曹仁超 - 入市時刻

2008-01-08

1月7日，周一。恒生指數跌340.20，收27179.49；成交1135.3億元，最低見26698點，十分接近支持點，即12月18日26093點。期指收27280點，跌383點。如大家相信2008年係上落市，恒指將26000至32000點之間上落，相信又到入市時刻。今天出口以美國為主股份如利豐（494）跌6.6％、富士康（2038）跌6.2％；反之，信置（083）升2.9％、新地（016）升2.2％、長實（001）升1.9％、港鐵（066）升9.1％、中國中鐵（390）升2.1％。

兩電准許回報較預期高

戴德梁行發表最新調查報告顯示，香港係全球第二個最貴商業區，僅次於倫敦西區。倫敦西區每呎年租275.7美元，升34％；香港213.2美元，升37.5％；倫敦市中心每呎183.1美元，排名第三，升幅17％；新加坡升幅106.3％，排名由2006年第二十二位升至第六。

環境局局長邱騰華話，根據管制兩電計劃新協議，准許回報率下跌至9.99％，年期由十五年減為十年。中電今年10月1日生效，港燈明年1月1日。估計全港市民將因此每年減付電費50億元。准許回報較事前所傳只有8％為高，怪唔得11月至今恒生指數回落，中電（002）同港燈（006）股價過去兩個多月卻逆市上升。

滬深A股再升1.33％，收5556點，已重返50天移動平均線之上。A股2008年又再睇好。

2008年遊戲規則仍係sector plays，2007年升幅大者自去年11月起回落；反之，2007年跌幅大者，唔排除2008年上升（風水輪流轉）。如果發現睇錯，請速速止蝕；如果證明睇，不妨繼續持有。創富之道在於分析前景而非猜測（analyse而非forecast）。2007年曾推介南方航空（1055），去年升幅達204％，2008年科技股成績唔知會點？2007年乾貨輪股升幅亦不俗，仲有國壽（2628），2008年希望能夠再次射中牛眼。

路透社估計，2007年第四季標普五百純利係負增長8.4％，2008年第一季及第二季亦唔見得好。睇好sector有護理及科技，估計純利可上升12％及23％；最睇淡係金融及原材料行業，估計回落純利63％及10％。奧運概念股短期可熱炒

花旗推介中信泰富（267），估計重組將令其2008年每股獲利2.75元，較2007年升11.3％；未來O十四點六倍，加上回歸A股市場概念，唔排除2008年有意外收穫，目標價54.55元。

大摩推介中國建材（3323），估計2008同09年水泥每年加價8％，2010年打後每年加價6％，主要係2010年前政府將關閉二百八十五百萬噸生產力，佔總生產力23％，並將生產集中大型建材生產商手中。煤炭成本上升估計將令生產成本增加33％，亦令整個行業進入整固期。估計水泥需求每年上升10％，直至2010年；但供應能力每年只上升8.5％，令價格上升，有利中國建材、安徽海螺（914）等大型生產商。假設水泥售價每年上升8％，可抵銷煤炭價上升影響。

高盛則推介中石油（857），去年11月回歸A股集資668億元人民幣後股價一度大跌，估計依家又到可以吸納水平。　　花旗推介國航（753）、首都機場（694）、東方航空（670）、南方航空（1055）作為奧運概念股，亦推介海南美蘭機場（357）為可能被收購對象。內地奧運概念令旅遊、酒店餐飲、交通運輸、廣告傳媒股炒熱。其中最火爆係全聚德，肯定已牛氣沖天；其他如北京旅遊、首旅、中青旅、燕京啤酒、三元、北京城建、北京巴士、歌華有線都成為熱炒對象；仲有中體產品（承辦體育賽事）及東方金鈺（出售旅遊紀念品）都炒上。呢類股份短期可熱炒，奧運過後便風光不再。

根據Ned Davis Research資料，1900年至今美國如執政黨連任，該年美股平均升幅11％；反之，如由反對黨上台，該年美股平均係回落。戰後只有兩個大選年股市表現十分差，結果都由反對黨上台。如民主黨2008年上台，今年美股表現令人失望機會好大。兩個大選年而股市大幅回落年份分別係1960年及2000年，前者係民主黨甘乃迪上台，後者係共和黨殊仔上台。

投資日股如買弱勢股

日本經濟又再面對小型credit crunch。投資日股有如買弱勢股，升市包尾、跌市先行，唔似美國及歐洲面對次按危機，日本經濟係泡沫爆破後出現半身不遂現象（香港1997年第三季到2003年第三季樓市泡沫爆破後，有兩大因素為日本所冇：一、香港金管局〔前稱銀監處〕由1984到97年執掂本港所有有問題銀行，令本港銀行業未因樓市泡沫爆破而留下大量呆壞賬。二、我地有阿爺，乖孫有難阿爺放水，由自由行到CEPA，由QDII到港股直通車……。有條大水喉射住，學佘當奴話齋：香港人想窮都難）。日本的Consumer Financing Law 2006年12月完成重新檢討，2007年1月第一期生效，到2009年中全面落實，目的係對消費信貸加強監管，以免重演1980年代樓市情況。第一期（2007年1月至12月）消費者貸款每月還款不得超過月薪三分一或全年利息支出佔收入三十六分之一，令消費信貸全面萎縮。2008年開始第二期生效，由2007年10月開始信用保險局只保證80％信貸，即銀行借出消費貸款必須自行承擔20％風險，形成銀行對中小企信貸今年全面收緊。1月11日日本銀行將公布12月份日本境內銀行借貸情況，到時可見到呢個信貸保證改變所帶來影響。分析界認為，真正影響要今年第一季才睇到。

面對美國經濟可能衰退，日本企業2008年將面對純利零增長。雖然日股O只有十四倍（以2008年估計純利計），上升空間仍然唔多，如純利略為下降，未來O隨時上升十六倍。日本人已多年冇加薪（高薪一代退休後，企業以低薪招聘新人），令打工一族消費力日漸減退。

中國銀行體系內流動資金水平漸受控制（因存款保證金比率一再提高），利率去年提升六次，聽講12月份CPI增長率回落到6.1％，即今年內地負利率環境在收窄中，只要A股唔再跌，本港H股便有一定支持。人民幣今年加快升值（估計升10％），將令熱錢繼續流入。出口增長率下降令更多資金由製造業流向第三產業，形成此消彼長局面。揀股唔炒市，出口股應否睇淡？又要逐隻睇。無法適應新環境者，2003年至今股價已跌到四腳朝天，未來下跌空間亦唔多；能夠適應新環境者，例如透過自動化去減少對工人需求，並將產品升級，由低邊際利潤項目改為高邊際利潤項目，令今年純利止跌回升。換言之，2008年環境只係唔容易賺錢，唔係冇錢賺。工業股經過汰弱留強後，能夠唔受淘汰工業股，未來上升空間好大。

軍工股未見排斥外資

國家發改委公布去年12月三十六個大中城市中，有二十四種產品漲價、七種降價、十五種穩定。上升主要係糧食、植物油、豬肉、鮮奶、化肥、鋼材、水泥同煤。估計去年12月CPI升幅6.1％（將1月25日正式公布）。

「軍工企業股份制」改造實施暫行辦法11月15日出台後，引發一連串討論。長城證券黨委書記兼董事長黃耀華指出，從資本運作現狀睇，軍工上市公司存在五大問題：規模唔大，盈利能力唔強，只有少數幾家船舶工業、航空製造業及航大通訊業有優勢。經營效率唔高，市場反應慢，活力不足。大部分公司業務及經營依賴母公司，經營體制未脫離母公司獨立。優質資產未見注入呢類上市公司，行業競爭力較差。自主創新能力及綜合競爭實力唔強。黃耀華建議軍工體系民營化進程中，必須充分利用資本市場去加快自身發展步伐，借助證券公司力量去應付資本市場專業性及複雜性，包括為國防科工委所屬下十一大軍工集團及其下屬軍工企業負責人提供培訓，將佢地轉為「軍企民營」兩棲戰略，將十一大軍工集團打造成為中國軍事工業主要承包商。制定軍工上市公司資訊披露細則，增加透明度同及時性。通過IPO或現有上市公司平台注入資產，增強競爭力及專業化上市公司群。一如其他上市公司，將軍工企業分為：甲、明星股。乙、現金牛股。丙、死狗股。丁、有問號股。明星股可利用前景吸引力去凝聚資金，進行兼併及壯大競爭力。現金牛股可成為經常性收益來源。死狗股不妨出售或引入私人股權進行重組，或索性自己徹底退出該領域。有問號股應防止現金淨流出，改善前景，讓專業機構協助解決問題。

《中國證券報》發表國際科工委體制改革司司長吳風來文章：軍工股亦歡迎外資參股，除非持有5％以上或惡意收購行為出現，才因國家安全角度考慮係咪批准。換言之，軍工股未對外資採取排斥態度。

從日本證券市場發展過程，流動性過剩初期低資金成本刺激下，證券銀行、地產等表現最優勝；隨後外需帶動下，鋼鐵、造紙、機械等行業表現突出。最後因內需刺激，而令服務業、零售業、建築業、醫藥等飛奔。

中國情況相信已進入第三階段，即由外需轉內需，令服務業、零售業、建築業及醫藥等飛奔；加上國防科技工業大改革，將成為2008年賣點。A、旅遊業──奧運明星效應板塊。B、農業食品及飲料股──通脹受益人。C、機械業——因投資需求而帶動此行業純利高增長，製造業大量投資機械以節省人力資源受惠股。D、高速公路股——兩稅合併得益者。E、銀行業——面對高位震盪、利差增加，但又面對緊縮貨幣政策，令利潤增長放緩。F、房地產──銷售持續萎縮，宏觀調控導致今年純利增長顯著下降，但受惠於人民幣升值。百貨、醫藥、食品、飲料股成為內需上升受惠者。

內地製造業工資續漲

三年前農村工價仍停留20多元一工，因此人人都去城市打工。2006年就漲到40元，2007年60元一工，農村勞動力工價已大幅上升。如果係木工、泥瓦工等投術工人，最少要80至100元一工。依家請個曬穀女工每天都要40到50元，搬運工每天要80到100元；請人耕田從前每畝43元，依家100元以上；曉用機械人員，每畝田成本由330元升到2007年450元以上。農村工價大幅上升，除因為近年農村勞動力大量流失、供需面出現變化外，農房建築、修路基建增加、對勞動力需求急升，再加上豬肉價、農產品價格急升，都令農村工價水漲船高；反之，城市勞動力價格升幅唔算大，例如湖南省工人最低工資每月635元，較2006年只漲35元，形成城市出現工人供應不足現象。睇內地城市製造業工人工資仍會漲上去。