曹仁超 - 大行嗌Sell啼笑皆非

2007-12-04

大行嗌Sell啼笑皆非

12月3日，周一。恒生指數升14.81，收28658.42；成交1107.99多億元。期指低水，跌276點，收28604點。TOM （2383）升23％，成0.74元，係2000年3月以來最大升幅；瑞安房地產（272）升2.9％，見9.88元。　　David Webb一年一度聖誕推介，去年係順龍控股（361），成績便好差，去年12月4日至今恒生指數上升超過40%，但順龍由去年12月4日1.24元回落到今年12月3日0.77元，下跌38%。今年聖誕推介係成謙聲匯（2728），今天市價1.01元，一年後睇會點？

順龍今年表現，再次說明所謂「專家」推介，成績可能甚至唔及小投資者。

滬深A股牛皮。中國中鐵上牌，較招股價4.8元升69％，收8.09元。國航下挫4.8％、南方航空跌6.5％，因油價升1.3％，成89.84美元一桶。TCL升5元，因發新股集資16.9億元人民幣減債。

國企紅籌只有短炒價值

全國人大財經委員會調研室主任朱明春話，依家A股已回到相對合理位置，儘管泡沫仍然存在，但並非不可控制，估計明年O可下降到三十五倍。

對我老曹講，「泡沫」呢兩個字係一個中性名詞，唔代表睇好或睇淡。任何行業都存在泡沫，冇泡沫就像一潭死水，唔會有人注意。冇泡沫啤酒唔好飲，冇泡沫股市唔好玩。泡沫一如人，有產生期、成長期、脹大期及爆破期，作為投資者應泡沫產生期加入，成長期持有，脹大期獲利回吐，然後加入另一泡沫產生期。泡沫唔同泡泡，泡泡只有一個，愈吹愈大，一旦爆破死人樓；泡沫由大量細小泡泡組成，此起彼落，一切睇閣下分析能力而定。

美國消費增長放緩，加上中國宏調收緊，令明年香港經濟增長空間受限制。至於新興市場，每次超買都會出現調整【圖】。

估計明年香港股市表現唔及今年。面對內地A股調整，本港H股同紅籌股會點反應？以O計，國企、紅籌股高達三十倍，已冇長線投資價值，只有短線炒賣價值（例如港股直通車概念）；如內地熱錢減少流入香港H股同紅籌股，股價將有下調壓力，會否因此影響恒生指數其他大藍籌？平安保險（2318）及國壽（2628）第三季純利有57％來自投資收益，而A股自10月16日至今回落超過20％，第四季上述兩公司純利又點？不過，兩大集團分別有83％及82％投資係固定收入項目，如國家債券及存款，A股回落對資產淨值影響有限。

內地銀行並冇將投資收益損益入賬，只係將手續費收入入賬，A股回落對內地銀行股影響較細。

油價見99.25美元後回落。以去年為例，中國能源有70％來自煤、20％來自石油，其餘係水力、天然氣及其他；加上內地汽油零售價仍受國家管制，對民生影響唔大。中國CPI上升主因係食品價格，其次係房地產（如租金），相信中國第四季CPI升幅進入高潮，明年春節過後將回落。

機構投資者不滿大行報告

大摩推介江蘇寧滬（177），估計今年每股獲利32仙，明年每股獲利43仙，目標價9.06元。冠捷科技（903）估計今年每股獲利8.4美仙，明年 10.2美仙，目標價7元。冠捷係全球最大LCD顯示器生產商，市場佔有率23％，計劃產量由今年三千八百萬部升至明年四千八百萬部；LCD電視由今年四百萬部升至明年八百萬部。公司邊際利潤自今年第一季開始回升，加上TPV已成為內地品牌，明年來自內地市場需求大增，有利純利上升。

花旗推介遠洋地產（3377）目標價14.89元，估計今年每股獲利36.4仙，明年74.5仙，明年O下降至十三點七倍。

由於穆投資者服務公司計劃將美國次按評級降低，刺激今天日圓上升至110.57兌1美元；澳元兌日圓回落0.8％，成97.59日圓；加元回落 0.7％成110.64日圓。估計本周澳洲、紐西蘭、歐洲及加拿大維持利率不變，靜候下周美國減息，即歐羅利率4厘、加元利率4.5厘、紐元8.25厘。分析員認為，澳元仍有加息空間，估計明年2月5日睇7厘，即加息四分一厘。

機構投資者批評大證券行愈愈少「Sell」建議，分析報告充斥「Buy」及「Hold」意見，獨欠「Sell」。2003年仍有11％分析報告係「Sell」，今年首十一個月建議「Sell」報告已減至只佔7％。大行回應係近年值得「購入」企業多，值得「拋售」企業少。機構投資者另一批評係公司股價回落10％或以上，大行才發出「Sell」訊號；有時股價回落25％或以上，大行才發出「Sell」訊號。面對呢類「Sell」訊號，有時都幾啼笑皆非。Harlow Capital主席Harlow話，以Whitney and Tanona為例，股價跌十八個月後，大行才發Sell訊號，該股已經差唔多跌到谷底矣。換言之，金融市場好少有「睇淡」分析報告，投資者應好自為之。

美林北美洲分析員David Rosenberg認為，今年第三季開始美國企業增長進入回落期。至於GDP增長率，因美國係以服務業為主經濟體系，較難出現GDP負增長。據彭博統計，標普五百企業第四季純利升幅可能只有1％（較一個月前估計上升8％大幅下調）；第三季經營盈利（即未扣除稅項、利息及折舊開支前）已下降2.5％，係五年來首次回落；跌幅最大係金融業，降幅25％，分析員擔心本季將再跌25％。

十年期債券孳息率回落到3.79厘，亦十分令人擔心。呢個情況1973年8月至1975年8月及1979年1月至1980年10月都曾出現，之後經濟皆出現衰退。1974年平均油價6.87美元一桶，較1973年上升77％；1980年平均油價28.81美元一桶，較1979年上升三倍。今年平均油價較去年上升53％，以及油價自11月21日99.29美元急跌，都係令人擔心訊號。

美國國會立法要求所有汽車及輕型貨車到2020年每加侖油必須行駛三十五哩或以上。依家標準係1984年制訂，每加侖油汽車必須行二十七點五哩、輕型貨車（包括爬山車）行二十二點二哩。上述法例上周五通過，令美國汽車製造業必須發展慳油車，促使未來資本投資大增，而且每輛車生產成本將上升 6000美元左右。其次，2014年起所有汽車必須使用E85汽油（即85％係汽油、15％乙醇）。自從1973年出現石油禁運後，美國國會1975年通過CAFE油耗標準：1974年係每加侖行十二點九哩，1978年上升至十八哩，依家係二十七點五哩，2020年標準係三十五哩。以上述標準，家唔少日本汽車及歐洲汽車都已達到，並非乜苛求。

美國銀髮一族漸成大多數

美國七千八百萬戰後嬰兒依家以每天八千人速度進入六十歲退休年齡，即銀髮一族漸漸成為大多數。佢地正減少股票投資，轉向買債券，出售大城市住宅轉向小鎮居住，亦大大增加美國社會福利負擔，並刺激健康產品需求上升。你投資策略有冇跟隨銀髮一族漸成社會大多數而改變？雖然部分延遲退休年齡至六十二或六十五歲，但美國經濟面對退休人口大幅上升壓力正在浮現。一如1975年美國進入「30 Somethings」時代引發置業潮，1983年進入中產階級大舉投資潮；2006年起美國進入戰後嬰兒退休潮，令樓價開始漫長回落期，2007年極有可能係美股見頂回落期，2008年係美國消費回落期，因退休人士傾向保存資產而非增加消費……。上述乃中長線分析，唔影響短期趨勢，但影響長期邏輯思維。美國繼日本之後漸成「老人國」。美國老化潮較日本遲十七年出現，理由係美國接受大量新移民，新移民加入延長美國經濟繁榮期。

今年8月美國樓價較去年8月高峰期回落4.5％，估計未來日子美國樓價繼續以每年5％速度回落。依家預測美國樓價幾時見底係咪早D？所謂動者永動、靜者永靜，直到有外來一股強大力量干預為止。當樓價每年按3、4％速度上升，漸漸變成每年按5、6％上升，然後7-8％上升……最後瘋狂上升，可以連續十幾年。一旦回落，又可以按每年4.5％速度回落，直到出現強大干預力量為止（例如香港房地產2002年面對美元回落、2003年中央批准內地人來港自由行及2003年9月政府推出孫九招，才扭轉1997年9月開始本港樓價按年回落10％慣性）。

上海舉行2008年中國鋼鐵產業形勢報告會上，中國鋼鐵工業協會常務副會長羅冰生話，今年1月至10月中國生產粗鋼四億零八百五十一萬噸，較去年同期升18.14％，但升幅已出現逐月回落，1月份升幅26.08％，10月升幅只有13.5％；估計明年年產量可達五億四千萬噸，較2007年四億九千萬噸上升10％，但出口總量將較今年下降。

2001年中國十大鋼鐵企業粗鋼產量佔全國46.25％，去年下降至34.66％，企業規模小而且分散，影響全行業發展質量同效益。明年鋼鐵工業進行優化及調整步伐將加快，估計將出現跨省市、跨地區收購合併。

今年1月至10月進口鐵礦石三千一百三十七億噸，上升16.59％；1月至9月進口鐵礦石平均到岸價，較去年同期升27.06％，主因係運費大幅上升。

中國鋁業（2600）11月27日起將氧化鋁現貨售價由3500元一噸調整至3800元一噸，上調8.5％（9月份由3900元一噸下調至3500元一噸）。非中鋁系現貨氧化鋁價格10月份回落5%至10％一噸，成3350%至3400元；依家市場行情亦維持該價。氧化鋁價上調主因係生產成本上升，中國進口鋁土礦到岸價430美元一噸。至於其他鋁廠會否追隨中國鋁業加價？仍在觀望中。

根據國家統計局10月份數字，全國七十個大中城市樓價較去年同期上升9.5％。但有人話房地產開發商提供各種優惠，令房價明升實跌，包括送裝修、送家電等優惠。

12月2日中央電視國際台報道，11月份上海市商品住宅平均成交價10700元一平方米，較10月份11500元下跌七個百分點，係咪代表上海樓價11月份跌7％？由於唔同樓盤、唔同單位、唔同樓層，不能互相作比較。

員工易得?高管難求

十一黃金周前後，內地房地產市場運行呈現四大特點：一、九十平方米住房供應上升，由去年同期佔總供應量34.39％上升至今年佔39.05％，但距離政府要求90╱70仍遠。二、上海、北京、深圳等一線城市二手樓盤掛牌數量上升，觀望情緒濃烈，睇多，但成交量大幅下降，最近連廣州亦係咁。三、房地產開發商紛紛將眼光轉向二線城市，例如蘇州、南京、杭州、長沙、武漢、重慶、天津、大連等，呢D城市房產銷售價仍在上漲。四、唔少業主選擇「轉售為租」作為過渡，令租盤大增，因此對後市仍有信心。

企業所得稅法實施條例已上報國務院，受惠行業包括碼頭、機場、鐵路、公路、電力及水利，新加入受惠行業有環境保護、節能、節水項目，包括海水化淡及節能節水技術改造。另加快國企重組及上市，並開始審批軍事工業上市申請。

香港證券經紀行今年第三季盈利較第二季上升85％，獲利120.8億元。A、B、C三組經紀行獲利較上季上升114％（45億元）、78％（52億元）及58％（23億元）。聽講唔少大行今年花紅高達一年年薪！

11月27日韜睿諮詢公司北京發布最新中國上市公司高管薪酬相關調研結果，去年A股公司高管總現金薪酬較2005年上升19％，中位數接近45萬元人民幣；紅籌股高管較2005年上升25％，薪酬達190萬港元。以薪酬計，內地A股較本港上市H股及紅籌股存在較大差距，理由係內地A股公司治理結構及激勵政策非以日常業務需要出發；加上公司管理層與人力資源部存在一定利益衝突，未能同國外企業高管薪酬制定方法睇齊，仍由董事會╱薪酬委員會負責制定。美國薪酬委員會由唔受控於公司管理層人士組成，對高管薪酬政策、程序、標準擁有完全實施權和控制權，甚至事前唔使請示CEO，因此可高薪招聘合適人才擔任重要職位；反之，內地高管薪酬不但缺乏市場靈活性，往往受政府強制規定不得高於某一數值，或由公司高管自己決定。薪酬委員會形同虛設，缺乏獨立性及專業性，冇足夠權力招攬人才而唔受公司內部人士影響，結果激勵制度唔夠「激勵」。為補救上述缺點，企業通常向高管發認股證，如此一來反而刺激高管追求眼前利益，置長期利益不顧，刺激股價短期造好，行使認股證獲利後辭職。

內地A股年薪僅45萬元人民幣，點樣招攬一流人才服務公司？即使本港紅籌、國企股以年薪190萬港元，亦無法招攬國際一流人才。國內企業薪酬往往偏重「結構性」而忽視「激勵性」，冇同業績掛結果係中國一流高管人才都畀外資企業招聘去為外資企業賣命！理由係國內企業高管薪酬設計唔符合科學方法，缺乏激勵機制，冇同公司業績掛。

今日社會──員工易得，高管難求。一個能令企業業績向前高管人才，唔係幾十萬元年薪或過百萬元年薪便可招聘得到。今天招請月薪萬元職員好容易；反之，招聘高管人才卻十分難。