曹仁超 - 問題未解決輕傷變淌血

2007-12-08

12月7日，周五。恒生指數跌716.45，收28842.47；成交1401.1多億元。期指跌703點，收28996點。相信30000點阻力開始產生作用【圖】。中鐵（390）收7.36元，較發行價5.78元升27％。東亞銀行（023）跌7.3％、長實（001）跌4.27％、信置（083）跌9.5％、中移動（941）跌2.33％、網通（906）跌5.08％、中遠太平洋（1199）跌4.2％、中海發展（1138）升1.8％、中海油（883）跌3.6％、中石油（857）升1.79％。滬深A股再升1.41％，成5041.35，全周升6.4％。

部分電子股明年脫穎而出

亞洲科技股自2003年起面對調整，美元匯價回落、人民幣2005年7月起上升；加上內地工資、生產成本及原材料價上升，都係其中因素。相信亞洲科技股今年將進入較成熟市場，資本投資方面更有紀律，唔再盲目擴張，而且存貨已跌至低水平，唔少公司更在努力建立自有品牌。隨北京奧運來臨，TFT－LCD電視需求大增，其次係電子記事簿及手提電腦。估計電子業毛利率將由今年18.9％上升到明年19.4％，應可支持一次電子股純利回升期，例如生產LCD電視機冠捷（903）及生產運動用電子儀器萬威科技（167）。至於聯想（992），股價已先行一步，上升唔少。冠捷同萬威另一優點係有本身品牌，冠捷電視在中國已打響名堂；萬威在歐洲亦有自己品牌，目前在開拓中國市場；除上述外，亦從事大量OEM╱ODM產品，當市場供應出現緊張時，有條件改善邊際利潤。另一可睇好係LED，估計在中國將大量應用在街燈方面，上述生產技術正由台灣轉移到中國。至於PND（personal navigation devices）明年需求估計上升65.3％，至三千七百萬台，並維持高增長，將有一天成為汽車上必備電子導航系統之一（輸入目的地便可顯示應走的路及自己所處位置）。部分電子股在明年應可脫穎而出。

明年投資大方向係以保本為主，因美資銀行進入re-capitalisation期，相信有收購、合併、股份回購等活動。能源股及資源股面對產品價格回落期，為2003至07年升市做整固。食品價格繼續上升，威脅全球經濟擴張，但唔會係2000至02年科網股泡沫爆破式調整。美國、英國同歐洲GDP增長率進入放緩期，有助紓緩原材料價壓力，各國央行須為阻止衰退出現而減息（估計英倫銀行仍有半厘到四分三厘減息空間）。

美救市措施將問題拖延兩年

內地A股進入防守階段。由於A股同H股之間溢價高達50％，即使A股回落，H股所受影響仍然唔大，何況明年港股直通車開出，到時溢價可能收窄到只有20％。理論上，未來如A股回落30％，H股仍然可以唔跌（或跌幅唔大），除非A股未來跌幅大於30％，才會大幅拖低H股股價。目前H股平均O三十倍，亦代表日後上升空間十分有限，未有足夠吸引力令投資者願冒風險。

感恩節開始聖誕反彈仍在進行中，保爾森出面協助一百二十萬個業主避免被收樓壓力（因供款已過期超過六十天），計劃凍結供款利率兩年，即未來兩年仍以ARMs最初供款利率供款，阻止大量收樓潮出現。例如一對夫婦動用信用卡貸款去供樓，面對月供款項由1480美元升至1800美元，明年1月起超過2000美元，已無力再供落去。估計呢一百二十萬個業主中，將有六十萬個獲政府協助維持低息供樓兩年或三年，以阻止大量物業被接管。

上述並唔代表問題獲得解決，只係拖延到兩年之後（到時已非殊仔做總統矣）。呢種乃九十年代日本面對泡沫爆破做法──將問題束之高閣唔去解決，以為時間過去後，問題便可以自動唔再存在。我老曹從來唔信呢套，因為小問題唔解決，分分鐘變成大問題；大問題唔解決，可以變成致命傷。此乃止蝕不止賺精神！

第三季ARMs利率平均5.59厘（第二季5.12厘，已係1986年以來最高），第三季被接管住房佔ARMs貸款4.72％（第三季3.84％），延期供款者佔18.81％（第三季16.95％），估計第四季數字更上一層樓。重災區係加州及佛羅里達州，佔全國ARMs貸款33.7％，以及佔近日總延期供款42.4％。穆Economy.com周四估計，加州及佛州樓價在危機結束前可回落30％，而且樓市衰退將一直延續到2009年初，平均樓價跌幅13％至15％；佛州估計可下跌35.3％、加州下跌31.6％。房屋銷量最低潮係明年初，估計將較最高峰少40％，而令2008年美國GDP增長率減少1％。

樓按問題被束之高閣，另一問題又浮現，就係汽車貸款。去年有4.5％汽車貸款到今年9月已過期三十天，係過去八年最高數字。雷曼兄弟估計，12％汽車貸款者信用甚差，雖然涉及金額唔及樓按大，但整個行業每年貸出款項亦高達5750億美元，如有10％變成呆壞賬，數字已有幾百億美元。由保爾森負責次按凍結利率計劃在國會通過機會甚大，令Countrywide升16.1％、房貸美升7％、房利美升7.2％、Toll Brothers升13％。

今年投資市場表現出色，實在要感謝中國、東歐、中歐、俄羅斯及印度等新興工業國（香港主要受惠於中國）。中國GDP已超過德國，世界排名第三，僅次於美國同日本。中國如以目前增長率上升，將在2011年超過日本，世界排名第二。明年美國同歐洲經濟踏入放緩期，香港經濟更加依賴中國送暖。

第二次世界大戰結束後，美國GDP迅速增長，最高峰期佔全球GDP 50％（等於半個地球）。隨七十年代各國興起，美國目前只佔全球GDP 38％，相信未來所佔比重進一步下降。眼前問題係滬深A股經過兩年大升後，今年10月起後市係點？12月11日美國減息後，港股反彈市會否完成？

股市經過五年擴張期，會否開始萎縮期？我老曹1968年入行，明年係我老曹入行四十年。我老曹從事股票呢行，由最初入行時被人認為撈偏門，到今天金融業成為香港最重要行業，經歷過1973年連擦鞋仔亦提供股票貼士期，到1974年自己從事證券公司亦結束並加入《信報》；經歷過1981年銀行利率升上22厘本港樓價仍是升完可以再升；然後1982年中國一聲1997年7月收回香港主權，令樓價、股市皆散。我老曹亦記得1987年10月股災停市四天，復牌時恒生指數下跌50％，需要政府提供19億元信貸去阻止期交所破產；亦見過1989年六四事件滿街鮮血乃入市時機。跟住係1993年12月墨西哥危機、1997年7月亞洲金融風暴、1998年8月政府過千億元入市及2000年3月科網股泡沫爆破。2003年4月沙士疫症，接7月1日五十萬人上街反對二十三條。之後中央宣布自由行，大量同胞湧來香港消費，信心迅速恢復，再加上9月特區推出「孫九招」，令樓價回升……。

投資者重保本接受低利率

我老曹經歷咁多，能夠學到，就係無論發生乜事，保持頭腦冷靜最重要，其次係sustain power。1974年雖然損失慘重，但仍有10萬元資產在手，可以生存落去；1982至84年已懂得唔去盡好處，守得雲開見月明；1987年學曉逃避風險，其餘1993、97及2000年皆巧妙地避過。好好控制自己的貪婪及恐懼感，唔少金融危機其實係可以逃避，例如1987年股災前期指炒賣、1997年前樓市瘋狂表現、2000年非理性科網股泡沫。面對A股熱潮引發H股9月、10月狂升，只要唔太貪，問題唔大。至於美國次按危機去年下半年已浮現，只係一般人視而不見，估計重整需時（例如兩到四年），只要避開，問題亦唔大。次按危機對全球金融市場影響係點？有待觀察，相信最終可解決。展望明年全球經濟再次陷入滯脹期，股市將上落數番，並出現大量Deep V。今天二年期債券孳息率只有2.9厘，重返2004年6月聯儲局開始加息期水平（當年聯邦基金利率只有1厘）；十年期債券亦只有3.9厘，係2004年3月以來最低！點解投資者願意接受咁低利率？代表保本愈來愈重要也！

港發展商仍睇好內地樓價

短期美國利率估計由目前4.5厘下降至明年年中3.5厘，打工仔正落注估減息會令本港樓價上升，今年9月起本港中價樓開始上升。上述如意算盤係咪打得響？四十年經驗告訴我老曹，加息減息同樓價升跌關係唔大。例如1976至81年加息期，本港樓價上升五倍；1981至82年減息期，樓價卻回落三分一。2001至03年減息期，本港樓價亦係回落而唔係上升。更準確訊號係恒生地產分類指數，如指數上升，三到九個月後本港樓價便升；如恒生地產分類指數回落，三到九個月後本港樓價亦回落。從本港地產發展公司並冇積極買地睇，我老曹質疑明年本港樓價將上升25％論調。反之，近年內地加息，本港地產商卻紛紛到內地買地，代表地產發展商仍睇好內地樓價而非香港樓價。你認為打工仔眼光好還是地產發展商好？

今年表現最出色係石油股、能源股、原材料股，表現最差係外國銀行股同金融股。明年又如何？1980年能源危機後，表現最差係石油股。1997年7月亞洲金融風暴兼八萬五房屋政策後，表現最差係房地產股。2000年科網股泡沫後，表現最差係TMT股。2007年外國次按危機後又點？2007年10月至今內地A股指數回落20％，之後又如何？十年河東，十年河西。1991至96年美元回落潮到2002至07年又重演，兩者皆刺激樓價股價上升。1997至2001年美元上升潮，又會否明年出現？1991年係Saving and Loan危機，呢次係次按危機。當年虧損達1530億美元，相等於1991年GDP 2.6％，但冇出現經濟衰退；估計呢次虧損3500億美元，相等於2007年GDP 2.6％左右，因此明年美國出現衰退機會一樣唔大。美國通脹率由1990年10月6.4％高點回落至1991年底2.75％，利率由1989年5月9.75厘降至1993年3厘。參考上次經驗，便知道明年實在毋須太擔心，未來十二個月美國經濟出現衰退機會只有三分一。

國務院總理溫家寶已簽署第五一一號國務院令，修訂「中國耕地佔用稅暫訂條例」，明年1月1日起施行。內容包括：一、佔用耕地稅額提升四倍，部分更可在上述稅項上再提高50％。二、統一內、外資企業佔用地稅收負擔。三、取消鐵路線路、飛機場跑道、停機坪、炸藥庫佔地免稅規定。四、加強徵收管理，明確耕地佔用稅徵收管理法。

明年銀行將進一步加大銀根緊縮，發展商貸款壓力將面臨更大挑戰，唔少地產商都在搵更多融資渠道，光大地產、珠江地產、恒大地產等都籌備上市，中小發展商已開始將樓盤降價拋售以解燃眉之急。

寶鋼集團發表聲明，否認收購力拓報道，認為上述消息係媒體自己「炒出來」。

華園控股（2349）、勤＋緣（2366）停牌。