曹仁超 - 輸家往往食尾糊

2008-01-02

1月1日，周二。恰皮扭耳。一元復始，萬象更新。本港除夕半日市，恒指當天升442.05，收27812.65；成交433.6多億元。1月期指高水，升605點，收27910點。由於美國1月份減息機會已近九成，地產股如新地（016）除夕升4.2％，收165.6元；長實（001）升4.8％，收144.2元；恒隆地產（101）升5.7％，收35.3元；九倉（004）升4.1％，收40.85元。油價居高不下，令中海油（883）升3.1％，收13.28元；中石油（857）升1.9％，收13.9元。金管局宣布11月份新貸款升76％，永亨銀行（302）股價升5.6％，見116.7元。

負利率推動樓價開步走

2007年港股有驚有喜，恒指升幅接近39％；國企指數升幅達82.64％；中長線投資者成績不俗，至於短線炒家便有如坐過山車，既刺激又難捱。2007年年底總市值21.1萬億元，減去2006年年底嘅12.7萬億元，即2007年總共升值7.42萬億元；機構投資者同大戶（以A級經紀及B級經紀成交額計）佔去85％利潤，即仍有1.1萬億元利潤讓本港約一百二十萬個散戶去分，即2007年本港散戶平均賺咗100萬元。

美國次按危機令港股8月大跌，但聯儲局減貼現率加上港股直通車計劃公布，令港股又再急升。11月份溫家寶宣布港股直通車未能開出，加上中國貨幣政策年底前由穩健轉為從緊，令港股回落，內房股面對大幅調整。另一方面，港元追隨美元減息，唔排除2008年出現負利率環境，令本港樓價2007年第四季又再開步走。

如果話2007年首三季內地經濟係「漲」字派，第四季嘅關鍵字係「拐點」。2007年通脹引發保值心態，令中國老百姓把蚊年由銀行提出，唔係攞去炒股就係炒房子。2007年第四季係咪出現咗拐點？2008年又如何？謝國忠認為，政府政策十分十分重要。如果2、3月將信貸放寬D，房價仍會漲上去；反之，若資金鏈到2、3月仍繃得緊一緊，情況便不妙。股市亦一樣，如政府再批多幾個基金發售，股市仍會漲上去；反之，便有可能出現一浪低於一浪。

2008年Do you know where you're going？2007年印度同中國成為首選，2008年又如何？印度2007年外資流入173億美元，較2006年嘅80億美元上升一倍有多；股市進入第六年上升，六年升幅共達622％。孟買交易所總市值2007年上升94％，至1.7萬億美元；2007年有一百零一個IPO。1991年印度經濟改革，帶來連續十七年好景，2007年連印度企業亦開始作大量海外收購。印度同中國經濟肯定過熱，2008年能否更上一層樓？2007年初分析界擔心中國股市出現泡沫，到2008年反而唔再聽到泡沫論。一般人所犯嘅毛病係：太早睇淡、太遲睇好。

滬深三百指數連續第二年成為全球表現最好嘅股市之一，升幅162％。恒生國企指數2007年上升55％，升幅全球第八。大部分投資者估計，2008年無論內地A股或香港國企股，升幅都唔會及得上2007年。

2007年道指升6.4％、納指升9.8％。2007年花旗股價回落47％；反之蘋果、Google及RIM卻升到唔清唔楚。揀股唔炒市，紐約股票市場有一千四百九十八隻股份上升、一千三百九十八隻回落，你買中邊隻？由於對2008年美國經濟前景不確定，12月31日美股全線下跌。美國11月份二手樓銷量略升，但價格繼續下降；銷量較10月份升0.4％，但較2006年同期減少20％。對2008年美股展望睇好嘅佔34％、睇淡佔39％、保持中立佔27％。行業方面，最多人睇好仍是能源設備及服務行業，最多人睇淡係房屋建造股、投資銀行及證券行。美國房屋建築股指數2007年2月、4月同5月出現三頂後，至今由高點回落46％，個別股份如Pulte Homes股價跌70％、Lennar跌69％、KB Homes跌62％，行業盛衰影響早已取代牛熊市。投資策略係點樣做一個出色嘅揀股者。

採用逆市投資法

又到咗告別2007年、迎接2008年嘅日子。2007年得失已唔重要（冇人能改變過去），2008年點樣找尋另一隻money-doubler？2007年令股價上升最重要嘅因素係資金流向（flow of money），2008年醒目資金將流向哪裏？

2007年上半年能源股、資源股係大贏家，下半年中資股係大贏家。11月份科技股漸漸冒出頭來，相信2008年將繼續冒起。升市已踏入第六年，如果仍是「牛」，相信亦已係「牛尾」。牛市平均只有四年壽命，2003年4月到2007年上半年較多人肯揸貨，2007年7月後股市出現咁多Deep V，理由係唔少人擔心牛市已死亡。根據International Herald Tribune資料，如牛市能在第六年不死，升幅往往超過25％（指美股），因為第五年（2007年）係最多投資者減持年，如2008年美股再升25％，港股又點？2008年投資策略係投資過去被人最睇唔起嘅行業，呢類行業股在2007年早被人質低，2008年（如果仍是牛市）往往可一飛沖天。2000年牛市結束後，納指一年內下跌接近40％。換言之，2008年如證明牛市早在2007年10月結束，2007年10月前最被人睇好嘅中資股股價未來跌幅亦最大！我老曹採用逆市投資法，2007年10月之前最被睇好嘅股份大部分已出售；反之，吸納2007年10月之前最被淡嘅股份（皆因輸家往往食尾糊也）。

中國財政部宣布2008年1月1日起鋼業製成品出口稅由15％上升到25％，例如鋼配件及錠塊稅由15％提升到25％；鋼棒稅率由10％上升到15％，其他鋼製品保持5％。估計措施對小型鋼廠影響最大，上市大型鋼廠影響有限。

內地2007年底宣布五十七項糧食出口抽稅5％到25％，此乃繼兩星期前政府宣布取消13％出口退稅後進一步收緊糧食出口，2008年1月1日生效。小麥、黑麥、大麥、燕麥出口稅20％，玉米、米、大豆出口稅5％，為期一年，以壓抑內地通脹。

Newsmax策略員對2008年展望，對商品價格唔係睇得幾好，最多只會高位牛皮，因美國樓市回落，遲早影響商品價格。1997年3月至2006年8月美國二十大城市樓價以年率10.93％速度上升，投資者一時之間未能接受樓價回落嘅事實，雖然指數顯示二十個大城市2007年9月止樓價已回落6.1％，但一般人仍唔相信未來樓價會再回落10％，因為大部分人做決定時唔夠快。我老曹2007年同詹瑞文做舞台劇，曾經同觀眾玩一個遊戲叫「即時反應」，絕大部分觀眾唔合格。當人類面對災難時，大部分人都冇即時反應。例如1997年7月1日白眉董拋出八萬五房屋政策時，有幾多人立即決定將物業賣掉？2003年7月1日五十萬人上街遊行後，中央政府即時批出自由行，你有冇立即投資零售股？

國內地產商遇上命門之劫

2007年嘅「9．27房貸新政」後，各家銀行按揭貸款和開發貸款同時收緊，珠三角更加係調整重點地區。2008年唔會再出現銀行對地產商提供大量發展貸款，即一開始就係從緊政策，理由係銀監會2008年實行剛性窗口指導政策，要求控制貸款規模，係內地地產商遭遇2004年數輪房貸收緊以來真正嘅「命門之劫」。為了生存，內地地產商採用融資多元化政策，包括來港上市、同本港地產商合作——由內地地產商出地、香港地產商出資，又或共組公司。其實，2007年4月深圳銀監局已下發「關於加強深圳市國內商業銀行房地產信貸管理的指引」，只係各家商業銀行為咗爭生意而冇嚴格執行。到年中政府壓力漸大，各商業銀行才開始控制二手樓貸款嘅成數，隨後銀行就控制開發貸款。深圳某銀行人士話，2008年唔敢再輕易放貸了，估計2008年房貸將繼續從緊。去年「四證」（即囤存土地使用證、建設用地規劃許可證、建築工程規劃許可證、建築工程施工許可證）不全亦會貸款，依家已唔會矣，即使「四證」齊全，亦要充分評估開發商嘅質素。

12月北京師範大學金融研究中心嘅「中國房地產土地囤積及資金沉澱評估報告」出台後，整體銀行業界都被中央警告。該報告指出，2007年底開發商囤地十億平方米，銀行向房地產行業每注入4元資金，其中1元便被沉澱在土地上。深圳發展總行住房消費信貸部話，2008年將少做少錯。

中投證券一份研究報告話，銀行貸出資金在房地產開發資金中比重已過半數，達53％以上。商品房銷售收入70％資金來自銀行貸款，甚至連訂金和收款中都有約30％來自銀行信貸。2008年內地房地產面對銀行從緊政策，內房股前景點睇？

上海市政府發布「貫徹國務院關於解決城市低收入家庭住房困難若干意見的實施意見」，其中除強調廉租房、經濟適用房外，更加進「來滬人員購房政策、合理引導跨地區購房」，睇嚟上海市政府將限制外地人購房，例如溫州炒房團、山西炒樓團，而非只針對外資；2008年可能要求上海居住證持有人才可買房子。

本周一開始，深圳市市長許宗衡開始「香港之行」，將簽訂加強深港合作協定，令港深一體化又向前行一步。

據說香港《色，戒》票房有三分一來自內地居民，其中以深圳影迷佔多數。內地人來香港睇戲？十年前諗都唔使諗，而依家交通費只需30元，唔算貴，20元簽證費亦不多，只係要等十五天及過關排長龍麻煩咗D，如果係深圳居民，出入香港便自由許多。

港深一體化先易後難

港深兩地鐵路網已完成接軌。港深兩地人口二千萬，GDP 2萬億元，機場吞吐量四千萬人次，港口吞吐量四千萬個標準箱。如兩地居民獲「平等」對待，兩大城市經濟都受益。過去港人（特別係所謂精英分子）一向睇唔起內地人，唔願意和內地人合作，自從佘當奴出任特首後，港府官員才積極向內地靠攏。2007年7月1日深圳灣口岸開通，首次實施「一地兩檢」（香港、深圳兩地政府在同一大樓內檢查人流及物流），並批准港方執法人員在此口岸區執法。

從趨勢睇，港深一體化已無法避免，問題係香港政策同制度在深圳實施，還是香港漸被大深圳所淹沒？其次，廣東省政府同中央政府態度係點？中央政策組首席顧問佳叔話，港深兩地政府正朝着「先易後難」嘅方向合作，先方便出入境、交通運輸等，至於政治制度、執法權，慢慢至傾。