曹仁超 - 中國經濟或明年軟著陸

2007-12-18

12月17日，周一。恒生指數跌967.06，收26596.58；成交1044.3億元。12月期指低水，收26497點，跌1093點。長實（001）跌8元，收131.9元；新地（016）跌10.4元，收148.9元；恒生（011）跌6.8元，收146.1元。

今天滬深三百指數跌2.42％。其中萬科跌9.5％、保利地產跌6.8％、金地跌6.3％。《北京商報》引述北京大學不動產研究中心主任馮長春話，明年中國可能推物業稅，最先從商業樓開始，然後擴及擁有多套住宅業主。招商銀行跌5.9％、工商銀行跌4％、建行跌4％；銀行同地產板塊今天成為重災區。反而，蘇寧電器升5.7％、五糧液升1.2％，即內需股仍上升。

O因素減慢紅籌股到港上市，加快國企股回歸A股市場，令內地A股前景受壓。花旗推介互太紡織（1382）。

大摩認為，明年新興市場賺錢較今年困難，估計MSCI新興市場指數明年升幅只有6％。中國市場資產如由升值變成跌價，可能令消費市場亦受影響，但同美國唔同，美國60％消費來自信貸，中國只佔5％。中國人儲蓄率高達40％，影響主要來自心理，擔心明年中國經濟將出現軟陸，尤其係明秋之後機會達60％。明年出口增長首先下降，政府正努力刺激內需去取代，估計經濟增長高潮明年夏季機會25％，春季機會只有10％，眼前機會亦只有10％。

大摩指出，大部分本港銀行只小量涉及CDOs、SIVs及ABSs，所受影響十分有限。內房股大部分財政健全，應可捱過呢次宏調。

瑞銀認為，金融股及地產股已經受壓，投資中國股市要謹慎。

路透社12月17日估計，今年第四季標普五百指數純利預測係負增長，主要受金融項目影響，其次係原材料股。五百隻股份中，有一百零二隻純利睇升、一百一十六隻睇跌，整體計純利出現負增長。

美樓市衰退影響澳洲

美國明年將出現企業純利負增長、樓價回落，但經濟學家估計衰退（GDP連續兩季負增長）唔會出現。根據德銀美國分析員Joseph LaVorgna意見：1990至91年經濟回落前，利率一度高出CPI 5.3厘；甚至2000至04年亦高出CPI達4厘，但呢次只高出3厘，所以呢次經濟放緩應較1990至91年及2000至01年次更溫和。上次只出現一季GDP負增長（軟陸），呢次即使一季GDP負增長亦唔會出現，因美國以外環球經濟仍良好，開始令美國出口業復甦。例如新興市場正大量吸納美國出口，甚至歐洲同日本亦增加購入美國產品（因美元價回落）；再加上美元減息，令美國投資增加吸引，美國人收入保持上升，單單樓價回落及次按危機，唔會造成GDP一季負增長。2008年係大選年，美國政府消費一向佔GDP 25％，明年唔會減少。

Centro Properties Group美國差唔多擁有七百個商場，今天股價悉尼回落76％，因每股派息由47澳仙減至40.6澳仙；公司一天內失去33億澳元市值，股價跌4.34澳元，急跌到1.36澳元，令澳洲地產指數回落7.8％。睇美國房地產衰退潮已影響到澳洲。

11月倫敦住宅樓價下跌3.2％，平均樓價回落到23.23萬英鎊一間，較最高峰回落6.8％。豪宅跌幅較大，例如Kensington及Chelsea回落4.9％，至165萬英鎊一間。市場已出現轉勢，英國十個地區中有九個在回落中，只有West Midlands例外。英倫銀行12月6日已減息四分一厘，至5.5厘，似乎幫助唔大。英國第三季CPI上升2.6％，2008年GDP增長率估計只有2％。換言之，明年英國經濟亦將陷入滯脹。

置業者由買唔切變為睇定D

JP摩根大通估計，美國正出現近十六年內最惡劣一次樓價回落潮，令美國陷入滯脹，而且向全球擴散。上一次滯脹期係1970年代至1980年代初，因油價上升十倍，令失業率及通脹率上升超過10％。1999年至今油價上升亦接近十倍，將美國經濟推回1970年代情況。依家74％分析員估計美國明年1月再減息，JP摩根大通估計全球明年GDP上升2.4％，但CPI卻上升3.5％。如世界陷入高通脹（例如中國），比較容易處理，透過加息及收緊銀根便可；但同時面對GDP低增長，卻令聯儲局進退維谷，不知如何是好。

道氏理論大師Richard Russell11月已發出熊市訊號，信唔信則由你。我老曹擔心內地A股回落20％，將令後市有反彈冇上升。QFII放寬令外資可增持200億美元A股，另基金由「封」轉「開」而新吸納1000億元人民幣，上述資金入市可令A股出現反彈，但大方向唔會改變。

2008年1月1日起，中央經濟工作會已明確提出實施從緊貨幣政策，出現今年內第十次提升存款準備金率，至14.5％，外傳明年將逐步推高到16％。何謂「從緊貨幣政策」？根據內地銀行第三季貸存比例大部分略高於70％，當存款準備金率調高至14.5％後，明年內地銀行貸款增長率仍可保持年率30％咩？如果唔能夠，明年內地銀行純利升幅又點？換言之，從緊貨幣政策唔會收縮信貸，卻可限制信貸增長率，令中國經濟步入軟陸期。政策對房地產影響就非常明顯，因為再不能一如以往般任借，成為近日內房股下跌重要因素。一旦樓價開始回落，買樓者自然由慌死買唔切變成慢慢睇定D，形成成交額萎縮，利淡因素逐漸顯現。

明年1月1日起兩稅合一政策，令外資企業優勢逐步減少，內資企業獲稅務優惠可產生抗跌能力，其中最受惠係內需股（大部分過去曾付高稅率）。

內地唔少投資者都係初入行，投資經驗唔深，唔少首次經歷股票同基金「冰火兩重天」而變成「冰火大閘蟹」，依家仍頗具信心。隨利率提高，股票進一步回落，信心日漸動搖，會否演變成日後拋售？隨QDII基金大量推出，內地可供選擇投資項目增加，投資者會否一如過去，仍集中投資A股？A股市場正進入風雨飄搖期，再展望明年中央經濟工作會議卻推出從緊貨幣政策。上周六由豐銀行主辦「卓越理財」財富論壇上，有專家表示，明年仍係樂觀一年，但樂觀程度可能已唔及過去一、兩年，而係更加理性及冷靜。明年內地居民存款會否一如過去一兩年繼續大搬家？流動性過剩源頭在於巨額貿易順差，今年人民幣已升值唔少，生產成本上升，出口退稅亦下降；加上歐美GDP明年進入低增長期，今年中國貿易順差會繼續擴大抑或縮細？

中信證券首席策略分析師程偉慶認為，明年企業盈利仍會上升，但一如今年升幅咁大機會唔高。宏觀調控促使經濟發展方式轉型，使一些行業出現新發展機會，有D行業將承受陣痛。呢種行業性冷暖不均現象，對低端產品出口企業打擊甚大，今年表現搶眼大藍籌如金融、房地產將失去光環。

中國經濟三頭馬車排名倒轉

明年拉動中國經濟「三頭馬車」（出口、投資、消費）排名已倒轉，變成消費先行、出口包尾。火爆樓市10月份已出現大逆轉，有人驚呼深圳、廣州樓市已出現拐點。今年10月係咪大城市房價進入「跑步衝線」期？學者易憲容認為，房地產係資金密集型產業，金融支持減少意味貸款困難，市場需求立即出現根本性變化。

1998年國家政策進行經濟改革，取消限額供應商品，允許由市場需求去決定價格，去應付1997年亞洲金融危機所帶來影響；決定以出口、投資帶動全國經濟增長。股市過去十年亦經歷數次大起大落，物業當年仍唔係咁吃香，其後提出更改福利分房制度為商品房制度，而且央行頻頻減息，到2003年房地產市場才開始啟動。中國經濟進入高增長、低通脹期，出口持續增加，外儲備急升，國際游資紛紛湧入，但中國人仍不以為意，社會上流傳「熱愛生命，遠離股市」論調，資金只大舉流入物業、汽車、黃金市場；2005年年中A股更出現低潮。其後一連串股改吸引市民存款大搬家，到去年及今年出現樓市及股市同時出現高溫；今年10月又開始退燒；反之，港股受直通車計劃影響，10月份卻發高燒。隨內地A股回落，港股亦無可奈何花落去。

12月14日歐盟委員會宣布對部分中國鋼鐵產品展開反傾銷調查，中國鋼鐵業堅決反對。睇繼紡織業之後，歐盟再次針對中國鋼鐵工業。