日本汽車開始入侵美國後，接近一半人口離開，市中心唔少房屋已無人居住。1984年10月，三天之內有八百一十座大廈發生火警，市長宣布所有十八歲以下兒童晚上六時起禁止出街，不然會被拘捕，其後加派警員、消防員及組成民防隊，要求市民守望相助，有四萬自願者願意晚上巡邏，三天後宵禁才取消。但至今底特律經濟仍未復原，仍係全國失業率最高、犯罪率最多美國大城市，到處都係缺乏維修爛屋。

一座底特律三十七層高商業大廈依家只賣390萬美元（3000多萬港元），上述價錢香港只夠買一間豪宅。底特律失去汽車工業後無法轉型；汽車工業曾令底特律冒起，隨美國汽車近三十年失去優勢，底特律亦往下沉……。香港真幸運，八十年代工業內移，服務業迅速取代，香港經濟不但冇走下坡，反而由八十年代開始進一步推上，1997年更出現另一新高潮。樓市泡沫爆破後，2003年7月開始自由行、CEPA，大量國企、紅籌股來港上市，將本港零售業、服務業、金融業推向另一高潮。2007年後又點？1949年中共立國，令香港冒起；1997年7月香港主權回歸後房地產回落，到底係一次技術調整抑或係香港下沉開始？2003年9月開始香港樓價上升，到底係一次反彈，還是另一次牛市？一個城市當金融成為經濟主流，就係該城市最繁榮日子，例如倫敦，真係咩？

未來六至十二個月美國同歐洲大銀行將告訴各位呢次次按危機到底有幾濕滯？2007年美國住宅樓價回落6.7％，未來極有可能再回落10％。高盛證券估計最快亦要等2009年才見美國樓價反彈。12月美國消費信心已回落到兩年低位，即使美國再減息半厘至一厘，能否阻止衰退出現？

改善投資回報十大要訣

2008年如何改善你投資回報？一、股市權威說話可聽不可信，聽完佢地說話後，記得返屋企做功課，唔好盲目相信。二、Trading唔係投資。Trading同投資股票唔同，你並冇擁有該公司，只希望價位上落中獲利，因此唔好將唔成功trading變成投資，請嚴守止蝕。三、勝敗乃兵家常事，蝕本離場有何可恥？唔係每單trade都要賺錢離場。四、唔好望打和、唔好追落後，溝上唔溝落。Trading有虧損便應止蝕離場，然後重新再開始。五、世上冇必勝投資，嚴守紀律者才可輸少贏多。六、唔好追隨群眾，佢地常常犯錯。人人都知所謂好消息，本身已係壞消息（Too good to be true!）。七、唔好忽略警告訊號，唔好等沉船時才去搵救生艇。八、未離場前唔好計自己賺幾多。九、炒股票唔似打工，不應月月出糧，一年做兩、三單大deal已足夠。十、EYF（享受你失敗）。失敗係最好老師。不如意事十常八九，十單買賣中八、九單蝕本亦唔奇，只要一兩單贏得十分大便可。Trading唔係周末度假團，而係漱口、洗面、擦牙，必須天天關注才做得好。最出色trader已唔使睇圖表，而係靠本能反應，你已做到咩？

祝各位有一個豐盛2008年。