曹仁超 - 快快快火燭車到埗

2007-12-03

快快快火燭車到埗

12月2日，周日。上周道指由11月26日12724.09反彈至11月30日最高13466.99，收市13371.72，理由係殊仔已準備好救火車去撲滅呢場次按大火（但唔代表次按危機已受控制）。由保爾森出面要求各銀行及金融機構凍結ARMs利率，以免加重供樓者負擔；一個由花旗、富國銀行、華盛頓互惠、Countrywide Financial及其他金融機構組成嘅聯盟，為ARMs貸款戶提供凍結利率協助，唔受協議到期大幅加息影響。所謂ARMs，即首兩年或三年貸款利率極低，第三或第四年起恢復正常利率，維持二十七至二十八年。由於明年將有一百五十萬個家庭嘅ARMs到期，涉及資金3310億美元，如須以正常樓按利率供樓，唔少人可能放棄供樓，因而變成金融企業呆壞賬。保爾森希望上述樓按貸款者唔收市場利率作為條件，並延長供款期，例如由目前三十年改為四十年，去減少呆壞賬出現。上述消息令房貸美上周五升18.8％、房利美升18.6％、Countrywide升16.3％、房屋建築股P. R. Horton升14.3％、Lennar升7.2％及KB Home升8％。

小心下周減息好消息出貨

上周五聯儲局成員聖路易斯儲備銀行行長威廉．普爾响美國凱托研究所舉辦嘅會議上話，美國聯儲局將毫不猶豫地採取措施，以防止金融危機波及整個經濟領域。換言之，12月11日減息已毫無疑問；加上油價跌穿90美元一桶，在紐約嘅德銀分析員Binky Chadha認為，從基本因素睇，油價只值80美元。如油價進一步回落，可刺激股市上升。

本周開始股市炒12月11日聯儲局減息，目前接近100％估減息四分一厘，估減息半厘嘅少於50％。如下周聯儲局減息四分一厘，小心好消息出貨。富國銀行宣布為119億美元按揭組合撥備14億美元，分析界質疑係咪足夠？雖然Citadel入股E*Trade，但分析員認為，入股帶來嘅資金仍未足夠保證 E*Trade能度過難關。

美企發債行動陸續有來

1990年10月花旗股價相等於目前拆細後1.39元一股，當年投資者擔心花旗可能破產，九十年代經濟繁榮，為1990年投資花旗帶來驚人利潤。呢次阿聯酋油元認購75億美元嘅花旗集團可換股債券，年息十一厘，令人聯想歷史重演，花旗上周股價上升9％、美林上升17％、Countrywide Financial升25％、房貸美升43％。2007年是否1990年？目前花旗並冇破產威脅，只係冇能力維持派息。呢次發債目的係維持派息後保持資本充足比率。1990年係波斯灣危機，呢次卻係信貸收縮，恐怕除花旗外，其他金融機構亦需要注資。各企業發債行動應該陸續有來，各位唔好高興得太早，擔心感恩節開始嘅升市只係一次聖誕反彈，而非另一升市開始。

11月美國消費者調查顯示，只有32％決定未來九十天消費較一年前多，25％話會減少（一年前係36％及19％）；39％會購買電子消費品（一年前係 52％）；19％會增加出外飲食消費（一年前35％）；29％話會減少旅行，主要係油價高；反之，買禮物方面則變化唔大。

高盛預測，美國明年出現衰退嘅可能性上升至40-45％，而非9月時只有33%。樓按貸款、信用卡貸款、汽車貸款所面對嘅問題，令未來信貸市場進一步萎縮嘅機會大增。穆廸投資者服務公司計劃將花旗旗下七份SIV（Structured Investment Vehicles）共1300億美元其中六份評級降低，涉及649億美元，因該SIV市值已回落40％。所謂SIV，即係由金融機構出售短期債券吸收資金，作為持有較長期高息貸款之用，至今為止市場上已有三隻SIV無力清還到期貸款。全球三十隻SIV共持有資產3000億美元，穆廸已完成調查其中二十隻。花旗係SIV最大持有者，11月份已為手上七隻SIV撥備76億美元。

上周三十天期LIBOR利率成5.34厘，即倫敦銀行同業市場拆放利率高出美國政府兩年期債券利率嘅3.25厘（高出2厘有多），可見信貸仍在萎縮中。

近日股市波動，令股海老手亦有D暈船浪。投資市場係最考驗意志力嘅地方，通常賺大錢機會不在於大升市，而在於上落市。11月1日恒指31897點，最低係11月22日25861點，收市指數28643點，在上述波幅中，各位有冇保持平常心，做到炒股唔炒市？少做短線，多從中長線角度睇問題，永遠同股市保持一定距離。愈想賺錢嘅人愈冇錢賺（財不入急門）。做股票要耐得住寂寞，唔跟風，自己做功課，完成功課後等候安全價才出擊，堅守止蝕唔止賺原則。別人好耐都唔留意嘅股票，你有冇認真分析係咪被低估？有D股票火紅人人爭住買，你有冇善心做好事，唔賺盡便放手，分一D畀人家賺，以免一旦掉頭自己走唔切？投資如打仗，你嘅布局係點？今年應想明年事（人無遠慮，必有近憂），而非今天只想明天事。早作打算，例如去年早已想奧運概念，而投資同奧運有關股份；今年初已想西九概念，一早買定建築股。

金價油價呈M字走勢

從技術層面睇，一旦出現「M」字便不應再留戀了。例如金價在845美元、油價在99.5美元都出現「M」字走勢，即使長期睇好，短期亦會回落。金價 800美元失守後，下望772美元，唔排除見750美元一盎斯嘅可能性，估計明年1、2月才有再上升力量，如上周唔拋售金礦股同能源股又能怪誰？美滙指數上周已止跌回升，金融市場開始享受美元回穩帶來嘅好處。聯儲局嘅貨幣政策係以貿赤改善去為美元提供支撑，而非靠高息，令短期原材料股面對下滑壓力。過去被大量拋空嘅美元投資者開始獲利計數，形成美元兌歐羅大幅反彈。美股上升，金屬價、能源價回落，呢段日子維持幾耐？冇人知道。一如上周我老曹所講：好好享受聖誕節前嘅反彈吧！

上周二上證指數跌破半年線4882點，係2005年12月內地股市出現牛市以來首次，主要係中石油再度插水並創出新低，拖累內地A股指數回落。中國證監會主席12月1日响深圳表示，繼續吸納符合條件優質大型股上市，並鼓勵H股回歸A股市場。香港H股回歸嘅消息，已成為內地A股下跌嘅原因。11月上證以 5978.94開出，最高6005.13，最低4778.73，11月30日收市4871.78，下跌1082.99，跌幅18.19％，係1994年7 月以來最大單月跌幅。11月高點同10月高點6124點已形成下降軌。令上證指數大幅下跌嘅股份係中石油、中石化等權重指數股，由於外圍油價下跌，連上升軌支持位90美元一桶亦失守，技術分析有機會跌落81.6美元一桶（即今年1月至11月升幅回落38％）。從油價角度睇，石油股仍面對拋售，恐怕周一中石油（857）同中石化（386）仍有下跌空間。

內地散戶心態改為逢高減磅

上周收市計，滬深A股股份收市價低於半年平均者共一千零三十五隻，佔上市公司總數70.36％；跌幅超過30％嘅股份超過四百隻；跌幅超過20％股票更接近七百隻。過去半年投資A股損手嘅散戶佔75％，散戶心態已由死揸唔放改為逢高減磅，中石油、中石化更成為拋空嘅主要品種；內地A股已進入有反彈無上升嘅階段。貴金屬價下跌影響中國鋁業上周五回落4.42％，收37.18元人民幣；鋅業股份亦跌4.04％，有色金屬股份跌4.58％。根據11月28日發改委報告，今年1月至10月中國累計產鋼四萬零八百五十二萬噸，較去年同期上升18.1％；出口五千三百七十六萬噸，上升63.8％，供大於求。唐山產鐵礦石含量66％價格1304元一噸，較去年同期升86.3％；進口價1320元一噸。聯合證券估計，明年4月1日起鐵礦石加幅30％左右，加上2007 年7月1日起國家減少或取消出口退稅，明年中國市場嘅鋼材供應量已超過需求。鋼材價要上升5-6％，才能抵銷鐵礦石價上升30％嘅影響。