曹仁超 - 武大郎請伙記

2008-03-03

3月2日，周日。雖然貝南奇一再表示會減息，上周油價見103.05美元一桶，瑞銀降低JP摩根大通及美林純利預測，令JP摩根大通股價跌7.5％，見40.65美元，美林跌6.6％，見49.56美元。AIG公布業績好差，但股價只跌4.1％，見46.86美元。

美元上周回落2.1％，一度見1.5239兌1歐羅；兌日圓更跌3.2％，見103.74日圓。自次按危機至今，美元兌歐羅已回落13％。美國3月份減息0.75厘機會已高達72％；反之，3月6日歐羅利率會議估計維持4厘不變；澳元3月4日利率協議，估計加息0.25厘。

自1月22日起，投資者心態只係焦慮，不斷忍受壞消息衝擊，直到上周五AIG業績公布，終於忍唔住又再擲貨，令美股回落2.5％，會否開始挑戰1月22日低點？現實終於露出醜陋面目。

美股慢熊淺而長

豬年金股齊鳴，鼠年只有黃金獨領風騷。豬年金價由700美元升上900美元，鼠年將金價進一步推高，由1月24日891.65美元直指1000美元；反觀股票自去年11月起發軟蹄，一直腳軟至今。內地海通證券研究所分析師楊紅杰認為，美國呢隻熊係慢熊，至少仲要維持兩三年；至於中國股市會否受影響？木宰羊。

今天港股已唔係爭拗牛市熊市吧？美股熊市早去年12月獲確認（50天線跌穿200天線）；恒生指數50天線亦將3月份跌穿250天線，確認熊市。淡市弱勢先行，美股先港股三個月確認熊市，代表美國經濟較香港弱，未來應集中分析呢個熊市到底係「短而深」（通常插得愈深，熊市時間愈短，例如1987年10月股災），還是「淺而長」？我老曹傾向相信「淺而長」。

芝加哥ISM指數2月份跌穿50，回落到44.5，係2001年12月以來最低，代表未來日子美國服務業亦將放緩。密歇根大學消費信心指數70.8，係十六年內最低，代表美國消費者消費亦將放緩。紐約市採購經理指數為43.4（1月份47.9），連續兩個月低於50（去年2月份係70），代表未來六個月工廠訂單將減少。

美元價兌歐羅出現新低，代表通脹進一步上升（如你係高收入者，壓力較細，因食物及能源價格所佔比重低；如你係低收入者，壓力十分大，因食物及交通費所佔比重大）。美國1月份CPI升0.4％（即年率4.4％），以最近三個指數計已達年率6.8％，即短期美國CPI仍將進一步上升。原油價格達103.4 美元一桶，扣除通脹後亦較1980年時仲要高；2月份食物商品指數（Food Commodities Index）升幅達13％。

通脹率急升下減息，後果係點？雪茄伏話美國會重犯七十年代錯誤。但根據佛利民大師研究，聯儲局加息或減息，根本上唔影響油價同食物價格。食物價格上升係因國會通過乙醇計劃，刺激玉米價格上升結果。為製造二十億加侖乙醇一年，令食物價格全線上升，但增加二十億加侖乙醇又無法改變石油全球供求關係，正式搵搞。

由1月22日開始美股熊市反彈係咪已完成？無法肯定。反彈市一向詭秘莫測，熊市中只宜用30％資金去玩，不宜重鎚出擊。上周五高盛宣布去年底前已沽出Ambac（去年9月30日止高盛佔6.5％Ambac。該股由2007年5月96.1美元跌至今年1月17日4.5美元，上周五係11.14美元），唔會參加30億美元拯救Ambac計劃，令上周五Ambac股價下跌7.5％。

瑞銀分析員Geraud Charpin估計，次按危機令全球銀行撥備高達6000億美元，已公布約1600億美元；市場以前估計係3500億美元。

被穆評為三A級公司債券息率見5.62厘（1月份5.3厘），雖然三個月期隆巴特利率回落，但長息已開始上升，情況幾令人擔心。扭秧歌係前三後三（即原地踏步），但熊市華爾滋係前一後二，即完成熊市反彈後，未來跌幅一定超過之前升幅。

大行分析員基於職業上需要，估計通常較為樂觀，因此牛市中表現出色，熊市中表現卻失色。統計數字證明，一般大行分析員熊市中往往高估企業純利達30％。

例如過去美國財長曾一再強調強勢美元乃美國國策，但貝南奇卻一再減息。一個嘴巴兩片唇，上唇話好、下唇話淡。上周五美指數見73.63，係1973年有美指數以來最低。聯儲局利用壓低美元價去浮起美國房價同股價，可能適得其反。信心呢樣唔係話就、話走就走，較愛情更難捉摸。德銀話今年第一季美國經濟將十分醜陋！去年第四季美國GDP只升0.6％，而第三季仍升超過4％。減息及美元價下跌中，美國GDP係咪仍會出現負增長？

貝南奇摧世人對美元信心　　雪茄伏言論更加驚人，佢認為聯儲局對美國經濟已失控！此君1980年曾一手馴伏通脹，為1982年美國製造經濟復甦條件而出名。佢認為，中央銀行係有能力馴服通脹，但卻無能力對抗通縮（日本央行已證明呢點）。貝南奇點樣對付通脹（食物價及油價）及通縮（房價同股價）同時出現？上周五《英國電訊報》以「美國一如日本進入失落年代」去形容家美國前景；我老曹睇法係Yes and No。美國依家情況類似九十年代日本，但美國唔係日本。日本工業競爭力一直好強，而美國製造業乏善可陳；去年美國金融業負債肯定較1989年日本銀行界更大；今天美國衍生市場問題亦較當年日經平均指數上市公司互控問題更加複雜。AIG公布第四季有150億美元虧損，係咪代表另一次大跌市又開始（即我老曹所形容，第二隻鞋下跌）？

貝南奇為對抗資產通縮，唔覺意製造美元危機，美元危機下，投資者從美國抽走資金，令美國資產進一步下跌；於是貝南奇又再減息，外國投資者又再抽走資產，美國資產又再下跌，呢D叫做後座力效應（你用長槍開槍，開槍時會有一股後座力，因此必須用個肩膊頂住枝槍）。睇貝南奇已Out of Luck！由佢自出娘胎到今時今日，美元已失去96.5％購買力（金價由35美元一盎斯升至973美元），佢係咪想佢任內令美元完全冇晒購買力，一如伊朗總統預測，美元只係一堆廢紙？如金價升穿1000美元，下一站將係2500美元，到時全世界經濟將陷入大蕭條（唔止衰退咁簡單）。

當次按危機一出現，全球對美國金融機構信心已開始動搖，加上貝南奇瘋狂減息行為，不但無助重建世人對美國金融機構信賴，反而摧毀世人對美元信心，認為美國政府係無賴……。今天世人唔會畀聯儲局三A評級，貝南奇都係返大學做佢經濟研究工作好D。殊仔選佢，乃典型「武大郎請伙記」（智商肯定仲低過殊仔）。

歐洲金融機構衰漸爆

上周五蘇格蘭皇家銀行宣布債券撥備數字上較12月公布數字多4.5億英鎊，公司呢方面exposure高達25億英鎊。睇繼美國之後，歐洲金融業亦開始暴露D衰，大家請扣好安全帶。瑞士再保險宣布去年第四季純利下跌87％，理由係為債務作13億瑞朗撥備。

日本仔可能已被嚇親，佢地經過九十年代迷失世代後，已變得極之小心，又再收回利差交易，令日圓價狂升，令各國金融市場本周面對銀根收緊，對日本出口業亦不利。周一日經平均指數開市表現令人擔心。

美國樓價自2006年7月回落，去年8月引發次按危機。去年12月止美國全國樓價價值減少2萬億美元，但美國消費者仲未減少消費，因兩者存在時差，並非即時反映。美國樓價繼續回落，今年1月又有二十三萬三千零一間住房被金融機構接管，令冇人居住住房超過二百萬間，足夠未來十個月供應量。依家住宅樓價仍未見底，雖然美國商業樓仍唔錯，不過亦可能接近見頂。

去年第四季美國科技股指數仍上升26％，但到今年第一季亦支持唔住而回落，真係覆巢之下無完卵？第一季除油價、金價、食物價外，難搵到逆市上升項目。

畢非德旗下巴郡公布第四季獲利29.5億美元，較2006年第四季減少17.6％，佢度搵緊繼承人，自己打算退休。唔通情況真係咁惡劣，連股聖亦宣布金盆洗手（唔玩）？Double or Quit乃牛眼投資法，如果搵唔到可贏100％利潤項目，寧可唔玩或止蝕離場（虧損15％本金）。今天除二線股外，似乎已難搵到可升100％項目（去年10月仍留股市30％資金，虧損已達三分一，即今天已經唔係三七分，變成二八分矣，由此可見過去幾個月調整幅度幾大幾急）。

高盛全球副主席羅伯特認為，依家一D巨大壞消息可能仍被隱藏，日後爆發將令今次次按危機更長更深。佢估計美國失業率可上升到6％，做投資決定要三思而行；並估計利率將降至2厘，美國GDP增長率只有1％（甚至負數）。今天美國已唔係三十年前美國，美國經濟衰退，全球都不妙。不過，唔少國家處境應比美國好，即使面對美國經濟持續走弱，佢地只會出口輕微放緩，例如中國。

控撥備幾多難估計

廣州樓市去年第四季突然遭遇冷凍，今年春節前後更一片淒風冷雨，同天氣一樣出現雪災。天河珠江新城負責人林輝清話，去年11月至今銷售人員幾乎都只拿底薪，開單成功率接近零；而去年9月人們買樓如買菜，有人一口氣買下五間。廣州房管局公布，今年1月住房平均價9766元一平方米，重返1萬元以下（12月 10586元一平方米），下跌7.75％。ING已集資3億美元計劃進軍中國房地產；瑞銀與金地集團合組房地產投資公司亦募集3億美元。外資已在撈底，不過早期進入樓市外資都被套住，仍有更多外資計劃進入內地房地產市場。合富輝煌（733）估計，今年廣州樓市將出現「量升價穩」格局，估計平均價8500元一平方米。

據數字顯示，廣州麗江花園去年10月到今年2月樓價跌幅14％到24％；中海花城灣跌幅4％到21％；中海璟暉華庭跌13％到17％；跌幅最大係翠擁華庭達30.8％。江景盤富力銀禧跌16.7％；恒鑫東和灣跌13％；芭堤水岸跌12-17％，該區跌幅最大係江南玫瑰園跌20％。家廣州有三百四十五個項目在售，貨量三萬一千三百五十七套，總面積八十二萬五千一百九十五平方米；最便宜係南沙碧桂園大戶型住宅，46萬元人民幣一套；新世界萬象新都（連裝修）4888元一平方米，嘉裕豪苑（冇裝修）3400元一平方米。

周一控（005）公布業績，分析界估計去年經營純利上升25％，至於撥備幾多無法估計，因為涉及SIV金額高達350億美元（控去年上半年獲利22％，估計全年歐洲獲利上升15％、香港升20％、東南亞升71％、拉丁美洲升25％、北美洲跌12％）。