曹仁超 - 美股製造假雙底

2008-03-13

3月12日，周三。恒生指數升427.41，收23422.76；成交八百九十九億七百六十萬元。3月期指升465點，收23350點，仍係低水。

今天恒隆地產（101）大漲6.5%、新地（016）升4%、中海油（883）升3.6%、神華能源（1088）升2.6%、富邦銀行（636）升7.5%；平安保險（2318）升4.1%，富通銀行計劃以20億歐羅出售富通投資公司一部分畀中國平安。

美元一度見1.5495兌1歐羅及102.41日圓，由於波斯灣國家考慮取消同美元掛（上述謠言波斯灣官方已否認）係引發美元進一步走弱理由。

美股急升後又再回落，唔少投資者利用呢次金融股反彈作減持。

彭博調查環球專業人士信心指數，由2月份14.3跌至3月份13.1；亞洲區更由43.5跌至38.1。睇美國因素漸向亞洲區擴散。

上落市做錯機會大

1月22日恒指由21700點反彈後，作為投資者應該點辦？如你錯過去年10月高峰時出貨，便應利用呢段日子減持到安全水平。如你去年10月高峰時已大量出貨，呢段日子不妨增持到30％貨、70％現金或外幣。如你早已經三七分，便乜都唔使做，最好去遊埠。因為上落市中，做錯機會大於做。技術上睇，短期大市21700至25000點之間上落，最終破上抑或破下？唔好估，只要等。

花旗建議沽售港鐵（066），估計今年每股獲利1.3元，較去年減少15.3％，O二十二點二倍，目標價25.6元；因去年純利主要來自售樓利潤及物業重估，擔心今年兩方面都會減少。但推介華潤置地（1109），估計去年每股獲利22仙，升17.1％，O五十四點九倍；今年每股獲利60仙，升166.8％，O二十點六倍，目標價20.09元。亦推介首創置業（2868），估計2007╱08年度獲利每股57.6仙，升122％，O五點二倍；2008╱09年度獲利87.1仙，升51.2％，O三點五倍。玖龍紙業（2689）估計今年每股獲利66.2仙，升40.7％，O十六點三倍，目標價17.6元。

滬深三百指數跌2.96％，收4309.65。50天線漸近200天線，各位宜小心【圖】。招商銀行跌5.2％，收29.67元；萬科跌4％，收21.21元。2月份通脹率急升，人們擔心人民幣再加息。

美元貶值，令油價升至接近110美元，對歐洲經濟亦構成壓力。如美國GDP第二季出現負增長，歐洲又點？歐羅會否追隨美元減息？不然歐洲經濟下半年亦有可能陷入衰退。如歐羅亦加入減息行列，人民幣會否加快升值？

唔係咁易「殺牠死」

聯儲局再注資2000億美元去穩定信貸市場信心危機，並首次以國庫券交換次按債券；另獲歐洲及加拿大央行協助注資450億美元入佢地自己銀行體系。上述措施令道指出現五年內最大升市，媲美1月份八天內減息1.25厘，令道指1月22日止跌回升；幕後策略員有可能係財長保爾森，佢趁住股市拋空者眾多，殺淡友一個措手不及，為美股製造「假雙底」走勢，企圖利用股市升降反過來影響美國經濟表現。上述行動類似呆壞賬將「國有化」，係咪有用？有待進一步觀察。我老曹意見係：殘酷熊市如果真係咁容易解決，1929年聯儲局及1990年日本央行係咪豬咁蠢？美股同港股已確認熊市；滬深三百指數50天線同200天線天天在接近，唔排除4月初獲確認。世界各地股市真係熊蹤處處，唔係咁易「殺牠死」。

過去六個月，美國聯儲局已將短期聯邦基金利率由5.25厘降至3厘，但三十年期物業按揭利率卻由今年1月初5.5厘升至上周五6.03厘。依家按揭利率較國庫券高出3.5厘，係1986年以來最大息差；下周聯儲局再減息四分三厘，到2.25厘，擔心息差會進一步擴大。呢次注資行動令二年期債券息率見1.733厘、十年期3.596厘、三十年期4.53厘，即債券價反而下跌。分析界指出，2000億美元注資計劃只係另一劑嗎啡針，而非治病良方。銀行用次按債券向聯儲局換取國庫券，只係應急措施，九十天後要贖回。下周減息半厘至四分三厘後，情況能否立即好轉？美國樓價係咪已跌至一般家庭可負擔水平？

全球央行增加流動性措施，對金融市場起暫時緩解作用，但不能根本上解決信貸問題，反而暗示下周減息只減半厘。

美國信貸市場利率同官方利率繼續脫節，表明各商業機構根本上唔願放貸。從債市表現睇，擔心貝南奇「救世主」心態反令世人對美債信心動搖，資金正從美債市場流走。

美國步日本後塵

1990年6月起日本減息，二十八年後日本經濟點樣？我老曹實在唔明白美國點解仍步日本後塵？2001年「九．一一慘劇」後，美國出現信心危機，格老利用減息後可以恢復投資者信心。2002年10月起美股上升及2003年美國樓價上升，但美元價則由2001年85美仙兌1歐羅跌至近日1.54兌1歐羅。但呢次唔係信心危機，而係信貸危機，情況一如九十年代日本，即使減息至1厘亦冇乜用。

舉個例子，阿布扎比主權基金去年以75億美元購入花旗集團可換股債券，息率11厘，換股價31.83至37.27美元，表面上認真吸引，但家賬面損失已高達30億美元。今年美資機構欲再集資去填補次按危機所產生損失亦開始有困難，因為人人都明白賺息蝕價痛苦。股市同樓價並唔受利率升降影響，而係受信貸膨脹或收縮左右，兩者不可混為一談。

1990年6月起日本減息，點解日本經濟至今仍不振？理由係當年日本問題唔係資金不足，而係還債能力出問題。去年9月起美國減息，點解美國經濟仍不振？答案亦一樣。過去幾年美國太多機構借太多蚊年畀無還債能力人，加上抵押品並非「物有所值」（例如1997年香港房地產或2006年美國物業，又或者2007年股票），減息並不能令冇還債能力者突然變成有能力還債。一旦抵押品減值，經濟便出現萎縮；1990年日本係咁，1997年香港係咁，2007年11月起美國亦係咁。

九十年代日本人係高儲蓄率民族（儲蓄率達36％）；自1994年起日圓貶值，令日本人可透過利差交易食息度日。但美國人係先使未來錢民族，儲蓄率接近零，一旦進入減債期，情況可能較九十年代日本更差。

2005年高盛證券石油專家Arjun Murti、Kevin Koh、Michele della Vigna曾分析油價將升穿100美元而引發衰退。油價由2007年1月51.81美元至今真係升穿100美元，美國經濟會否步入衰退期？UCLA Anderson估計，美國今年第二季GDP 可能出現負增長，但唔會出現衰退（第三季GDP又恢復上升）。UCLA Anderson認為，美國經濟可同時承受樓價下跌壓力同油價上升壓力仍保持增長。UCLA估計，今年第一季美國GDP升0.4％、第二季負增長0.4％、第三季升3％、第四季升2.5％，全年升1.5％。失業率由今年第一季5％上升到第四季5.5％，全年5.3％，明年5.6％。

超級大戶利用跌市賺錢

五年前畢非德曾批評衍生工具市場，去年巴郡衍生市場合約涉及400億美元，共九十四份衍生合約，共獲利77億美元。巴郡去年共寫出五十四項衍生合約而賺到32億美元（上述合約要到2013年才到期。如畢非德睇錯市，最高損失47億美元）；另畢非德亦寫四十份Put期權而賺45億美元；上述合約2019至27年才到期（如睇錯市最大損失46億美元）。換言之，去年巴郡利潤除來自出售中石油（857）外，亦有唔少來自寫出衍生工具。呢方面非一般投資者可做得到，只有超級大戶才可利用跌市賺錢。

3月10日小胡解放軍代表團講話，強調「富國和強軍」係中國現代化建設戰略任務，係發展中國特色社會主義、實現中華民族復興重要基石；上述談話並刊於3月11日《人民日報》。睇富國強軍已係中國國策，西方政府一向唔信中國「和平崛起」論，而中國走軍事現代化，擔心國與國之間矛盾將激化。3月11日十一屆全國人大一次會議更推出「國務院機構改革方案」，由解放軍中將懷國模及祕書長石金武推動「加速十一大軍工集團股份制改革和市場化進程」終於出爐。十一大軍工集團包括核工業集團；航太科技集團，航空工業；船舶工業，兵器工業及軍工電子科技。1999年脫胎於國防工業總公司今年內將加速上市，向市場集資，發展運載火箭、人造衛星、載人飛船及核子工業、兵器及軍工電子科技。未來五年中國將全力改革國防科技工業及武器裝備採購體制。「富國」之後，就係「強兵」，相信唔係只為「解放台灣」咁簡單！

先富國後強兵係必走路線

美國同歐洲國家，軍民一體化十分普遍，尤其係美國更係超級軍事強國。富國之後強兵，係大部分國家必走路線，只有德國同日本因為係戰敗國，才唔准走富國強兵之路，必須接受美國「軍事保護」（即任何國家如軍事攻擊德國或日本，美國立即出兵保護）。例如六十年代歐洲冷戰，蘇聯軍隊一度阻止西柏林對外交通，美國利用大力士運輸機二十四小時不停運送糧食畀西柏林居民，直到蘇聯解封為止。呢段日子叫「冷戰期」（雙方雖冇開火，其實已在作戰）。

今天德國漸變成歐盟領袖，漸漸毋須美國軍事保護（但歐盟仍不可擁有軍隊）；日本則至今必須事事聽命美國，因日本本身冇進攻型軍事力量，只有防性設施。當中國開始「強兵」之時，美國點睇？日本又點睇？世界局勢似乎又出現改變，即美國同日本又漸漸接近，近年美國已唔再逼日圓升值；中國同俄羅斯又漸漸接近，雙方互通有無，甚至協助中國「強兵」及向中國供應天然氣。

上述政治形勢對廣東省不利（產品以出口美國為主），對香港亦不利。台灣大選後，如台獨勢力仍大，形勢可急轉直下；反之，轉向國共合作，美國又唔乃奇……，總之煩啦。